Esaia 17 - Tosi Tapu

Folafola kikite ki Silia

¹ Folafola ki Tamaso. Ko leinei, e leaise koi nofo Tamaso ko se kolo, Kae e liliu loa a ia ko se tuuga fale maumau.

² Kua tiaki a kolo o Aloele, Kua tuku latou ki kau manu ; Kua lotou momoe i ai, ti e leaise tasi ke fakaii ia latou.

³ Kua folafola le Eteleno o kau tau, o pati : Kua puli noa le kolo tau o Efalaimi, Ti mo le puleaga o Tamaso, ti mo le toega o Silia : E tatau loa a ia mo le kololia o fanau o Iselaele.

⁴ I le aso lena, e gaegae loa le kololia o Sakopo, Ti e puli loa le gako o lona tino.

⁵ E fai loa pe le temi leia e tuuti ai le fulumeto e le tagata tuuti fulumeto, Ti e tuuti ai e lona lima a taulu fulumeto ; E fai loa pe le temi leia e tanaki ai a taulu fulumeto i le vaivailiua o Lefaimi.

⁶ E toe loa se ganea ke taetaega, ofaipe le oki leia o le lulu o se olive, Lua, tolu fa olive, i le tumutumu, Fa, lima, i ona laa ala na fua.

⁷ I le aso lena, e tagaki loa le tagata ki lona Atua, lona tupuaga, Ti e maliu loa ona mata ki le Maokioki o Iselaele.

⁸ E leaise toe tio loa a ia ki aletale, Gaoiaga o ona lima, Ti e leaise toe tokaga loa a ia ki nea ala na fau e ona maikao, A taulaatua o Asetalate mo fakatata o le laa.

⁹ I le aso lena, e tiaki loa a kolo tau o Iselaele Ofaipe le tiaki i mua o kolo o le kau Evi mo le kau Amole : Ti e tuu loa i ai se toafa.

¹⁰ O tupu na ke galoi le Atua o lou fakamauli, Na leaise ke manatui le utu o lou ulufaga. Koia na ke fai ai ni oloto malolo, Ti na ke to ai ni tafito vite matapule.

¹¹ I lau to loa latou, na ke takatakai loa latou ki se a laakau, Ti na leaise tuvai loa lolatou se. Kae na sola loa le fuata i le temi o le fiafia : Ti na leaise maua loa se faitoo ki le mamae.

¹² Oi, kolea le logoa leinei pe ni kakai toka api ! E lotou logoa ofaipe le logoa a le tai. Kolea kua logoa ai a atu puleaga ! Kua lotou gugulu ofaipe le gugulu o ni atu vai makeke.

¹³ Kua logoa a atu puleaga ofaipe le logoa o vai lalasi… Kae e feau latou e le Eteleno, ti e lotou sosola ki mamao, Ofaipe mutie malo o le mauga ala e pusi e le matagi, Ofaipe le efu leia e lagai e se asesio.

¹⁴ Ka soko mai le afiafi, ko leinei ko se maumau fakapunamauli ; I mua o le usu, kua lotou pupuli ! Ko lena le vaega o latou ala e fakamativa ia matou, Ko lena le ikuaga o latou ala e kaia ia omatou koloa.