Esaia 28 - Tosi Tapu

Folafola fakamalaia ki Efalaimi

¹ Malaia ki Samalia, le pala fulumalie o le kau konana o Efalaimi ! Malaia ki le fa se gini, leia e fulumalie ia lona kofu, Leia e piki i le tumutumu o le vaivailiua kele mauli o latou ala e konana !

² Ko leinei se tagata lasi mo makeke e au mei le Aliki, Ofaipe se ua fatu, se sasataki maumau, Ofaipe se afa leia e fakatupu ia ni tafe makeke : E fakato e ia a ia ki le kele i le makeke katoa.

³ E takatakafi loa a ia ki vae, Le pala fulumalie o le kau konana o Efalaimi ;

⁴ Ti ko le fa se gini, leia e fulumalie ai lona kofu, I le tumutumu o le vaivailiua kele mauli, E fai loa pe se fa fiki tomua leia e sa i mua o le temi tau o fiki, Leia e taui e le lima o folo aifai.

⁵ I le aso lena, e liliu loa le Eteleno o kau tau Ko se pala gigila, ti ko se teu fulumalie Ki le toetoega o lona kakai,

⁶ Ko se laumalie o le faitotonu ki leia e ekeeke i le ekeekeaga o le faitotonu, Ti ko se makeke kia latou ala e kapu ia le fili i mua o matapa o le kolo.

⁷ Kae ko latou foki, kua lotou sisiga i le vino, Ti kua lotou ninimo o tupu ko kava makeke ; Kua sisiga a tagata faisakilifisio mo polofeta i kava makeke, Kua pule le vino kia latou ; Kua lotou maua ni ninimo o tupu ko kava makeke ; Kua lotou sisiga i le faikikite, Kua lotou matuletule i le fai fakamaau.

⁸ Kua apele olatou laupapa kai fuli i lulua, mo penu ; E leaise koi mea se ganea.

⁹ E lotou pati : Ko ai leia e loto Esaia ke ako ki ai le poto ? Ko ai leia e ke loto ke tuku ki ai ni akonaki ? Pe ki ni uviki toe ala nao puaki fua, Pe ki ni toe ala nao too mai fua mei le u o le tinana ?

¹⁰ Talie kua tuku se pelesepeto ki se pelesepeto, se pelesepeto ki se pelesepeto ; Se lekula ki se lekula, se lekula ki se lekula ; Se nea noa i leinei, se nea noa i leia.

¹¹ Io, i ni tagata e laugutu valelea Ti e masau faikese, E folafola ai loa le Eteleno ki le kakai leinei.

¹² Na pati a ia kiate ia : Ko leinei le maloloaga, Kotou tuku ke malolo leia kua gaegae ; Ko leinei le ganea malolo ! Kae na leaise lotou fia fakalogo fua.

¹³ Kia latou, ko le folafola a le Eteleno e liliu loa Ko se pelesepeto ki se pelesepeto, ko se pelesepeto ki se pelesepeto ; Ko se lekula ki se lekula, ko se lekula ki se lekula ; Ko se nea noa i leinei, ko se nea noa i leia, O tupu ke lotou sisiga o fatifati mo ka lotou saele, O tupu ke visia olatou vae ti ke lotou pikiia ai.

¹⁴ Koia ke kotou fakalogo mai ki le folafola a le Eteleno, kau gologolo, Koutou ala e pule ki le kakai leinei o Selusalemi !

¹⁵ E kotou pati : kua motou fai se sai mo le mate, Kua motou fai se fakapapau mo le nofoaga o le kau mate ; Ka mapaa mai loa ki fafo le malaia, e leaise lave mai loa a ia kia matou ; Talie ko lomatou solaaga ko le kaka, ti ko lomatou mumuniaga ko le loi.

¹⁶ Koia e folafola le Aliki, le Eteleno, o pati : Ko leinei, kua kau teki se fatu fakatafito i Sione, Ko se fatu kua asiasii, ko se fatu agele mauiga, na teki fakamaumau ; Ko leia e tui kiate ia e fefeka o tatau mo ia.

¹⁷ E kau fai loa ki le loto sako se lekula, Ti mo le maokioki se nivo ; Ti e maumaui loa e le ua fatu le solaaga o le kaka, Ti e lofia loa i le vai le mumuniaga o le loi.

¹⁸ E maumaui loa lakoutou sai mo le mate, Ti e leaise toe tuu loa lakoutou sai mo le nofoaga o le kau mate ; Ka mapaa mai loa le malaia, E takatakafi loa e ia koutou ki ona vae.

¹⁹ I temi fuli e mapaa ai loa a ia, e kukumi loa e ia koutou ; Talie e natu loa a ia i usu fuli, i le ao mo le pouli ; Ti ko le logo fai ki lona gugulu e fakatupu ia le i lasi.

²⁰ Talie e fai loa pe le pati a le taagapati : E toetoe le palepale ke moe ai, Ti e lau ikiiki le kie kafu ke kafu ai.

²¹ Talie e tuu loa le Eteleno ki aluga ofaipe lana tuu ki aluga i le mauga o Pelatesimi ; E ita loa a ia ofaipe lana ita i le vaivailiua o Kapaone ; Ke fakasoko lana gaoi, lana gaoi faikese, Ke fakasoko lana gaoi, lana gaoi fakatalatupua.

²² Koia, i le aso nei, aua na kotou gologolo, Ke aua na toe fakamakeke okoutou sai ; Talie ko le maumaui o le fenua katoa kua oki i le fakapapau ; Na kau iloa le nea lena mei le Aliki, le Eteleno o kau tau.

Folafola fakatata o le tagata gaoi kele

²³ Fakalogo mai okoutou taliga, ti kotou fakalogo mai ki loku leo ! Kotou tokaga, ti koutou fakalogo ki laku folafola !

²⁴ Ko leia e laga ia le kele ke to ai le pulapula, pe laga a ia o lee gato ? Pe fakamavaa ti mo fakamaluu e ia le kele o lee gato ?

²⁵ Ka oki lana fakatokatoka le kele, Pe leaise laku loa e ia le niele ti e muluki loa e ia le kumini ? Pe leaise to fakaatu loa e ia le fulumeto, Mo le olese ki se ganea kua fakamailoga, Ti mo le epote i tafatafa ?

²⁶ Talie na ako e lona Atua kiate ia le saele leia e tonu ke mulimuli ai, Ti na tuku e ia kiate ia ana akonaki.

²⁷ E leaise taomi le niele ki le nea fakamaluu kele ; Ti e leaise ano le teka o le saliote i aluga o le kumini ; Kae e sasa le niele ki le laakau, Ti mo le kumini ki le tokotoko.

²⁸ E ta le fulumeto, Kae e leaise sasa loa a ia o lee gato. E tule ki ai le fa teka o le saliote mo osi, Kae e leaise laliki a ia.

²⁹ E au foki le nea lena mei le Eteleno o kau tau ; E fulumalie ai ana fakatuutuu, ti e lasi ai lona poto.