Esaia 25 - Tosi Tapu

Ko fakafetai ki le Eteleno

¹ Ei Eteleno ! ko koe ko loku Atua ; E kau fakavikiviki loa kiate koe, e kau sua loa lou suafa, Talie kua ke fai ni nea fulumalilie ; Kua soko katoa au fakatuutuu i mua.

² Talie kua ke fakaliliu le kolo ko se tuuga fatu, Le kolo tau ko se tuuga fale maumau ; Kua maumau le kolo tau o le kau pagani, E leaise toe laga loa a ia i se aso.

³ Koia e fakakololia ai kiate koe a kakai makeke, Ti e i ai kiate koe a kolo o puleaga makeke.

⁴ Talie na ke liliu ko se tokoi ki le tagata gaegae, Ko se mumuniaga ki le tagata mativa i le mamae, Ko se ulufaga i le afa, Ko se malu i le vevela ; Talie e tatau le tukumanava o le kau tukipo Mo le sasataki leia e taai ia se paa fatu.

⁵ Na ke aga o taofi le logoa a le kau pagani Ofaipe lau aga o taofi le vevela i se kele kaka ; Ofaipe le taofi o le vevela e le malu o se ao, Na ke aga foki o taofi a sua o le malo a le kau tukipo.

⁶ Kua teuteu e le Eteleno o kau tau ki kakai fuli, i le mauga leinei, Se kaitasi o ni nea kai malilie, Se kaitasi o ni vino matua, Mo ni kanoi manu malilie mo gako, Mo ni vino matua, kua mea malie.

⁷ Ti e maumaui loa e ia, i le mauga lena, le kie leia e pulou ia a kakai fuli, Le kie kafu leia e uufi ia a atu puleaga fuli.

⁸ E folo loa e ia le mate o talu oki ; Ti e solosolo loa e le Aliki, le Eteleno, a loimata i mata fuli ; Ti e fakapuli loa e ia i le fenua katoa le luma o lona kakai ; Talie kua masau le Eteleno.

⁹ I le aso lena e pati loa : Ko leinei, ko lomatou Atua, leia e motou fanaki ki ai, Ti ko ia leia e fakamauli ia matou ; Ko le Eteleno leia e motou fanaki ki ai ; Ke tou nekenekea, ti ke tou fakafiafia i lana fakamauli !

¹⁰ Talie e malolo le lima o le Eteleno i le mauga leinei ; Ti kua takatakafi a Moape i lona tuuaga, Ofaipe le takatakafi o ni penu i le popoko penu.

¹¹ I loto o le popoko lena, e falo e ia ona lima, Ofaipe se tasi leia e kakau ; Kae e taai loa e le Eteleno ki lalo lona fia nealasi, Ti e maumaui loa e ia a gaoi kaka o ona lima.

¹² E sigai loa e ia, ti e maumaui loa e ia a kaua fatu taualuga ala na malui ia a koe Moape, Io, e laku loa e ia latou ki le kele, o kaku ki le efu.