Esaia 10 - Tosi Tapu

¹ Malaia kia latou ala e tuku ia ni fakatotonu veli, Ti mo latou ala e tosi ia ni lao sala,

² Ke aua na fakamaau i le faitotonu le kau mativa, Ti ke fakafiti a tagi a le kau gaegae o loku kakai, Ti ke fakaliliu a fafine lokonui ko alatou nea kai, Ti mo toe sala matua ko olatou koloa !

³ Kolea ka kotou fai loa i le aso o le tautea Ti mo le maumau leia ka vilo loa kia koutou mei se fenua mamao ? Ko ai leia ka kotou sosola loa ki ai, ke tokoi atu kia koutou, Ti kofea ka kotou tuku ai loa lokoutou kololia ?

⁴ E tulolo loa ni iki i loto malie o le kau popula, Ti e vivilo loa ni iki i lotolotoga o le kau mate. Kae logo ai a nea fuli ana, e leaise malu le sausau o le Eteleno, Kae koi falo aifai lona lima.

Ko le fakamaaui o Asilia

⁵ Malaia ki Asilia, ko le laakau o loku sausau ! Ko le laakau a ia i lona lima, ko le nea gaoi a ia o loku sausau.

⁶ Na kau tuku a ia ke oso ki se puleaga agaveli, Na kau tuku a ia ke saele ki le kakai a laku sausau, Ke maumau mo kaia ona koloa, Ti ke takatakafi a ia ofaipe le pela o ala.

⁷ Kae na leaise tio fenaaki a ia, Ti na leaise manatu fenaaki lona loto ; Na manatu ata a ia ke maumau mo fakapuli ni puleaga mauke.

⁸ Talie na pati a ia : Pe leaise ko ni sau aku pule ?

⁹ Pe na leaise fai fakatatau ki Kaleno mo Kalekemisi ? Pe na leaise fai fakatatau ki Amati mo Alepati ? Pe na leaise fai fakatatau ki Samalia mo Tamaso ?

¹⁰ Ofaipe le fai e loku lima ki puleaga o taulaatua, Ala na lasi ake olatou fakatata i Selusalemi mo Samalia,

¹¹ Pe leaise kau fai loa ki Selusalemi mo ona fakatata Le nea leia na kau fai ki Samalia mo ona taulaatua ?

¹² Kae, kao oki malie loa le gaoi a le Aliki I le mauga o Sione mo Selusalemi, Ti o kau tautea loa le sau o Asilia o tupu ko fua o lona loto fia nealasi, Ti mo le matasoka o le tio o ona mata fia taualuga.

¹³ Talie e pati a ia : Na kau fai a nea anei i le makeke o loku lima, Ti mo loku poto, talie e kau atamai ; Na kau fetogi a koiga o atu puleaga, ti na kau too olatou koloa ; Ofaipe se tagata toa, na kau fakaifo latou fuli ala na eke i ekeekeaga fakasau ;

¹⁴ Na kau teki loku lima ki koloa fuli o atu puleaga, ofaipe ki se ofaga ; Ti, ofaipe le tae o ni fuai moa i se ofaga leia kua tiaki e le ufa, Na kau tae le malama nei katoa : Na leaise tasi fua na fakataugaoi ia lona kapakau, Pe na fakamavaa ia lona gutu, pe na fai ia se kalaga.

¹⁵ Pe fiafia le toki ki leia e fakaaoga ia a ia ? Pe ita le tutuu ki leia e too ia a ia ? O sakinake e fakataugaoi e le kaui toki leia e too ia a ia, O sakinake e siki e le kaui tuutuu leia e siki ia a ia !

¹⁶ Koia e kakau loa e le Aliki, e le Aliki o kau tau, Le fakalaulautetea ki ana kau solia makeke ; Ti e malaga loa se vela lasi i le lolotoga o lona kololia, Io, se vela o tatau mo leia o le afi.

¹⁷ E liliu loa le malama o Iselaele ko se afi, Ti ko lona Sagato ko se ula, Leia e tutu ia loa o okioki ona uluvao gaoa mo talatala I le aso fai e tasi ;

¹⁸ Leia e tutu ia loa a tino mo laumalie, Mo le fulumalie o lona vaomatua ti mo ona ganea faisaga. E fai loa pe se tagata masaki, leia kua ulu fakapouli.

¹⁹ E mafai loa ke lau le toega o laakau o lona vaomatua, Ti e tosi loa e se ga toe lona lasi.

²⁰ I le aso lena, Ko le toetoega o Iselaele mo latou ala na sao i le fale o Sakopo, E leaise toe fanaki loa ki leia na taai ia latou. Kae e lotou fanaki loa i le loto katoa ki le Eteleno, le Sagato o Iselaele.

²¹ E toe liliu loa le toetoega, io, le toetoega o Sakopo Ki le Atua mafimafi.

²² Ei Iselaele, pe lasi loa lou kakai ofaipe le one o le mata tai, Ko se ga toetoega fai e toe liliu loa ; Kua fakapapau le maumau, e fakalaka loa a ia i le fakamaau.

²³ Ti ko le maumau lena na fakapapau, E fakasoko loa a ia e le Aliki, le Eteleno o kau tau i le fenua katoa.

²⁴ Kae ko leinei le folafola a le Aliki, le Eteleno o kau tau : Ei loku kakai, leia e nofo i Sione, Aua na ke i ki le tagata Asilia ! E taai e ia a koe ki le laakau, Ti e siki e ia lana tokotoko kiate koe, ofaipe le nea leia na fai e le kau Esipito.

²⁵ Kae, koi toe fai se ga temi ikiiki, Ti e gato loa le tautea, Ti e maliu loa loku sausau kiate ia o tamate a ia.

²⁶ E siki loa e le Eteleno o kau tau le suipi kiate ia, Ofaipe lana taai Matiane i le utu o Olepe ; Ti, ofaipe lana siki lana tokotoko ki le tai, E toe siki loa e ia a ia, ofaipe lana fai i Esipito.

²⁷ I le aso lena, e too loa e ia lana amoga i lou tuauma, Ti mo lana laakau taki i lou ua Ti e maumaui loa e ia le laakau taki i lou ua.

Ko le fakafeofi o le fili ki Selusalemi

²⁸ Kua saele le fili ki Aiate, kua fakalaka a ia i Mikeloni, Kua tuku e ia ana kavega i Mikemasi.

²⁹ Kua lotou fakalaka i le vasa lau ikiiki o mauga ; Kua lotou momoe i Kepa ; Kua lulu Lama ; Kua sola Kipea o Saulo.

³⁰ Ei taine o Kalemi, siki ake lou leo ! Tokaga, Laise ! malaia kiate koe, Anatote !

³¹ Kua mavete Matemena ; Kua sosola le kakai o Kepime.

³² Na toe manavanava le fili i Nope i se aso e tasi, Ti kua fakakaikai e ia lona lima ki le mauga o le taine o Sione, Le mauga o Selusalemi.

³³ Ko leinei, ko le Aliki, le Eteleno o kau tau, E fatifatii ia a laa o laakau i se makeke lasi : Kua tuuti a laa lalasi, Kua tuku ki lalo a laa taualuga.

³⁴ Kua tuuti e ia ki le toki a laakau lalasi o le vaomatua, Ti kua vilo le Lipane ki lalo i mua o le Mafimafi.