Esaia 35 - Tosi Tapu

Ko tapuakina o Iselaele i le temi ki muli

¹ E fiafia loa le toafa mo le fenua kaka ; E fiafia loa le fenua lavaki, ti e se loa a ia ofaipe se nalesise ;

² E se apele loa a ia i se, ti e soposopo loa a ia i le fiafia, I ni sua fakafiafia, ti mo ni kalaga o le malo ; Ti e soli loa kiate ia le kololia o Lipane Ti mo le fulumalie o le Kalemelo mo Saloni. E lotou tio loa ki le kololia o le Eteleno, Mo le fulumalie o lotatou Atua.

³ Kotou fakamakeke a lima kua gaegae, Ti kotou tokoi a tuli kua sisiga ;

⁴ Kotou pati kia latou ala kua loto gaegae : Kotou loto makeke, aua na kotou i ; Ko leinei lokoutou Atua, e au loa le tautea, Le totogi a le Atua ; E au loa a ia totonu, ti e fakamauli loa e ia koutou.

⁵ I le aso lena e mavaa loa a mata o kivi, E mavaa loa a taliga o kau tulituli.

⁶ I le aso lena e soposopo loa le kito ofaipe se tia, Ti e sua fakafiafia loa le alelo o le gutu mate. Talie e mapuna loa ni vai i le toafa, Ti mo ni vaitafe i le ganea lavaki ;

⁷ E liliu loa le one kaka ko ni vai, Ti mo le kele malo ko ni matapuna vai ; I le ganea leia na nofo ai a pili e tupu ai loa ni u mo ni kofe.

⁸ E i ai loa se ala kua tofa, se ala Leia e fakaigoa loa ko le ala tapu ; E leaise fakalaka loa i ai se tagata kelekele, talie e tuku a ia kia latou tefua ; Ti ko latou ala e ano loa i ai e leaise feala loa ke sese, tatau foki mo le kau vale.

⁹ I le ala lena, e leai se laione ; E leaise ano loa i ai se manu fekai, E leaise felavei loa i ai mo se manu fekai. Ko latou ala na saofaki e le Eteleno e saele loa i ai.

¹⁰ Ko latou ala na totogi e le Eteleno e toe liliu loa, E lotou ano loa ki Sione mo ni sua o le malo, Ti e fakapala loa olatou ulu ki se fiafia lee gato ; E fakafeofi loa kia latou le fiafia mo le nekenekea, Kae e sosola loa le mamae mo tagi.