Esaia 33 - Tosi Tapu

Le fakamauli o Selusalemi i le mamae

¹ Malaia kiate koe leia e maumaui ia a nea fuli, Kae na leaise maumaui ! Leia e kaia, kae na leikiaise kaia iate ia ! Io, ka oki loa lau maumaui, e maumaui loa a koe ; Ti ka oki loa lau kaia, e kaia loa iate koe.

² Eteleno, alofa mai kia matou ! E motou amanaki malie kiate koe. Ke ke liliu ko lomatou tokoi i usu fuli, Ti mo lomatou fakamauli i le temi o le mamae !

³ Ka sa lou leo, e sosola a kakai ; Ka ke tuu ake ki aluga, e mavete a atu puleaga.

⁴ Kua tae okoutou koloa Ofaipe le tae a le seseivaka ; Kua oso ki ai Ofaipe le oso a seseivaka.

⁵ E taualuga le Eteleno, Talie e nofo a ia i aluga ; E fakaapele e ia Sione I le faitotonu mo le maokioki.

⁶ E fimalie loa ou aso ; Ko le poto mo le iloa o le Eteleno ko se matapuna o le fakamauli ; Ko le i ki le Eteleno, Ko lena le koloa o Sione.

⁷ Ko leinei, le kau toa E fai ia ni kalaga i fafo ; Ko tagata avelogo o le tokamalie E fetagisi fakaveliveli ai.

⁸ Kua lavaki a ala lalasi ; E leaise koi ano i ala liliki. Kua maumaui e ia le sai, kua vesia a ia ki kolo, E leaise maua e ia se fakaapaapa ki se tasi.

⁹ Kua nofo le fenua i le putu, i le loto mamae ; Kua luma Lipane, ti kua gaegae ; Kua fai le Saloni pe se toafa ; Kua lu e le Pasani mo le Kalemelo a lau o ola laakau.

¹⁰ E pati le Eteleno : I le aso nei e kau tuu loa ki aluga, I le aso nei e siki loa au ki aluga, I le aso nei e kau taualuga loa.

¹¹ Na kotou fakakaukau ni vao ke kai e kau manu, E kotou fanaui loa ni vao ke moe ai a kau manu ; Ko lakoutou tukumanava, Ko se afi leia e tutu ia loa koutou.

¹² E liliu loa a kakai Ko ni umu lase Ko ni laakau talatala na tuuti O laku ki le afi ke ulaula i ai.

¹³ Koutou ala e nonofo i mamao, kotou fakalogo mai ki le nea leia na kau fai ! Ti ko koutou ala e nonofo feofi, kotou iloa le lasi o loku makeke !

¹⁴ Kua i le kau agasala i Sione, Kua maua e se lulu le kau agatuu ki le Atua : Ko ai leia ia tatou e mafai ke nofo i se afi kaka ? Ko ai leia ia tatou e mafai ke nofo i ni ulaula lee gato ?

¹⁵ Ko le tagata leia e saele i le faitotonu, Ti e masau i le maoki, Leia e vesia ki se totogi o le fakamakeke, Leia e tata ona lima ke aua na tali se nea alofa, Leia e tapono ona taliga ke aua na logo ki ni masau o le toto, Leia e sai ona mata ke aua na tio ki le veli,

¹⁶ Ko ia lena e nofo loa i ni ganea taualuga ; Ko lona maloloaga loa ko ni utu makeke ; E soli loa kiate ia se pane, Ti e sali tuumau loa kiate ia se vai.

¹⁷ E tio loa ou mata ki le sau i lona fulumalie, E lotou tio loa ki le fenua i lona lasi katoa.

¹⁸ E manatui loa e lou loto le temi fakaii kua sili, ti e ke pati loa : Kofea le sekalaipe, kofea le tagata tae tukusau ? Kofea le tagata leoleo o tule ?

¹⁹ E leaise ke toe tio loa ki le kakai matasoka, Ki le kakai leia na fakapouli lana masau ke aua na logo ki ai, Ti na faikese lona alelo ke aua na matala ki ai.

²⁰ Tio ki Sione, le kolo o otatou aso lalasi ! E tio loa ou mata ki Selusalemi, nofoaga fimalie, Falela leia e leaise toe siki loa, Leia e leaise toe too loa ona pou i se aso, Ti e leaise toe tatala loa ona maea.

²¹ Ko lena le ganea leia e sa ai loa le fulumalie o le Eteleno kia tatou. E maua loa i ai ni liua kia tatou, ni vaitafe lalasi Ala e leaise ulu loa ki ai ni vaka foe, Ti e leaise ano ai loa se vaka tau.

²² Talie ko le Eteleno ko lotatou tui fakamaau, Ko le Eteleno ko lotatou tagata takitaki, Ko le Eteleno ko lotatou sau : Ko ia leia e fakamauli ia tatou.

²³ Kua tatala ou maea ; E leaise koi lotou taofi le tafito o le fana, ti e leaise koi lotou toso a la ke makita. I le aso lena e vae loa se koloa lasi o le tau : E kau foki mo le kau kito i le vae o le koloa :

²⁴ E leaise pati se tasi : E kau masaki ! E maua e le kakai o Selusalemi le fakamolemole o alatou agasala.