Esaia 37 - Tosi Tapu

Ko le saofaki o Esekiasi mo Suta

¹ I le logo a le sau ko Esekiasi ki le nea lena, na sae loa e ia ona kofu, kae na tui loa e ia se taga, ti na ano loa a ia ki le fale o le Eteleno.

² Na kakau loa e ia Eliakimi, le pule o le fale o le sau, mo Sepina, le sekalaipe, ti mo le kau matua i le kau tagata faisakilifisio ki le polofeta ko Esaia, vosa o Amotesito. Na lotou kofu fuli ki ni taga.

³ Na lotou pati loa kia Esaia : Ko leinei le masau a Esekiasi : Ko le aso leinei ko se aso o le i, mo le tautea, ti mo le luma ; talie kua vave vilo a toe mei le manava o le tinana, kae e leaise koi maua se makeke ke fanaui ai latou.

⁴ Na lagi kua logo le Eteleno, lou Atua, ki masau a Lapesake, leia na kakau mai e le sau o Asilia, lona pule, ke au o tauvelei le Atua mauli, ti e lagi fakasoko loa e le Eteleno, lou Atua ana tautea o tupu ko masau ala na logo a ia ki ai. Koia ke ke faikole o uiga mo le toetoega leia koi mauli.

⁵ Ti na ano loa tagata fakasausau a le sau kia Esaia.

⁶ Ti na pati loa Esaia kia latou : Ko leinei le nea leia e kotou fakasa loa ki lokoutou pule : Ko leinei le folafola a le Eteleno : Aua na ke i o tupu ko masau ala kua ke logo ki ai, o tupu ko masau ala kua tauvelei ai au e tagata fakasausau a le sau o Asilia.

⁷ E kau fakaulu loa kiate ia se laumalie. E maua loa e ia se logo, ti e toe liliu loa a ia ki lona fenua ; ti e kau tamate loa a ia ki le seleta i lona fenua.

Tosi lauveli a Saselipe

⁸ Na foki loa Lapesake ti na maua loa e ia le logo kua mavae lona pule, le sau o Asilia i Lakisi, o ano ke taui Lipena ; ti na maua loa e ia lona pule i ai.

⁹ Ti na maua loa e le sau o Asilia se logo o uiga mo Tilaka, le sau o Etiopia ; na pati loa kiate ia : e au le sau o Etiopia ko lou taui. I lana logo ki le nea lena, na kakau aifai e le sau o Asilia ni tagata avelogo kia Esekiasi, o pati :

¹⁰ E kotou masau feneeki loa kia Esekiasi, sau o Suta : Ko lou Atua, leia e ke fanaki ki ai, ke aua na kakaai e ia a koe, o pati : E leaise tuku loa Selusalemi ki lima o le sau o Asilia.

¹¹ Na ke logo ki le nea leia na fai e le sau o Asilia ki fenua fuli, pe na feaki lana maumaui a fenua ; ti ko koe, pe ke sao loa ?

¹² Ko atua o puleaga ala na maumaui e oku tamana, pe na lotou saofaki olatou fenua, a Kosani, mo Salani, mo Letesefi, mo vosa o Eteni ala e nonofo i Telasale ?

¹³ Kofea le sau o Amate, le sau o Alepati, ti mo le sau o le kolo ko Sefalevaimi, mo Ena, ti mo Iva ?

Ko le kole a Esekiasi i le fale tapu

¹⁴ Ti na too loa e Esekiasi le tosi mei le lima o le tagata avelogo, o lau. Ti na pale loa a ia ki le fale o le Eteleno, o folasi a ia i mua o le Eteleno,

¹⁵ Ti na fai loa e ia kiate ia le kole leinei :

¹⁶ Eteleno o kau tau, Atua o Iselaele, a koe leia e ekeeke i aluga o Selupino ! Ko koe toka tasi e Atua i puleaga fuli o le malama nei, ko koe leia na fakatupu ia le lagi mo le kele.

¹⁷ Eteleno, tokaga mai lou taliga, o fakalogo ! Eteleno, fakamavaa ou mata, o tio ! logo ki masau fuli ala kua fai e Sanekelipe, o tauvele ki le Atua mauli !

¹⁸ E maoki, ei Eteleno, na maumaui e sau o Asilia a fenua fuli ti mo lolatou fenua totonu,

¹⁹ ti na lotou laku olatou atua ki le afi ; kae na leaise ko ni atua latou, ko ni nea na fau e lima o le tagata ki ni laakau mo ni fatu ; ti kua lotou fakapuli latou.

²⁰ I le aso nei, Eteleno lomatou Atua, saofaki matou mei le lima o Sanekelipe, o tupu ke iloa e puleaga fuli o le malama nei ko koe toka tasi ko le Eteleno !

Ko le tali a le Eteleno ia Esaia

²¹ Ti na kakau loa e Esaia, vosa o Amotesito, ke ano o fakasa kia Esekiasi : Ko leinei le folafola a le Eteleno, le Atua o Iselaele : Kua kau logo ki le kole leia na ke fai mai kiate au o uiga mo Sanekelipe, sau o Asilia.

²² Ko leinei le folafola leia e fakasa e le Eteleno o uiga mo ia : Kua vesia a ia kiate koe, kua gologolo a ia kiate koe, Le taupoou, taine o Sione ; Kua kalokalo e ia lona ulu kiate koe, Taine o Selusalemi.

²³ Ko ai leia na ke gologolo ki ai ti na ke lauveli ki ai ? Ko ai leia na ke masau leo lasi ki ai ? Kua ke siki ou mata ki aluga Ki le Sagato o Iselaele.

²⁴ I au tagata fakasausau kua ke lauveli ki le Aliki, Ti kua ke pati : I le lasi o aku saliote, Na kau kava ki le tumutumu o mauga, Ki potupotu o Lipane ; E kau tuuti loa ona sete lalasi, Mo ona sipele fulumalilie, Ti e kau kaku loa ki lona tumutumu fakaoki, Ki lona vaomatua leia e faipe se faisaga laakau fua ;

²⁵ Na kau fakamavaa ia ni matapuna vai, ti na kau inu olatou vai, Ti e kau fakamasa loa ki loku taga vae A vaitafe fuli o Esipito.

²⁶ Pe na leaise ke iloa na kau teuteu a nea fuli ana mei mamao, Ti na kau fakatuutuu latou talu mei temi afea ? I le aso nei na kau fakataga ke lotou soko, Ti ke ke fakaliliu ni kolo tau ko ni tuuga fale maumau.

²⁷ Koia na gaegae ai olatou kakai, Ti na lotou mamate ai i le i mo le luma ; Kua lotou faipe le mutie o faisaga ti mo le vao foou, Pe le mutie o ato o fale, Ti mo le fulumeto leia e malo i mua o lona somo.

²⁸ Kae e kau iloa le temi leia e ke tonatona ai ki lalo, Mo le temi leia e ke ulu ai ki fafo, Mo le temi leia e ke ulu ai ki fale, Mo le temi leia e ke itaita ai kiate au.

²⁹ Talie kua ke itaita kiate au, Ti kua logo mai au masau matasoka ki oku taliga, E kau tuii loa laku matau ki lou isu, ti mo laku fakagutu ki ou laugutu, Ti e kau toe fakaliliu loa a koe i le ala leia na ke au ai.

³⁰ Ke fai le nea leinei pe se fakamailoga kiate koe : Na kai i se fetuu katoa le fua o le fulumeto leia na maluluku, ti i le lua o fetuu le nea leia na somo toka tasi ; kae i le tolu o fetuu, e kotou muluki loa le fakaili, ti e kotou tuuti loa le fulumeto, ti e kotou to loa ni vite, ti e kotou kai loa ona fua.

³¹ Ko le nea leia na saofaki i le fale o Suta, le nea leia na toe, e somo loa ona aka ki lalo, ti e fua loa i aluga.

³² Talie e toe somo ake loa se ga toetoega i Selusalemi, ti mo ni iki na sao i le mauga o Sione. Ko lena le nea leia e fai loa e le alofa o le Eteleno o kau tau.

³³ Ti ko leinei le folafola a le Eteleno ki le sau o Asilia : E leaise ulu loa a ia ki le kolo leinei, E leaise fana loa e ia ni gasau ki ai, E leaise fakasa loa e ia ki ai ni paletau, E leaise fakatuu loa e ia ni palepale tau ki ai.

³⁴ E toe liliu loa a ia i le ala leia na au ai a ia, Ti e leaise ulu loa a ia ki le kolo leinei.

³⁵ E kau puipui loa le kolo leinei ke fakamauli a ia, O tupu ko au, o tupu ko Tavite, laku tagata fakasausau.

³⁶ Na ulu mai loa le aselo o le Eteleno, o tamate i le nofolaga solia o le kau Asilia, a tagata solia e tino lelau tino valu tupu lima afe. I le ala usu ake, ko leinei kua lotou mamate fuli.

³⁷ Ti na tuu loa Sanekelipe, sau o Asilia, mo lana solia, o toe liliu ; ti na nofo loa a ia i Ninive.

³⁸ I se aso leia na lolotoga punou ai a ia i le fale o Niseloke, lona atua, na tamate loa a ia e ona vosa ko Atelameleke mo Saletesele ki le seleta, ti na la sosola loa ki le fenua o Alalate. Ti na pule loa lona vosa, ko Esale-Atone, o fetogi a ia.