Esaia 38 - Tosi Tapu

Ko le masaki mo le mauli o Esekiasi

¹ I le temi lena, na masaki loa Esekiasi, o teiteiki ke mate. Ti na au loa le polofeta ko Esaia, vosa o Amotesito, o pati kiate ia : Ko leinei le folafola a le Eteleno : Tuku au fakatotonu ki lou fale, talie ka ke mate loa, talie leaise ke toe mauli loa.

² Na maliu loa Esekiasi o fakaagaaga ona mata ki le paa, o fai le kole leinei ki le Eteleno :

³ Ei Eteleno ! ke ke manatui na kau saele i ou mua i le agatonu mo le loto saosaoa, ti na kau fai le nea leia e malie ki ou mata ! Ti na tagi loa Esekiasi i le lasi o lona mamae.

⁴ Ti na tuku loa le folafola a le Eteleno kia Esaia, o pati :

⁵ Ano, o pati kia Esekiasi : Ko leinei le folafola a le Eteleno, le Atua o Tavite, lou tamana : Kua kau logo ki lau kole, ti kua kau tio ki ou loimata. Ko leinei, e kau toe fakalasi loa ou aso ki ni fetuu e kau agafulu tupu lima.

⁶ E kau saofaki loa a koe, a koe mo le kolo leinei mei le lima o le sau o Asilia ; e kau malui loa le kolo leinei.

⁷ Ti ko leinei le fakamailoga e tuku atu e le Eteleno ke ke iloa ai e fakasoko loa e le Eteleno le folafola leia kua fakasa e ia.

⁸ E kau fakasolomuli loa le malu i ni fa takakega e kau agafulu o le kakega o Akase, leia e agaaga ki le laa. Ti na solomuli loa le laa i fa takakega e kau agafulu i fa takakega ala kua kaku ki ai le malu.

⁹ Katiko a Esekiasi, sau o Suta, i lona masaki ti mo lona toe mauli.

¹⁰ Na kau pati : Koi lolotoga loku makeke, kae kua tonu ke kau ano Ki matapa o le nofoaga o le kau mate. Kua kau sala i le toega o oku fetuu !

¹¹ Na kau pati : E leaise kau toe tio loa ki le Eteleno, Le Eteleno, i le kele o le kakai mauuli ; E leaise kau toe tio loa ki se tagata Ia latou ala e nonofo i le malama nei !

¹² Kua too loku nofoaga, o ave ke mamao iate au, Ofaipe se falela o se tagata tausi manu ; Kua kau logo kua motu le va o loku mauli ofaipe le kotii e le tagata fai kie A filo o le kie leia kua oki i lana lalaga. I le ao ki le pouli kua ke fakaoki loa au !

¹³ Na kau kataki o kaku ki le usu ; Ofaipe se laione, na fatifatii e ia oku ivi fuli, I le ao ki le pouli kua ke fakaoki loa au !

¹⁴ Na kau tagi ofaipe se pekapeka e lele, Na kau tagi ofaipe le lupe ; Na gaegae oku mata i le tio ki le lagi : Ei Eteleno ! kua kau taomia i le i, saofaki au !

¹⁵ Kolea loa saku pati ke fai ? Na tali mai a ia kiate au, ti na tali e ia laku kole. E kau saele loa i le fakataulalo o kaku ki le oki o oku fetuu, I le oki o loku mamae leinei.

¹⁶ Aliki, ko ou agamalie ala e fiafia ai le tagata i le mauli, Ko latou ala koi kau tukumanava ai ; Kua ke toe tuku le malolo ki loku tino, ti kua ke toe soli mai le mauli kiate au.

¹⁷ Ko leinei, kua liliu oku mamae totonu ko loku fakamauli ; Ti na ke fiafia i lau too loku laumalie mei le popoko o le maumau, Talie na ke tiaki ki ou muli aku agasala fuli.

¹⁸ E leaise ko le nofoaga leia o le kau mate e fakafetai kiate koe, E leaise ko le mate leia e sua kiate koe ; Ko latou ala kua ifo ki le popoko e leaise lotou toe amanaki malie ki lou agatonu.

¹⁹ Ko leia e mauli, ko leia e mauli, ko ia leia e fakafetai kiate koe, O tatau mo au i le aso nei ; E fakailoilo e le tamana ki ana fanau lou agatonu.

²⁰ Na fakamauli au e le Eteleno ! E motou fakagugulu loa a va o amatou ukalele, I aso fuli o lomatou mauli, I le fale o le Eteleno.

²¹ Na pati loa Esaia : Ke aumai se paapaa fiki, ti ke puluti ki ai le papala ; ti e mauli loa Esekiasi.

²² Ti na pati loa Esekiasi : Kolea le fakamailoga e kau iloa ai loa e kau toe pale loa ki le fale o le Eteleno ?