Esaia 24 - Tosi Tapu

Ko le fakamaau o le malama nei katoa

¹ Ko leinei, kua maumaui e le Eteleno le fenua, o fakaliliu a ia ko se toafa ; Kua fakamaveuveu e ia le malama nei, ti kua fakamavetevete e ia lona kakai.

² Ti kua fai fakatatau ki le tagata faisakilifisio mo le tagata noa, Ki le pule mo le tagata fakasausau, Ki le fafine aliki mo le fafine fakasausau, Ki leia e fakatau ia mo leia e totogi ia, Ki leia e soli maua mo leia e too maua.

³ Kua maumaui le fenua, ti kua kaia a ia ; Talie kua fakatotonu a ia e le Eteleno.

⁴ Kua mamae le fenua, ti kua gaegae a ia ; Kua mamae le kakai ti kua masamasaki ; Kua sala makeke a pule o le kakai.

⁵ Na fakakelekele le fenua e lona kakai ; Talie na lotou maumaui a lao, ti na lotou fetogi ia a fakatotonu, Na lotou maumaui le sai lee gato.

⁶ Koia kua kai le fenua e le malaia, Ti kua amo e lona kakai le tua o alatou agasala ; Koia e mamate ai a kakai o le fenua, Kae toe fua se ga toka teiki.

⁷ Kua mamae le vino foou, ti kua gae le vite ; Kua mamae latou fuli ala na loto fiafia.

⁸ Kua gato le fiafia o nafa, Kua oki le fiafia logoa, Kua gato le fiafia o le alepe.

⁹ E leaise koi sua i le inu o le vino ; Ti kua kona a kava makeke ki le tagata inu.

¹⁰ Kua maumau le kolo lavaki ; Ti kua maponopono a fale fuli, e leaise koi ulu ki loto.

¹¹ E taukalaga i ala, talie e leaise koi maua se vino. Kua pupuli a fiafia fuli, Kua mavae le nekenekea i le fenua.

¹² Kua nofo le maumau i le kolo, Ti kua popo a matapa, ala na maumaui.

¹³ Talie kua tatau i le fenua mo loto malie o kakai, Pe ka oki le olive i le lu, Pe ka oki le vite i le tau, E leaise toe se nea.

Ko le fiafia o le toetoega o Iselaele

¹⁴ Kua lotou too se sua, kua lotou fai ni kalaga nekenekea ; Kua lotou fakavikiviki ki le mafimafi o le Eteleno i mata tai.

¹⁵ Koia ke kotou fakakololia ki le Eteleno i ganea fuli ala e mu ai le malama, Io, ki le suafa o le Eteleno, le Atua o Iselaele, i atu motu o le tai !

¹⁶ E motou logo ki se sua mei le potupotu o le malama nei : Kololia ki le Atua faitotonu ! Kae ko au e kau pati : Kua kau puli ! kua kau puli ! malaia kiate au ! Kua kaia le kau kaia ; kua kaia ki le mate le kau kaia.

¹⁷ Ko le i, mo le popoko, ti mo le masele, Kua vilo kiate koe, kakai o le fenua !

¹⁸ Ko leia e sola i mua o kalaga fakaii kua vilo ki le popoko ; Ti ko leia e toe pale ake i le popoko kua pikiia i le masele ; Talie kua mavaa a matapa o le lagi, Ti kua galulu a fakatafito o le malama nei.

¹⁹ Kua mafaa le kele, Kua matuletule le malama nei, Kua siga a ia ki lalo.

²⁰ Kua matuletule le malama nei ofaipe se tagata kona, Kua matule a ia ofaipe se fale pola ; Kua taomi a ia e lana agasala, Kua siga a ia ki lalo, Ti e leaise toe tuu ake a ia ki aluga.

²¹ I le temi lena, e tautea loa e le Eteleno i le lagi le kau tau o aluga, Ti mo sau o le malama nei i le malama nei.

²² E lotou fakatasi fuli loa ofaipe se kau popula i se fale pilisoni, Ti e tapono loa latou i ni kogafale pilisoni. Ti, ka oki loa ni aso mauke ai, E tonu ke tautea loa latou.

²³ E apele loa le masina i le luma, Ti mo le laa i le matagafua ; Talie e sau loa le Eteleno o kau tau i le mauga o Sione ti mo Selusalemi. E gigila loa lona kololia i mua o lana kau matua.