Esaia 13 - Tosi Tapu

Ko le folafola kikite ki Papilone

¹ Ko le folafola kikite ki Papilone, leia na fakasa kia Esaia, vosa o Amotesito.

² Kotou fakatuu se manumanu i se mauga tula, Kotou kalaga kia latou, Kotou taukalo ki le lima, Ti ke lotou ulu i matapa o le kau tukipo !

³ Kua kau tuku ni fakatotonu ki laku solia maokioki, Ti kua kau kalagai a kau toa o loku sausau, latou ala e fiafia i loku mafimafi.

⁴ Kua logo ki se logoa i mauga, Ofaipe se logoa a se kakai toka api ; Kua logo ki se gugulu a ni puleaga mauke, ni puleaga ala kua fakatasi : Kua fakatele e le Eteleno o kau tau le solia leia ka ano o tau.

⁵ Kua lotou au mei se fenua mamao, Mei potupotu o le lagi : Ko le Eteleno mo nea gaoi o lona sausau ka maumau ia loa le fenua katoa.

⁶ Kotou fetagisi, talie kua ofi mai le aso o le Eteleno : Kua au a ia ofaipe se maumau mei le Mafimafi.

⁷ Koia kua gaegae ai a lima fuli, Ti kua i ai a loto fuli o tagata.

⁸ Kua maua latou e le i ; Kua kaku kia latou le sosa mo le mamae ; Kua lotou mapelu ki lalo ofaipe se fafine e fanau ; Kua lotou fetioaki fakapunamauli, Ti kua fai olatou mata pe le ula o le afi.

⁹ Ko leinei, kua soko mai le aso o le Eteleno, Aso fakaii, aso o le sausau mo le sausau kaka, Leia e fakaliliu ia loa le malama nei o toafa, Ti e tamate ia loa le kau agasala i le malama nei.

¹⁰ Talie e leaise toe mu loa a fetuu o le lagi mo fetuu liliki fuli, Ti e fakapouli loa le laa i lona sopo, Ti e leaise toe mu loa le masina.

¹¹ E kau tautea loa le malama nei o tupu ko lana agasala, Ti mo le kau agaveli o tupu ko alatou agaveveli ; E kau fakagato loa le fia nealasi o le kau fia taualuga, Ti e kau tuuti loa le fia tagata o le kau agamakeke.

¹² E kau fakaliliu loa a tagata ke tasitasiga ofaipe le aulo mea, Ti e kau fakaliliu loa latou ke tasitasiga ake i le aulo o Ofile.

¹³ Koia e kau luui loa le lagi, Ti e galulu loa le kele i lona fakatafito I le sausau o le Eteleno o kau tau, I le aso o lona sausau.

¹⁴ Koia, ofaipe se tia na i, Pe se kau manu kua sala tagata tausi, E tasi maliu loa le tagata ki lona kakai, Ti e tasi sola loa le tagata ki lona fenua.

¹⁵ Ko latou fuli ala e maua loa e sokai loa, Ti ko latou fuli ala e tapo loa e tamate loa ki le seleta.

¹⁶ E laliki loa alatou fanau i olatou mua, Ti e kaia loa olatou fale, ti e fakamakeke loa alatou fafine.

Ko le tamate o Papilone e le kau Mete

¹⁷ Ko leinei, e kau lagai loa kia latou le kau Meti, Ala e leaise tokaga fua ki le paaga, Ti e leaise manumanu fua ki le aulo.

¹⁸ E lotou tamate loa le kau tupulaga ki alatou kalolo, Ti e leaise lotou toe manava alofa loa ki le fua o manava ; E leaise fakamauli loa e olatou mata a fanau liliki.

¹⁹ Ti ko Papilone, le teuga o puleaga, Le fia tagataaga o le kau Kaletea, E fai loa pe Sotoma mo Komola, ala na maumaui e le Atua.

²⁰ E leaise toe nofo loa i ai i se aso, Ti e leaise toe fakakakai loa a ia i se aso ; E leaise toe fakatuu loa i ai e le Alape lona falela, Ti e leaise toe fagai loa i ai e le kau tausi manu alatou kau manu.

²¹ E fai loa i ai e manu o le toafa olatou nofoaga : E nofo loa a lulu i ona fale, Ti e fai loa i ai e otulusi olotou nofoaga, Ti e soposopo loa i ai a koti.

²² E tagi loa a lenato i ona fale sau, Ti e ko loa a kuli vao i ona fale fakaalialiki. Kua ofi le temi o Papilone, ti E leaise toe fakaloaloa loa ona aso.