Esaia 16 - Tosi Tapu

Ko le mamae o Moape

¹ Kotou ave ni akeno ki le pule lasi o le fenua, Kotou ave latou mei Sela, i le toafa, Ki le mauga o le taine o Sione.

² Ofaipe se manu lele e sola, ofaipe ni uviki o se ofaga e i, E fenaaki loa a taineliki o Moape, i le aso leia e lotou fakalaka ai i le Alenone.

³ Tuku mai kia matou se tokoi ; Fai se puleaki ; malui matou i le lalatea ki lou malu ofaipe le pouli ; Fufu latou ala na kapu saele, Aua na ke fakasa leia e sola !

⁴ Tuku le kau popula o Moape ke nofo i lou fenua ; Ke ke liliu kia latou ko se ulufaga i le tagata tukipo ! Talie e gato loa le popula, ti e oki loa le maumaui, Ti e puli loa leia e takatakafi ia le fenua.

⁵ Kae e tuu mau loa le ekeekeaga o le sau i le manava alofa ; Ti e eke loa i ai se Tuifakamaau agatonu mo alofa ki le faitotonu Mei le sakoga o Tavite.

⁶ Kua motou logo ki le laukau o Moape, Ki lona nekenekea mo lona fia taualuga, Ki lona matasoka mo ana masau vaiga.

⁷ Koia kua tagi laulau ai Moape ki Moape, ti kua tagi laulau nea fuli. Kua kotou fetagisi i le maumaui o Kile-Aleseti, Leia na taai fakaveliveli ki lalo.

⁸ Talie kua maumaui a faisaga o Eseponi ; Kua fatifatii e le kau pule o atu puleaga a tafito vite o le vite a Sipema, Leia na mafola o kaku ki Saesele, Leia na eva i le toafa : Na tutupu a laa, o ano o kaku ki le tai.

⁹ Koia e kau tagi ai ki le vite o Sipema, ofaipe laku tagi kia Saesele ; Eseponi mo Eleale, e kau fakavai kolua ki oku loimata ! Talie kua vilo se kalaga tau Ki akoutou taukai vite mo akoutou taukai fulumeto.

¹⁰ Kua pupuli le fiafia, mo le nekenekea i ganea faisaga ; E leaise koi logo ki ni sua mo ni kalaga fiafia i faisaga vite ! E leaise koi takatakafi e le tagata tau vite le vino i fa tane vino ; Kua kau fakagato a kalaga fakafiafia.

¹¹ Koia kua tagi ai oku tootooga ki Moape, ofaipe se alepe, Ti mo loku mafu ki Kile-Alesi.

¹² E tio loa ki le sela a Moape o pale ki ona ganea taualuga ; Kua ulu a ia ki lona sagatualio o faikole, kae e leaise mafai ke maua e ia se nea.

¹³ Ko lena le folafola leia na fakasa e le Eteleno talu mei fualoa ki Moape.

¹⁴ Kae kua folafola le Eteleno i le aso nei, o pati : Koi toe fetuu e tolu, ofaipe fetuu o se tagata solia totogi, E gaegae loa le kololia o Moape, Mo lona kakai toka api ; Ti ko le nea leia e toe loa ko se nea ikiiki fua, ko se ga nea noa fua.