Esaia 18 - Tosi Tapu

Ko le malaia o Etiopia

¹ A koe, ko le fenua leia e fetati ai a masafu, I leia atu fetuu o vaitafe o Etiopia !

² A koe leia e kakau ia i le tai ni tagata avelogo I ni vaka kofe ala e tele i le tai i ni la ! Kotou ano, kau tagata avelogo gasolo, ki le puleaga tagata makeke mo lalasi, Ki le kakai fakaii lena talu mei lona tupu, Ki le puleaga makeke leia e takatakafi ia a nea fuli, Ti mo le fenua leia e tafe ai ni vaitafe.

³ Koutou fuli, kakai o le malama nei, kakai o le kele, Kotou tio ki le manumanu leia kua tuu i aluga o mauga, Kotou fakalogo ki le fakatagi pupusi leia kua tagi !

⁴ Talie na folafola mai le Eteleno kiate au, o pati : E kau tio fakafulufulumalie mei loku nofoaga, I le vevela gigila o le malama, I le aafu o le sasau, i le temi vevela leia e tuuti ai le fulumeto.

⁵ I mua o le tau o vite, i le temi leia e gato ai le somo o le vite, I le temi leia e liliu ai a se ko ni fuai vite ala e leleu, Ti e talai ai a laa ki le sele, ti e paki ai a somo, kae koti ai a lau…

⁶ E tiaki loa latou fuli ki manu lele fekai o mauga Ti mo manu o le kele ; E kai loa e manu lele fekai olatou mate i le temi vevela katoa, Ti e kai loa latou e manu o le kele i le temi momoko.

⁷ I le temi lena, e aumai loa ni moliga ki le Eteleno o kau tau, E le kakai makeke mo tagata lalasi, E le kakai fakaii talu mei lona tupu, E le puleaga makeke leia na takatakafi ia a nea fuli, E le fenua leia e tafe ai a vaitafe. E aumai loa latou ki le ganea leia e agai ai le suafa o le Eteleno o kau tau, Ki le mauga o Sione.