Esaia 30 - Tosi Tapu

Ko le fakasa o le tautea o Suta

¹ E pati le Eteleno : Malaia ki fanau patigataa, Ala e fai ia ni fakapapau sala mo au, Ti e fai ia ni sai sala mo loku finegalo, Ke fakalasi ai a agasala !

² Ala e ifo ki Esipito kae na leaise afa mai kiate au, O afa se makeke i tafa o Falaone, O afa se mumuniaga i le malu o Esipito !

³ E liliu loa le makeke o Falaone ko se luma kia koutou, Ti ko le mumuniaga i le malu o Esipito ko se mamae kia koutou.

⁴ Ko leinei kua kaku foki a pule o Suta ki Tesoane, Ti mo ona fakafofoga ki Anese.

⁵ E lotou luma fuli loa o tupu ko se kakai leia e leai loa sona aoga fua kia latou, Pe ke fakamauli ia latou, pe ke tokoi kia latou, Kae e fakatupu ia loa lolatou luma ti mo lolatou mamae.

Kia latou e ano o afa tokoi i Esipito

⁶ Ko le tua o manu o le potu saute : I se fenua o le mamae mo le mativa, Leia e au mei ai le laione tagata mo le laione fafine, Le gata kona mo le talakone lele, E lotou fetuku olatou koloa i tua o asino mo kamelo, O ave ki se kakai leia e leaise aoga fua kia latou.

⁷ Talie e noa ti e lee aoga le tokoi a Esipito ; Koia e kau fakaigoa ai le nea lena ko se logoa noa.

⁸ Ano i le lakaga nei, o tosi a nea ana i olatou mua i se laupapa, Ti ke tosi latou i se tosi, O tupu ke lotou tuu i temi ka au, I tautupu fuli o lee gato.

⁹ Talie ko se kakai agatuu, Ko ni fanau gutu loiloi, Ko ni fanau ala e leaise fia logo ki le lao a le Eteleno,

¹⁰ Ala e pati ki le kau faikikite : Aua na kotou tio ! Ti ki le kau polofeta : Aua na kotou fakasa mai kia matou ni maoki, Kae koutou fakasa mai kia matou ni nea logologo malie, Kotou kikite ni nea noa !

¹¹ Kotou maliu kese i le ala, Kotou tiaki le ala totonu, Kotou fakamamao i omatou mua le Sagato o Iselaele !

¹² Koia e folafola ai le Sagato o Iselaele, o pati : O tupu kua kotou tiaki le folafola lena, Ti kua kotou fanaki ki le agamakeke mo puleaki kaka, Ti kua kotou tuku kia latou lakoutou tui,

¹³ E liliu loa le sala lena kia koutou Ofaipe se mafaa i se paa taualuga leia e talitali fai ke solo ; E sa loa se makita i le mafaa, ti e fokifa fai kua solo a ia i le temi e tasi :

¹⁴ E maumau a ia ofaipe se ipu kele, Leia na taai fakaveliveli ke momo, Ti e leaise toe maua loa sona ga tipi ke too ai se malamalai afi i le gutuumu, Pe ke asu ai se ga vai i le fa tane.

Fakamakeke o Iselaele ke fanaki ki le Eteleno

¹⁵ Talie na folafola le Aliki, le Eteleno, le Sagato o Iselaele, o pati : I le tafoki mai kiate au mo le nofo iate au, e kotou maua ai le mauli ; I le agamalu mo le tui kiate au, e kotou maua ai le makeke. Kae na leaise kotou loto ki ai !

¹⁶ Na kotou pati : Leai ! e motou lele loa i ni osi ! Koia e kotou lele ai loa i ni osi, kae o sosola. Na kotou pati : e motou eke loa i ni osi gasolo ! Koia e tuli loa koutou e ni osi ala e toe gasolo ake.

¹⁷ E sola loa se tino afe i le fakaii a se fa toka tasi, Ti e kotou fesolaki loa i le fakaii a se toka lima, O kaku ki lokotou nonofo taki toka tasi Ofaipe se fakamailoga i le tumutumu o le mauga, Ofaipe se manumanu i le tumutumu o le mauga ikiiki.

Fakapapau ki le temi ki muli

¹⁸ Koia e oli le Eteleno ke soli atu kia koutou lona kalasia, Ti e tuu loa a ia ki aluga o soli atu kia koutou lona manava alofa ; Talie ko le Eteleno ko se Atua faitotonu : Manuia latou fuli ala e amanaki malie kiate ia !

¹⁹ Io, kakai o Sione, kakai o Selusalemi, E leaise ke toe tagi loa ! E soli atu loa e ia kiate koe lona kalasia, mo ka ke kalaga loa ; I le temi fai leia e logo ai loa a ia ki lau kalaga, e tali atu loa a ia kiate koe.

²⁰ E soli atu loa e le Eteleno kia koutou se pane i le oge, Ti mo se vai i le mamae ; Ko latou ala e ako ia a koe e leaise toe mumuni loa, Kae e tio loa ou mata kia latou ala e ako ia a koe.

²¹ E logo loa ou taliga i ou muli ki le leo leia e pati loa : Ko leinei le ala, kotou saele i ai ! Talie e kotou ano loa ki le fetuu atamai, pe kotou ano loa ki le fetuu sema.

²² E ke tio loa ki le kelekele o le siliva leia e kofu ai okoutou fakatata Ti mo le aulo leia e teuteu ai latou. E ke tiaki loa a momo o fakatata ofaipe ni penu, Ti e ke pati loa : Penu, mavae i leinei !

²³ Ti e fakato loa e le Eteleno le ua ki le pulapula leia na ke tuku ki le kele, Ti e lasi loa mo kano malie le pane leia e soli loa e le kele ; Ti e kai loa au kau manu i ni faisaga mutie lalasi, i le temi lena.

²⁴ Ko pipi mo asino ala e gaoi ia le kele, E kai ia loa se nea kai konakona, Leia e asu loa ki le supeti mo le lato.

²⁵ I mauga taualuga fuli mo mauga liliki fuli, E i ai loa ni liua, mo ni vaitafe, I le aso o le tamatea lasi, I le sisiga o tule fuli.

²⁶ E fai loa le malama o le masina pe leia o le laa, Ti e lasi tua fitu loa le malama o le laa (ofaipe le malama o aso e fitu), I le aso leia e sai loa e le Eteleno le lavea o lona kakai, Ti mo fakamauli loa e ia le kafo o ana fa ta.

Tautea o le kau Asilia

²⁷ Ko leinei, e au le suafa o le Eteleno mei mamao ; Kua vevela lona sausau, ofaipe se vela makeke ; Kua apele ona laugutu i le sausau, Ti kua fai lona alelo pe se afi kaka.

²⁸ E fai lana tukumanava pe se vaitafe kua puke o kaku ki le ua, Ke ti ki aluga a atu puleaga ki le foe o le malaia, Pe se fakagutu kaka I kauvae o atu puleaga.

²⁹ E kotou sua loa ofaipe le po leia e fai ai se lafeti, E fiafia loa okoutou loto ofaipe leia e saele kae ta ukalele, O ano ki le mauga o le Eteleno, ki le utu o Iselaele.

³⁰ Ti e fakagugulu loa e le Eteleno lona leo fakaii, E fakaali loa e ia lona lima leia kua fakalogo ta, I le vevela o lona sausau, I loto malie o le ula o se afi kaka, Mo le lomaki, mo le afa, ti mo le ua fatu.

³¹ I le logo ki le leo o le Eteleno, e lulu loa le tagata Asilia ; E taai loa a ia e le Eteleno ki lana laakau.

³² I fa ta fuli a le laakau leia na teuteu kiate ia, Ti e fakavilo loa e le Eteleno kiate ia, E logo loa ki tapulini mo alepe ; E tau loa le Eteleno kiate ia i se lima makeke.

³³ Talie kua teuteui se mata afi talu mei fualoa ; Kua teuteui a ia ki le sau, kua fai a ia ke loloto mo lau lasi ; Kua fakatuuga i ai se fafie lasi mo se afi ; E tutu loa a ia e le tukumanava a le Eteleno, ofaipe se vaitafe sulifa.