Esaia 32 - Tosi Tapu

Ko le au a Kilisito, le Sau o atu sau

¹ I le aso a ia e pule loa le sau i le faitotonu, Ti e pule loa a aliki i le maoki.

² E lotou fai loa pe se mumuniaga i le matagi, Pe se solaaga i le afa, Pe ni tafe i se fenua malo, Pe le malu o se utu lasi i se kele fia inu.

³ Ko mata o latou ala e tio e leaise toe mapono loa, Ti ko taliga o latou ala e fakalogo e tokaga loa.

⁴ Ko le loto o tagata valelea e poto loa ke matala, Ti ko le alelo o latou ala e gutu mate e masau vave loa mo matala.

⁵ E leaise toe soli loa ki le tagata valea le igoa ko le tagata aliki, Pe ki le tagata kaka le igoa ko le manava alofa.

⁶ Talie e fakasa e le vale ni nea fakavale, Ti e afa e lona loto le veli, Ke fai ni agatuu ki le Atua Ti ke lau ni masau salasala ki le Eteleno, Ke tiaki noa le laumalie o leia e pakupaku, Ti ke too le nea inu a leia e fia inu.

⁷ E matakakai a masafu a le tagata kaka ; E fai e ia ni fakakaukau veveli, Ke fakapuli ai le tagata fakaaloalofa ki ni masau loi, Logo ai pe tonu le tagata mativa.

⁸ Kae ko leia e agamalie e fai ia ni fakakaukau malilie, Ti e kataki a ia i ana fakakaukau malilie.

⁹ Fafine fakaauauganoa, Kotou tutuu ki aluga, kotou fakalogo mai ki loku leo ! Taineliki fakafulufulumalie, Kotou tokaga mai okoutou taliga ki laku folafola !

¹⁰ I se fetuu e tasi mo ni ga aso, E kotou lulu loa, taineliki fakafulufulumalie ; Talie kua oki le taukai vite, E leaise soko loa le tau o le fuata.

¹¹ Ke kotou i, fafine fakaauauganoa ! Ke kotou lulu, taineliki fakafulufulumalie ! Ke kotou tatala okoutou kofu, ke kotou telefua, Ti ke kotou tui le taga !

¹² E pa le fatafata I le manatu ki le fulumalie o faisaga fulumeto Ti mo le fua o faisaga vite.

¹³ I le kele o loku kakai Kua tupu a laakau talatala mo vao sukisuki, I fale fakafiafia fuli O le kolo o le fiafia.

¹⁴ Kua tiaki le fale fakasau, Kua lavaki le kolo logoa ; E liliu loa le mauga ikiiki mo le tule ko ni ana ; E manonogi loa i ai a asino vao, ti e kai loa i ai a kau manu,

¹⁵ O kaku ki le aso leia e liligi ai le Laumalie maokioki kia tatou mei aluga, Ti e fetogi ai le toafa ko se faisaga laakau fua, Ti e fai ai le faisaga laakau fua pe se vaomatua.

¹⁶ I le aso a ia, e nofo loa le maoki i le toafa, Ti e maua loa e le faitotonu lona nofoaga i le ulu laakau fua.

¹⁷ Ko le gaoi a le faitotonu ko le tokamalie, Ti ko le fua o le faitotonu ko le malolo mo le fimalie o lee gato.

¹⁸ E nofo loa loku kakai i le nofoaga o le tokamalie, I ni fale makeke, I ni fale malolo.

¹⁹ Kae e taotao loa le vaomatua e le ua fatu, Ti e tuku loa le kolo ke taulalo.

²⁰ Kae manuia koutou ala e muluki fakaili i tafatafa o le vai, Ti e tuku ia le pipi mo le asino ke feanoaki faitalisa !