Esaia 20 - Tosi Tapu

Ko le kau Esipito mo le kau Etiopia e popula loa ki Asilia

¹ I le fetuu leia na ano ai Taletane, leia na kakau e Salekoni, sau o Asilia, o taui a Asetoti o too,

² I le temi lena na folafola le Eteleno kia Esaia, vosa o Amotesito, o pati kiate ia : Ano, o tatala le taga mei lou vakavaka ti mo ou taka mei ou vae. Na fai loa a ia ki ai, ti na ano telefua loa a ia, mo saele kilii vae.

³ Ti na pati loa le Eteleno : ofaipe le saele telefua mo kilii vae a laku tagata fakasausau ko Esaia, e liliu loa le nea lena, mo ka sili ni fetuu e tolu, ko se fakamailoga o le nea leia ka soko loa ki Esipito mo Etiopia.

⁴ E ave popula fenaaki loa e le sau o Asilia mei Esipito mo Etiopia a tagata tupulaga mo matua, ala e saele telefua loa mo saele kilii vae loa, ti e fakatekateka loa olatou tua : ko se luma a ia ki Esipito !

⁵ I le aso lena, ko latou ala na tuku lalatou fanaki ki Etiopia ti mo latou ala na viki ia le makeke o Esipito, e nonofo loa i le i mo le luma.

⁶ Ti e pati loa le kakai o le potu tai lena i le aso lena : Ko le ikuaga loa leinei o atatou amanaki malie ! Na tou fanaki ke tokoi mai a ia kia tatou, ke saofaki e ia tatou mei le sau o Asilia ! Ti e feaki loa lotatou sao ?