Esaia 3 - Tosi Tapu

Ko le tautea o le kakai o Selusalemi

¹ Ko leinei ka too loa e le Aliki, le Eteleno o kau tau, I Selusalemi mo Suta, A fanakiaga fuli mo tokoi fuli, Io, a tokoi fuli o le pane Ti mo tokoi fuli o le vai,

² Le tagata toa mo le tagata tau, Le tui fakamaau mo le polofeta, Le tagata faikikite mo le matua,

³ Le pule solia o le tino lima mo le kovana, Le tagata akonaki poto, mo le tagata poto tufuga, ti mo le tagata poto masau.

⁴ E kau tuku loa kia latou ni pule koi muli, Ti e pule loa ni toe kia latou.

⁵ E fefakaveliveliaki loa le kakai ia latou ; E popula loa le tagata ki le tagata, ti e popula loa le tagata ki lona kaiga totonu. E fia nealasi loa le tama tupulaga ki le matua, Ti e fia nealasi loa le tagata noa ki le tagata mauiga.

⁶ E kaku loa o too e le taina lona taina i le loto fale o le tamana, o pati kiate ia : E ke maua ia se kofu, ke ke liliu ko lomatou pule ! Ke ke pule ki ganea maumau anei !

⁷ I le aso fai lena e tali loa a ia : E leaise kau mafai se nea kia koutou, Talie e leaise ko se toketa au, Ti e leaise maua fua se pane pe ko se kofu i loku fale ; Aua na kotou fakanofo au ke pule ki le kakai !

⁸ Talie kua malaia Selusalemi, Ti kua siga mo Suta, O tupu e agatuu ala masau mo ala gaoi ki le Eteleno, Ti e lotou matatuu ki lona agai.

⁹ E fakamaoki olatou mata kia latou, Ti e lotou fakasa fakalauatea alatou agasala ofaipe Sotoma. Malaia ki olatou laumalie ! Talie e lotou teuteu le malaia kia latou totonu.

¹⁰ Fakasa ki le tagata agatonu, e tapuakina loa a ia, Talie e fiafia loa a ia i fua o ana gaoi.

¹¹ Malaia ki le tagata agaveli ! E nofo loa a ia i le veli, Talie e kai loa e ia le fua o ona lima.

¹² Kua fakamakekei loku kakai e ni toe, Ti kua pule ni fafine kiate ia. Ei loku kakai ! kua fakasese a koe e latou ala e taki ia a koe, Ti kua lotou fakaliliu o fakalialia le ala leia e ke saele ai.

¹³ Kua tuu le Eteleno ki aluga ke folafola, Kua tuu a ia i aluga o fakamaaui a kakai.

¹⁴ Kua fakamaaui e le Eteleno A kau matua o lona kakai mo ona kau pule : Na kotou kai loku faisaga vite ! Ti na kotou fakaapele okoutou fale ki nea ala na kotou kaia i le kau mativa !

¹⁵ E folafola le Aliki, le Eteleno o kau tau : Ko ai na pati ke kotou takatakafi loku kakai, Ti ke kotou fakavelivelii ia le kau mativa ?

¹⁶ E folafola le Eteleno : O tupu e fia nealasi a taineliki o Sione, Ti e lotou saele o fakatuu sako olotou ulu, Talie e lotou mata mamalu, Ti e lotou ano soposopo ke fakatatagi ai a matemate o olatou vae,

¹⁷ E fakaliliu loa e le Eteleno ke tula a tumuaki o ulu o taineliki o Sione, Ti e fakasa loa e le Eteleno lolatou telefua.

¹⁸ I le aso lena, e too loa e le Aliki a matemate ala e teuteu ai olatou vae, Ti mo pine o olatou ulu, mo kasoa tiloata ;

¹⁹ Mo sasau, mo matemate o lima, ti mo pulou ;

²⁰ Mo pala, mo tini o vae, mo kilipipi ; Mo fagu kaloni, ti mo fakatata ulufaga liliki ;

²¹ Mo mama, ti mo matemate o isu ;

²² Mo kofu fulumalilie, ti mo kofu loloa, Mo taupulupulu, ti mo taga ;

²³ Mo tiloata tilotilo, ti mo kofu maninifi, Mo kie sai o ulu, ti mo kie sai o ua.

²⁴ E fetogi loa le kaloni ki le namuku ; Ti e fetogi loa le kilipipi ki le maea ; E fetogi loa a lauulu ki ulu tula ; E fetogi loa le taupulupulu lasi ki se taga ikiiki ; Ti e liliu loa a mata fulumalie ko ni mata fefe.

²⁵ E mamate loa au tagata i le seleta, Ti e mamate loa au tagata toa i le tau.

²⁶ E fetagisi loa a matapa o Sione ti e lotou mamae loa ; Ti e tonatona telefua loa Sione i le kele.