Esaia 22 - Tosi Tapu

Folafola kikite ki Selusalemi

¹ Folafola a le Atua ki le vaivailiua o tio. Kolea kua soko kiate koe, ke pale ai lou kakai katoa ki ato o fale ?

² Kolea kua ke logoa ai, ti kua ke maveuveu ai, A koe ko le kolo fiafia ! E leaise mamate loa ou mate i le seleta, E leaise lotou mamate loa i le tau.

³ Kua sosola fakatasi ou pule fuli, Ti kua fakapilisoni latou e le kau faikalolo ; Kua fakapilisoni lou kakai i le temi e tasi, Tatau mo latou ala na sosola ki mamao.

⁴ Koia e kau pati ai : Kotou ave kese okoutou mata iate au, Kotou tuku au ke tagi i loku mamae ! Aua na kotou afa ke fakapelepele au I le maumaui o le taine o loku kakai.

⁵ Talie i le aso nei, kua tuku mai kia matou e le Aliki, le Eteleno o kau tau, Le mamae, mo le lava, ti mo le luma. I le vaivailiua o tio kua maumaui a paa, Ti kua kaku a tagi fakaaloalofa ki le mauga.

⁶ Kua amo e Elame le taga gasau ; Kua au ni saliote mo ni kau tagata tau, mo ni kau tagata ekeosi ; Kua too e Kile lana paletau.

⁷ Kua apele lou vaivailiua fulumalie i saliote tau, Ti kua fakaatu le kau solia ekeosi i mua o ou matapa.

⁸ Ku leaise koi i ai se solaaga fakaoki o Suta. I le aso lena e ke fakatele loa ki masafu o le fale o le vaomatua.

⁹ E kotou tio loa ki le lasi o pu ala na fai ki le kolo o Tavite, Ti e kotou taofi loa a vai o le fa tane lalo.

¹⁰ E kotou lau loa a fale o Selusalemi, Ti e kotou soloi loa ki lalo ni iki ke fakamakeke ai a paa o le kolo.

¹¹ E kotou fau loa se tanakiaga vai i le vasa o paa e lua Ke tanaki ai a vai o le fa tane afea. Kae e leaise kotou tagaki loa ki leia na fakataga ia a nea ana, E leaise kotou tio loa ki leia na teuteu ia a nea ana talu mei mamao.

¹² I le aso nei e kalaga atu kia koutou le Aliki, le Eteleno o kau tau, Ke kotou fetagisi mo pa okoutou fatafata, Ke kotou tele okoutou ulu ti mo tui le taga.

¹³ Kae ko leinei kua kotou katakata ti kua kotou fiafia ! Kua tamate ni pipi tagata mo ni ovi ; Kua kai ni inati ti kua inu le vino : Tou kakai ti tou iinu, talie e tou mamate loa apogipogi !

¹⁴ Na fakasa mai a ia kiate au e le Eteleno o kau tau : E maoki, e leaise fakamolemole loa le agasala lena kia koutou i mua o lokoutou mamate, E pati le Aliki, le Eteleno o kau tau.

Ko le fetogi o Sepa e Eliakimi

¹⁵ Ko leinei le pati a le Aliki, le Eteleno o kau tau : Ano le tagata tausi koloa lena, Kia Sepa, kovana o le fale sau :

¹⁶ Pe i ai sau nea i leinei, ti ko ai leia e ke maua ia i leinei, Ke ke kenu ai se tanuma i leinei ? Talie kua kenu e ia sona tanuma i le ganea taualuga, Ti kua ta e ia sona nofoaga i le utu !

¹⁷ Ko leinei, e ti loa a koe e le Eteleno ki mamao ; Ti e takatakai loa e ia a koe ofaipe se fa taula,

¹⁸ E tekai loa e ia a koe, io, e tekai loa e ia a koe ofaipe se fa fitipolo Ki se kele lau lasi. I lena e ke mate ai loa, i lena e tuku ai loa au saliote fulumalilie, A koe ko le lumaaga o le fale o lou pule !

¹⁹ E kau kapu loa a koe i lou tuulaga, E taaki loa a koe e le Eteleno i lou nofoaga.

²⁰ I le aso lena, E kau kalagai loa laku tagata fakasausau ko Eliakimi, vosa o Ilekisa ;

²¹ E kau fakatui loa kiate ia lou kofu loloa, ti e kau toi loa lou kilipipi kiate ia, Ti e kau tuku loa lau pule ki ona lima : E liliu loa a ia ko se tamana ki le kakai o Selusalemi mo le fale o Suta.

²² E kau tuku loa ki lona tuauma le kalavi o le fale o Tavite : Ka fakamavaa loa e ia, e leaise toe tapono loa e se tasi ; Ka tapono loa e ia, e leaise toe fakamavaa loa e se tasi.

²³ E kau tutuki fakamaumau loa a ia ofaipe se fao i se ganea makeke, Ti e liliu loa a ia ko se ekeekeaga fakakololia o le fale o lona tamana.

²⁴ E liliu loa a ia ko le tautauaga o le kololia katoa o le fale o lona tamana, O uli malilie mo uli veveli, O ipu liliki fuli, O pesini mo kulo.

²⁵ I le aso lena, e pati le Eteleno o kau tau, E too loa le fao leia na tutuki fakamaumau i se ganea makeke, Ti e taai loa a ia o vilo ki lalo, Ti e maumau loa le kavega leia na tau i ai, Talie kua folafola le Eteleno.