Esaia 2 - Tosi Tapu

Kololia o Selusalemi i le temi ki muli

¹ Folafola kikite a Esaia, vosa o Amotesito, ki Suta mo Selusalemi.

² E soko loa, i aso fakamuli, E fakatuu loa le mauga o le fale o le Eteleno I le tumutumu o mauga, Ti e malaga loa a ia i aluga o mauga liliki, Ti e tau mai loa ki ai a atu puleaga fuli.

³ E ano loa ki ai ni kakai toka api ti e lotou pati loa : Kotou au, ti ke tou pale fakatasi ki le mauga o le Eteleno, Ki le fale o le Atua o Sakopo, O tupu ke ako mai e ia kia tatou ona ala, Ti ke tou saele i ona ala liliki. Talie e au loa mei Sione le Lao, Ti mei Selusalemi le folafola a le Eteleno.

⁴ E liliu loa a ia ko le tui fakamaau o atu puleaga, Ko le alepiti o ni kakai toka api. E lotou fai loa ni piosi ki alatou seleta, Mo ni sele gaoi ki alatou tao : E leaise toe tau loa se puleaga ki se puleaga, Ti e leaise toe ako loa le tau.

⁵ Fale o Sakopo, Kotou au, ti ke tou saele fakatasi i le malama o le Eteleno !

Ko le tautea o latou e tausi ki taulaatua ti mo latou e fia taualuga.

⁶ Talie kua ke tiaki maoki lou kakai, le fale o Sakopo, O tupu kua lotou apele i nea o le potu esite, Ti kua lotou faikikite ofaipe le kau Filisitini, Ti kua lotou avaga ki vosa o le kau matapule.

⁷ Kua apele le fenua i le siliva mo le aulo, Ti kua i ai a koloa kesekese. Kua apele le fenua i osi, Ti e leaise koi lau a saliote.

⁸ Kua apele le fenua i taulaatua ; Kua lotou punou i mua o le gaoiaga o olatou lima, I mua o le nea leia na fau e olatou maikao.

⁹ Koia e tamatamate loa a kau seka, ti e tuku loa ki lalo a kau lalasi : Talie e leaise ke fakamolemole loa kia latou.

¹⁰ Ke ke ulu ki ana o utu, Ti ke ke mumuni i le efu, O tupu ke ke sao i le sausau o le Eteleno Ti mo le makeke o lona agai.

¹¹ E tuku loa ki lalo le tagata fia nealasi, Ti e tuku loa ke taulalo leia e fia taualuga ; Kae e siki loa ki aluga le Eteleno toka tasi i le aso lena.

¹² Talie e i ai loa le aso o le Eteleno o kau tau Ki tagata fuli ala e fia taualuga mo fia nealasi, Kia latou fuli ala e fia malaga ki aluga, o tupu ke tuku latou ki lalo ;

¹³ Ki sete fuli o Lipane, ala e sasako mo taualuga, Ti mo sene fuli o Pasani ;

¹⁴ Ki mauga taualuga fuli, Ti mo mauga liliki fuli na malaga ki aluga ;

¹⁵ Ki tule taualuga fuli, Ti mo kaupa makeke fuli ;

¹⁶ Ki vaka faikoloa fuli o Talesisi, Ti mo nea fuli ala e fulumalie ki le mata.

¹⁷ E tuku loa ki lalo le tagata fia nealasi, Ti e fakataulalo loa le tagata fia taualuga : Kae e siki loa ki aluga le Eteleno toka tasi i le aso lena.

¹⁸ E pupuli loa a taulaatua fuli.

¹⁹ E ulu loa ki ana o utu, Ti mo loloto o le kele, O tupu ke lotou sao i le sausau o le Eteleno ti mo le makeke o lona agai, Mo ka tuu ake loa a ia o fakaii le malama nei.

²⁰ I le aso lena, e tiaki loa e tagata Olatou taulaatua siliva mo olatou taulaatua aulo, Ala na lotou fau ke lotou atolasio ki ai, ki kimoa mo pekapeka ;

²¹ Kae lotou ulu loa ki mafaa o utu Ti mo pu o fatu, O tupu ke lotou sao i le sausau o le Eteleno ti mo le makeke o lona agai, Mo ka tuu ake loa a ia o fakaii le malama nei.

²² Kotou fakagato la le tuku o lakotou fanaki ki le tagata, Leia e fakalogo lona mauli ki lana tukumanava : Talie kolea lana nea e mafai ?