Esaia 34 - Tosi Tapu

Folafola kikite ki Etome

¹ Atu puleaga, kotou fakafeofi mai, o fakalogo ! Kakai, kotou tokaga ! Ke logo le kele, a ia mo nea fuli e fakaapele ia a ia, Ke fakamaoki le malama nei, a ia mo nea fuli na tupu i ai !

² Talie kua mamae le Eteleno ki atu puleaga fuli, Ti ka vilo lona sausau ki alatou kau solia fuli : Kua tuku e ia latou ke maumaui, Kua tuku e ia latou ke tamate.

³ Kua tiaki olatou kau mate ki fafo, Kua namuku olatou mate, Ti kua tafe le toto i mauga.

⁴ Kua vela o okioki le kau solia katoa o le atu lagi ; Kua takai le lagi ofaipe se tosi, Ti kua vilo lona kau solia katoa Ofaipe le vilo o le lau vite, Ofaipe le vilo o le lau fiki.

⁵ Kua kona laku seleta i le atu lagi ; Ko leinei, ka ifo a ia ki Etome, Ki le kakai leia na kau tuku ki le maumau, ke tautea ai a ia.

⁶ Kua apele le seleta a le Eteleno i le toto, ti kua piki i ai a gako Mo le toto o akeno mo koti, Ti mo gako o ifiifi o ovi tagata ; Talie e i ai ni vikitima a le Eteleno i Potesela, Ti mo se tamatea tagata lasi i le fenua o Etome.

⁷ Kua vivilo a pipi vao mo latou, Ti mo pipi tagata sele mo pipi tagata ; Kua kona le kele i le toto, Ti kua mau le one i le gako.

⁸ Talie ko se aso o le totogi ki le Eteleno, Ko se fetuu o le liufaki o nea ala na fai ki Sione.

⁹ E fetogi loa a vaitafe o Etome ko ni vaitafe pulu, Ti mo lona efu ko le sufele ; Ti e fai loa lona kele pe le pulu leia e ulaula.

¹⁰ E leaise toe mate loa a ia i le ao mo le pouli, E malaga loa lona afu o lee gato. E lavaki loa a ia i tautupu mo tautupu, E leaise fakalaka loa i ai se tasi i se aso.

¹¹ E maua loa a ia e le pelikano mo le eliso, E nonofo loa i ai le lulu mo le kolopo. E fao loa i ai le afo o le lavaki, Ti mo le nivo o le maumau.

¹² E leaise toe maua loa se kau tagata lalasi ke fakanofo ia se sau, Talie kua pupuli ona tagata aliki fuli.

¹³ E tupu loa a laakau sukisuki i ona fale sau, A vao veli mo vao talatala i ona kolo tau. E liliu loa a ia ko le nofoaga o pili, Le maloloaga o lulu.

¹⁴ E felavei loa i ai a manu o le toafa mo kuli vao, Ti e fekalagaaki loa i ai a koti tagata ; E maua loa i ai e le tuuola o le pouli lona nofoaga Ti e mau loa e ia i ai lona maloloaga.

¹⁵ E fai loa e le gata lona ofaga i ai, o tuku ai loa ona fua, Ti mo ofaki loa latou, ti mo tanaki loa ona uviki i lona malu ; I lena e fakatasi ai loa a votu fuli.

¹⁶ Kotou afa i le tosi a le Eteleno, ti kotou lau ! E leaise se nea fua e tasi e leaise soko loa i nea fuli ana, E leaise puli loa se manu fua e tasi o latou. Talie na fakatotonu a ia e lona gutu. Ko lona Laumalie leia e tanaki ia loa latou.

¹⁷ Kua fai e ia kia latou le toso, Ti kua vae e lona lima kia latou le fenua ki le afo. E lotou maua loa a ia o lee gato, E lotou nonofo loa i ai i tautupu mo tautupu.