Esaia 15 - Tosi Tapu

Folafola kikite ki Moape

¹ Folafola ki Moape. I le po totonu leia na maumaui ai Moape, Na toe maumaui ai foki Ale-Moape ! I le po totonu leia na maumaui ai Moape, Na toe maumaui ai foki Kile-Moape !…

² Kua pale le kakai o Tiponi ki le fale tapu mo ganea taualuga, o tagi i ai. Kua fai e Moape ni tagi vale ki Nepo mo Metepa : Kua tele a ulu fuli, ti kua koti a kaukava fuli.

³ I ala, kua lotou kofu ni taga ; I aluga o fale mo nofoaga fakafenua, Kua lotou sua fuli ni tagi laulau.

⁴ Kua pa kalaga Eseponi mo Eleale, Ti kua logo ola leo o kaku ki Saatese ; Kua tagi vale foki a tagata tau o Moape, Talie kua i olatou loto.

⁵ Kua tagi foki loku loto ki Moape, Leia kua sosola lona kakai o kaku ki Tesoale, mo Ekalate-Selisisa ; Talie kua lotou pale fetagisi ki Lukite, Ti kua lotou taukalaga i le mamae i le ala o Kolonaimi.

⁶ Talie kua maumaui a vai o Nimelimi, Ti kua malo le vao, ti kua puli le mutie sesega, Ti kua mamate mo laakau.

⁷ Koia kua lotou tanaki ai le nea leia e toe, Ti kua lotou ave a ia ki leia fetuu o le liua o sole.

⁸ Talie kua takatakai e tagi le fenua katoa o Moape ; Kua logo ana tagi laulau o kaku ki Ekalaime ; Kua logo ana tagi laulau o kaku ki Peele-Elimi.

⁹ Kua apele a vai o Timone i le toto, Ti e kau kakau loa ki Timone ni malaia foou, Se laione kia latou ala na sao i Moape, Ki le toega o le fenua.