Esaia 29 - Tosi Tapu

Folafola kikite ki Selusalemi

¹ Malaia kia Aliele, kia Aliele ! Le kolo leia na fai e Tavite ko lona nofoaga ! Kotou fakalasi le fetuu ki le fetuu ; Kotou tuku ke sosolo a aso lalasi i fetuu fuli.

² Ti e kau taui loa a koe, Aliele ; Ti e ke tagi loa mo mamae loa ; Ti e fai loa le kolo kiate au pe se Aliele.

³ E kau takatakai ia loa a koe i potu fuli, E kau tapotapono ia loa a koe ki ni nofolaga solia, E kau fai loa ni kolo tau ke taui ai a koe.

⁴ E tuku loa a koe ki lalo, ti e ke masau loa mei le kele ; Ti e taomia loa lou leo i le efu ; E ulu loa lou leo mei le kele ofaipe se leo o se tuuola, Ti e ke fakamumusu loa au masau mei le efu.

⁵ E fai loa le api o ou fili pe se ao efu, Ti e fai loa le kau solia api lena pe se tuuga penu leia kua mavetevete i le matagi. Kae e soko fakapunamauli loa le nea leinei i le temi e tasi :

⁶ E gaoi loa le Eteleno o kau tau kiate koe i le gugulu o le mana, mo le mafuike, mo se logoa fakaii, Mo le sasataki ti mo le afa, Ti mo le ula o se afi veli.

⁷ Ti ko puleaga mauke ala na tau kia Aliele, Latou fuli ala na oso kiate ia mo lona kolo tau, Latou ala na fakamamae ia a ia, E fai loa pe se moe miti, pe se nea leia na tio ki ai i le pouli.

⁸ Ti ko puleaga mauke ala na au loa o taui le mauga o Sione, E fai loa pe se tagata leia e fia kai Ti e moe miti e kai a ia, Kae e ala ake a ia mo lona manava e pakupaku, Pe leia e fia inu e moe miti e inu, Kae ala ake a ia, e gaegae mo malo aifai lona fatakia.

Ko tupuaga o tautea

⁹ Ke kotou ofolele ti ke kotou fakaualoa ! Ke kotou tapono okoutou mata ti ke kotou liliu o kivi ! E lotou konana, kae e leaise tupu ko le vino ; E lotou titipa, kae e leaise tupu ko kava makeke.

¹⁰ Talie kua liligi e le Eteleno kia koutou se laumalie o le tulemoe ; Ti kua tapono e ia okoutou mata, kau polofeta, Ti kua puloui e ia okoutou ulu, kau faikikite.

¹¹ Kua fai le levelasio katoa kia koutou pe ni kupu o se tosi kua fakamau, Lei e soli ki se tagata poto i le lautosi, o pati kiate ia : Lau le nea lena ! Kae tali a ia : E leaise kau mafai a ia, Talie kua fakamau a ia.

¹² Pe se tosi leia kua soli ki se tagata leia e leaise poto i le lautosi, o pati kiate ia : Lau le nea lena ! Kae e tali a ia : E leaise kau poto i le lautosi.

¹³ Koia e pati ai le Aliki : Ka fakafeofi mai le kakai leinei kiate au, E fakamauiga e ia au i lona gutu mo ona laugutu ; Kae e mamao lona loto iate au, Ti ko le i leia e maua e ia kiate au Ko se pelesepeto o le talatisio a le tagata.

¹⁴ Koia e kau toe taai ai loa le kakai leinei Ki ni nea fakatalatupua mo ni milakulo ; Ti e puli loa le poto o lona kau poto, Ti e puli loa le atamai o ona kau tagata atamai.

¹⁵ Malaia kia latou ala e fufu ia alatou fakatuutuu, Ke aua na tio ki ai le Eteleno, Malaia kia latou ala e fai ia alatou gaoi i le fakapouli, O pati : Ko ai e tio mai kia tatou ti ko ai e iloa ia tatou ?

¹⁶ E maoki ai lokoutou fakalialia ! Pe tonu ke fakatatau le tagata faiipu mo le kele kula, Ke pati le gaoiaga ki le tagata gaoi : Na leaise fai e ia a au ? Ke pati ai le ipu ki le tagata faiipu : E leai sona atamai ?

Fakapapau ki Iselaele

¹⁷ Koi toe fua se ga temi ikiiki, Ti e liliu loa le Lipane ko se faisaga laakau fua, Ti e liliu loa le faisaga laakau fua ko se vaomatua.

¹⁸ I le aso lena, e logo loa le kau tulituli ki folafola o le tosi ; Ti e tio loa a mata o le kau kivi, Talie kua fakamauli latou i le fakapouli mo le pouli.

¹⁹ E fiafia loa le kau fakaaloalofa i le Eteleno, Ti e nekenekea loa le kau mativa o tupu ko le Sagato o Iselaele.

²⁰ Talie e puli loa le tagata agamakeke, ti e gato loa le tagata gologolo, Ti e tamate loa latou fuli ala na lalama ke fai ia le agaveli,

²¹ Latou ala na tuku ia ni sala ki ni iki i le fakamaauaga, Na fai ia ni masele ki tui fakamaau i le matapa, Ti na fakatua noa ia leia e mea.

²² Koia e folafola ai le Eteleno ki le fale o Sakopo, Leia na totogi ia Apalaamo : I le aso nei, e leaise toe luma loa Sakopo ; I le aso nei, e leaise toe mamae loa ona mata.

²³ Talie, ka tio loa ana fanau ki le gaoiaga o oku lima i loto malie o latou, E lotou tapuaki loa ki loku suafa, E lotou tapuaki loa ki le Sagato o Sakopo, Ti e lotou i loa ki le Atua o Iselaele ;

²⁴ Ko latou ala na sese olatou loto e maua ia loa le atamai, Ti ko latou ala na gugu e maua ia loa le akonaki.