Esaia 27 - Tosi Tapu

Ko le toe laga o Iselaele

¹ I le aso lena, e taai loa e le Eteleno ki lana seleta lasi, mo fakaii, mo makeke, Le leviatane, gata kaikivao, Le leviatane, gata pikopiko ; Ti e tamate loa e ia le talakone leia e nofo i le tai.

² I le aso lena, Ke kotou sua se katiko o le vite.

³ Ko au le Eteleno, ko lona tagata taupau : E kau fakavai a ia i temi fuli ; Ti e kau leoleo a ia i le ao mo le pouli, Ke aua na maumaui a ia e se tasi.

⁴ Kua oki loku ita ; Kae kapau e tonu ke kau taui a vao veveli mo vao sukisuki, E kau taui loa latou, ti e kau tutu fakatasi loa latou i le afi.

⁵ Kae kapau e lotou too au ko se mumuniaga, Ti kapau e lotou afa le tokamalie mo au, Io, mo kapau e lotou afa le tokamalie mo au, Ti e leaise kau tutu loa latou.

⁶ I temi ka au, e tauaka loa Sakopo, E toe sosomo loa ni se i Iselaele ti mo ni uli, Ti e fakaapele loa e ia le malama nei ki ona fua.

⁷ Pe na taai e le Eteleno a Iselaele, ofaipe lana taai latou ala na taai ia a ia ? Pe na tamate e ia ofaipe lana tamate latou ala na tamate ia a ia ?

⁸ Leai ! Na ke fakafuafua lona tautea i lona ave fakapopula, I lona ave e le matagi fakaii o le potu esite.

⁹ Koia na fakamolemole loa i ai le agasala a Sakopo, Ti ko leinei le fua o le fakamolemole o lana agasala : Kua fakaliliu e le Eteleno a fatu fuli o aletale Ke tatau mo ni fatu lase ala kua efu ; Ti e leaise toe fakatuu ake loa ki aluga a taulaatua o Asetalate mo fakatata o le laa.

¹⁰ Talie kua tuu toka tasi le kolo tau, Ti kua liliu a ia ko se nofoaga kua tiaki noa mo lavaki ofaipe se toafa ; E kai mutie i ai le uviki pipi, e moe a ia i ai, ti e kai lau laakau a ia i ai.

¹¹ Ka malo a laa o laakau, e fati latou ; E au a fafine o tutu latou. E maoki ko se kakai sala atamai a ia : Koia na leaise alofa ai kiate ia leia na fakatupu ia a ia, Ti na leaise fakamolemole ai kiate ia leia na fau ia a ia.

¹² I le aso lena, E luui loa e le Eteleno ni fua, Mei le vaitafe o Eufalate o kaku ki le vaitafe o Esipito ; Ti e tae loa koutou fakataki tasi, fanau o Iselaele !

¹³ I le aso lena, e pupusi loa le fakatagi pupusi lasi, Ti e toe liliu mai loa latou ala na ave popula ki Asilia, Pe na sosola ki Esipito ; Ti e lotou su loa ki le Eteleno, I le mauga maokioki, i Selusalemi.