Esaia 31 - Tosi Tapu

E au le fakamauli mei le Eteleno toka tasi

¹ Malaia kia latou ala e ifo ki Esipito o afa se tokoi i ai, Latou ala e fanaki ki ni osi, Ti e tui ki le lasi o saliote mo le makeke o le kau solia ekeosi, Kae e leaise lotou tio ki le Sagato o Iselaele, Ti e leaise lotou afa le Eteleno !

² Kae e poto foki mo ia, e aumai e ia le malaia, Ti e leaise toe too e ia ana folafola ; E tuu loa a ia ki aluga ki le fale o le kau agaveli, Ki le tokoi a latou ala e fai ia le agaveli.

³ Ko le tagata Esipito e tagata, kae e leaise Atua ; E kanofi ana osi kae e leaise laumalie. Ka falo loa e le Eteleno lona lima, E siga loa leia e tokoi, Ti e vilo loa ki lalo leia e fai ki ai le tokoi, Ti e la mamate loa toka lua.

⁴ Talie na folafola mai le Eteleno kiate au : E logo ai kua fakatasi le kau tausi ovi Ki se laione, pe ki se uviki laione leia e gugulu i lana nea kai, Talie e leaise i fua a ia ki alatou kalaga, Ti e leaise patipati fua a ia ki lolatou toka api ; E tatau foki mo le Eteleno o kau tau, e ifo loa a ia O tau i le mauga o Sione ti mo lona mauga ikiiki.

⁵ Ofaipe ni manu lele ala e folasi ia olatou kapakau i aluga o olatou uviki, E tatau foki mo le Eteleno o kau tau, e folasi ia loa lana puipui ki Selusalemi ; E puipui loa e ia ti e saofaki loa e ia, E tuku loa e ia ti e fakamauli loa e ia.

⁶ Fanau a Iselaele, Kotou toe liliu mai ki leia na kotou agatuu veli ki ai !

⁷ I le aso lena, e tiaki loa e le tagata ona fakatata siliva mo ona taulaatua aulo, Ala na kotou fau ki okoutou lima tukipo.

⁸ Ti e vilo loa le tagata Asilia i se seleta e leaise ko se seleta a se tagata, Ti e kai loa a ia e se seleta e leaise ko se seleta a se tagata. E sola loa a ia i mua o le seleta, Ti e popula loa ana tagata tau muli.

⁹ E sola loa lona utu i lona i, Ti e lulu loa lona kau pule i mua o le manumanu ; E pati le Eteleno, leia e tuu lana afi i Sione, Ti mo lana gutuumu kaka i Selusalemi.