Esaia 21 - Tosi Tapu

Ko le vilo o Papilone

¹ Folafola a le Atua ki le toafa o le tai. Ofaipe le malaga a le sasataki mei le potu saute, E au a ia mei le toafa, mei le fenua fakaii.

² Kua fakatio au ki se nea fakaii. Kua fakaveliveli le tagata fakaveliveli, ti kua maumau le tagata maumau. Ei Elame, ke ke pale ! Ei Meti, ke ke takatakai le kolo ! Talie kua kau fakagato ai lona fia nealasi !

³ Koia kua kau logoi ai le mamae o oku vakavaka. Kua kau maua e ni mamae, Ofaipe ni mamae o se fafine leia kua laga lona ganea. Ku leaise koi logo oku taliga, o tupu ko le tautau laga o oku mamae, Ti e leaise koi tio oku mata i loku lulu.

⁴ Kua gaegae loku loto, Ti kua kau lulu i loku i ; Kua liliu le pouli o oku fiafia ko se pouli fakaii.

⁵ Kua teuteu le laupapa kai, kua leo le kau leo, kua kai mo inu… : Ki aluga, kau pule ! Kotou takai lolo a paletau !

⁶ Talie ko leinei le folafola leia na tuku mai kiate au e le Aliki : Ano, o fakanofo le tagata leo ki lona tuuaga ; Ke fakasa e ia le nea leia e tio loa a ia ki ai.

⁷ Kapau e tio loa a ia ki se saliote tau leia e toso e ni osi, Mo se fanoga o ni kau asino, mo se fanoga o ni kamelo, Ke tokaga loa le tagata leo, io, ke tokaga lasi loa a ia.

⁸ Ti na kalaga loa le tagata leo ofaipe se laione : Aliki, e kau tuu i le tule leo i le aso katoa, Ti e kau nofo i loku tuuaga i le po katoa.

⁹ Ti ko leinei, kua au se tagata i se saliote leia e toso e ni osi ! Ti kua fakamavaa e ia lona gutu, o kalaga : Kua vilo a ia, kua vilo a ia, a Papilone, Ti kua fatifati a fakatata fuli o ona atua i le kele !

¹⁰ Ei loku kakai, leia na ta ofaipe le ta o le fulumeto i le taaga fulumeto, Ko le nea leia na kau ako mei le Eteleno o kau tau, Atua o Iselaele, Na kau fakasa a ia kia koutou.

Folafola kikite ki Etome mo Alapia

¹¹ Folafola a le Atua ki Tuma. E kalaga mai kiate au mei Seili : Tagata leo, kolea lau pati o uiga mo le pouli ? Tagata leo, kolea lau pati o uiga mo le pouli ?

¹² Ti e tali le tagata leo : E au le usu, ti mo le pouli foki. Kapau e kotou fia vesili, kotou vesili ; Kotou tafoki, ti kotou toe au.

¹³ Folafola kikite ki Alapia. E kotou momoe loa i le pouli i uluvao o Alapia, Koutou ko le kakai fanoga o Tetani !

¹⁴ Kotou ave se vai kia latou ala e fia inu ; E ave e le kakai o le fenua o Tema Se pane kia latou ala e sosola.

¹⁵ Talie e lotou sosola i mua o seleta, I mua o le seleta telefua, i mua o le kalolo kua fakamakona, I mua o se tau kua vevela.

¹⁶ Talie kua folafola mai le Aliki kiate au : Koi toe fai se fetuu e tasi, ofaipe fetuu o se tagata solia totogi, Ti e gato loa le kololia katoa o Ketale.

¹⁷ E toe loa se ga toka teiki fua o le kau faikalolo makeke o vosa o Ketale, Talie kua folafola le Eteleno, le Atua o Iselaele.