Esaia 36 - Tosi Tapu

Ko le ului o Suta e Sanekelipe

¹ I le kau agafulu fetuu o le sau ko Esekiasi, na pale loa Sanekelipe, sau o Asilia, o taui a kolo tau fuli o Suta, ti na maua loa e ia latou.

² Na kakau loa e le sau o Asilia mei Lakisi ki Selusalemi, ki le sau ko Esekiasi, a Lapesake mo se fa solia makeke. Na tuu loa Lapesake i le takiaga vai o le fa tane aluga, i le ala leia e ano ki le fakaifoifo.

³ Ti na ano loa kiate ia a Eliakimi, vosa o Ilekisa, le pule o le fale o le sau, mo Sepena, le sekalaipe, ti mo Soake, le vosa o Asafe, le tagata taupau tosi.

⁴ Na pati loa Lapesake kia latou : Kotou pati kia Esekiasi : Ko leinei le masau a le sau lasi, le sau o Asilia : Ko le fanaki fea lena e ke pipiki ki ai ?

⁵ E kau fakasa atu kiate koe, ko masau noa fuli ana : e aoga ki le tau le poto mo le makeke. Ko ai leia kua ke tuku ki ai lau fanaki, ke ke agatuu ai kiate au ?

⁶ Ko leinei, na ke tuku lau fanaki ki Esipito, na ke too ia le fa u fati lena ke tokoi atu kiate koe, leia e puui ia le lima o leia e fanaki ki ai : Ko lena le anoaga o Falaone, sau o Esipito, kia latou fuli ala e fanaki kiate ia.

⁷ E lagi ke pati mai loa kiate au : Ko le Eteleno lomatou Atua, leia e motou fanaki ki ai. Pe leaise ko ia leia na maumaui e Esekiasi ona ganea taualuga mo ona aletale, o pati kia Suta mo Selusalemi : E kotou atolasio loa i le aletale leinei ?

⁸ I le aso nei, fai se talaga mo loku pule, le sau o Asilia, ti e kau soli atu loa kiate koe ni kau osi e lua afe mo ka e ke maua ni tagata ke eke ia latou.

⁹ Pe feaki loa ke ke kapu ia se pule e tasi i pule liliki o loku sau ? Pe ke tuku lau fanaki ki Esipito, ke maua mei ai ni saliote mo ni tagata ekeosi ?

¹⁰ Tasi leia, pe leaise ko le finegalo o le Eteleno leinei na kau pale mai ai o taui le fenua leinei ke maumau ? Na folafola mai le Eteleno kiate au : Pale o taui le fenua lena, ti ke maumaui a ia.

¹¹ Na pati loa Eliakimi, mo Sepina, mo Soake kia Lapesake : Masau mai ki au tagata fakasausau i le fakaalamea, talie e motou matala ki ai, kae aua se ke masau fakasutea mai ke logo ki ai le kakai leinei e tutuu i aluga o le paa.

¹² Na tali loa Lapesake : Pe na kakau mai au e loku pule ke kau fai a masau ana ki lou pule mo koe ? Pe leaise ko tagata ana e tonatona i aluga o le paa o kai olatou faikauga mo inu olatou livai, o fakatasi mo koutou, ala na kakau mai au ki ai ?

¹³ Ti na fakafeofi loa Lapesake o kalaga i lona makeke katoa i le masau fakasutea : Kotou fakalogo mai ki masau a le sau lasi, a le sau o Asilia !

¹⁴ Ko leinei le masau a le sau : Ke tuku e Esekiasi lokoutou kakai, talie e leaise mafai e ia lokoutou saofaki.

¹⁵ Ke aua na toso koutou e Esekiasi ke kotou fanaki ki le Eteleno, o pati : E saofaki loa tatou e le Eteleno, ti e leaise tuku loa le kolo leinei ki lima o le sau o Asilia.

¹⁶ Aua na kotou tui kia Esekiasi ; talie ko leinei le masau a le sau o Asilia : Kotou fakatokatoka mo au, kotou fakalogo mai kiate au, ti e kotou tasi kai loa le fua o lana vite mo lana fiki, ti e kotou tasi inu loa le vai o lona fa tane,

¹⁷ O kaku ki le aso leia e kau au ai loa, o ave koutou ki se fenua leia e tatau mo lokoutou fenua, ki se fenua o le fulumeto mo le vino, ki se fenua o le pane mo le vite.

¹⁸ Ke aua na kakaai koutou e Esekiasi, o pati : E saofaki loa tatou e le Eteleno. Pe na tasi saofaki e atua o atu puleaga lona puleaga mei le lima o le sau o Asilia ?

¹⁹ Kofea a atua o Amati mo Alepati ? Kofea a atua o Sefalevaimi ? Pe na lotou saofaki Samalia mei loku lima ?

²⁰ I atua fuli o fenua ana, ko ai ma ala na saofaki ia olatou fenua mei loku lima, ke aga ai le Eteleno o saofaki Selusalemi mei loku lima ?

²¹ Kae na lotou fakaleemu, ti na leaise lotou tali fua ki se nea ; talie na tuku e le sau kia latou le fakatotonu leinei : E leaise kotou tali loa kiate ia.

²² Ti na ano loa Eliakimi, vosa o Ilekisa, le pule o le fale o le sau, mo Sepina, le sekalaipe, ti mo Soake, vosa o Asafe, le pule tosi, kia Esekiasi mo olatou teu kua sae, ti na lotou fakamatala loa kiate ia a masau a Lapesake.