Esaia 1 - Tosi Tapu

Ko agasala a Suta mo lona tautea.

¹ Folafola kikite a Esaia, vosa o Amotesito, ki Suta mo Selusalemi, i le temi o Osiasi, mo Sotame, mo Akase, mo Esekiasi, sau o Suta.

² Lagi, fakalogo mai ! Kele, fakalogo mai lou taliga ! Talie e masau le Eteleno. Na kau fagai ti na kau taupau ni fanau, Kae na lotou agatuu kiate au.

³ E iloa e le pipi lona pule, Ti mo le asino le fale manu o lona pule : Kae e leaise iloa e Iselaele se nea fua e tasi, E leaise maua fua e loku kakai sona ga atamai.

⁴ Malaia ki le puleaga agasala, ki le kakai kua mafaia i agaveli, Ki le sakoga o le kau agaveli, ki fanau fakalialia ! Kua lotou tiaki le Eteleno, ti kua lotou nukinuki ki le Maokioki o Iselaele. Kua lotou toe liliu ki muli…

⁵ Koa ni tautea foou ke teki kia koutou ? Talie kua kotou liuliuga akoutou agatuu. Kua masaki le fa ulu katoa, Ti kua mamae le mafu katoa.

⁶ Mei le tagavae o kaku ki le ulu, e leaise ganea fua koi malie : Ko lavea ata, mo kafo, mo papala, Ala na leaise sai, pe na faitoo, pe na tului ki se lolo.

⁷ Kua maumaui lokoutou fenua, Kua tutu okoutou kolo e le afi, Ko ni kakai kese ala kua kai ia a koloa o lokoutou fenua i okoutou mata, E lotou kaia a ia mo maumaui, ofaipe ni kau kaikivao.

⁸ Ti kua nofo le taine o Sione Ofaipe se ga fale pola i se faisaga vite, Ofaipe se fale pola i se faisaga kokope, Ofaipe se kolo na takatakai.

⁹ Ka na leaise tuku e le Eteleno o kau tau Se ga toetoega gaegae ia matou, Na motou liliu loa ofaipe Sotoma, Na motou tatau loa mo Komola.

¹⁰ Pule o Sotoma, kotou fakalogo mai ki le folafola a le Eteleno ! Kakai o Komola, fakalogo mai lou taliga ki le lao o lomatou Atua !

¹¹ E pati le Eteleno : kolea le uiga o le liuliuga o akoutou sakilifisio ? Kua kau makona i failaulau o ovi tagata ti mo le gako o uviki pipi tagata ; E leaise kau maua se fiafia i le toto o pipi tagata, mo ovi fafine ti mo koti tagata.

¹² Ka kotou au o tutuu i oku mua, Ko ai na kole atu kia koutou ke fakakelekele oku lotoa ?

¹³ Kotou tuku le aumai o moliga noa : E kau fakalialia ki le iseso, Mo masina foou, mo sapato ti mo fakatasiga ; E leaise kau mafai ia le tio ki le tukipo i aso lalasi.

¹⁴ Kua vesia loku laumalie ki okoutou masina foou mo okoutou aso lalasi ; Kua lotou liliu ko se kavega mamafa kiate au ; Kua kau kaekae i lolatou katakii.

¹⁵ Ka kotou falo mai okoutou lima, e kau fulusi kese oku mata ia koutou ; Ka kotou liuliuga a faikole, e leaise kau fakalogo atu kia koutou : E apele okoutou lima i le toto.

¹⁶ Kotou maanu, kotou fakamea, Kotou too i mua o oku mata akoutou gaoi veveli ; Kotou tuku le fai o le nea e veli.

¹⁷ Kotou ako le fai o le nea e malie, kotou afa le faitotonu, Kotou puipui leia e fakavelivelii ; Kotou fai le nea e totonu ki le toe sala matua, Kotou puipui le fafine lokonui,

¹⁸ Kotou au, ti ke tou masau fakatasi ! e pati le Eteleno. Kapau e kula akoutou agasala ofaipe le toto, e lotou liliu loa o tea ofaipe le nive ; Kapau e lotou kula ofaipe le pulupe, e lotou liliu loa o tea ofaipe le fului akeno tea.

¹⁹ Kapau e kotou maua se loto malie ti kapau e kotou patigaofie, E kotou kai loa a fua malilie tukupau o le fenua ;

²⁰ Kae kapau e kotou patigataa ti kapau e kotou agatuu, E tafi loa koutou e le seleta, Talie kua folafola le gutu o le Eteleno.

²¹ Kolea koia ! Kua liliu foki le kolo agatonu ko se fafine faiaga ! I mua na apele a ia i le fakaapaapa ki le lao, ti na nofo i ai le faitotonu ; Kae i le temi nei kua i ai ni tagata tukipo !

²² Kua fetogi lau paaga ki le sikoli, Ti kua sui lau vino ki le vai.

²³ Kua agatuu ou pule ti kua lotou kau mo le kau kaia : Kua lotou manako fuli ki nea alofa ti kua lotou makape i muli o fakapale ; E leaise lotou fai le nea e totonu ki le toe sala matua, Ti e lotou fakatulituli ki le tagi a le fafine lokonui.

²⁴ Koia ko leinei le nea e fakasa e le Aliki, le Eteleno o kau tau, Le Makeke o Iselaele : Io, e kau liufaki loa le veli kia latou ala na agatuu kiate au, Ti e kau totogi loa ki oku fili.

²⁵ Ti e kau teki loa loku lima kiate koe, E kau tutu loa ke puli le sikoli leia e piki iate koe, ofaipe le gaoi a le potase, Ti e kau too loa a ga penui pulu fuli iate koe.

²⁶ E kau toe fakanofo loa ou tui fakamaau ofaipe le temi mua, Ti mo ou kau fono ofaipe le kamataaga. I le oki o le nea aia, e fakaigoa loa a koe ko le kolo o le faitotonu, Kolo agatonu.

²⁷ E fakamauli loa Sione i le maoki ; Ti ko latou ala e tafoki loa i ai e fakamauli loa i le faitotonu.

²⁸ Kae e maumaui loa latou fuli ala e agatuu mo latou fuli ala e agasala, Ti e mamate loa latou fuli ala e tiaki ia le Eteleno.

²⁹ E kotou luma loa o tupu ko laakau ala na kotou tui ki ai, Ti e kotou luma loa o tupu ko oloto ala na fai ia okoutou fiafiaaga ;

³⁰ Talie e kotou fai loa pe se telepenite kua gini ona lau, Pe se oloto leia e leaise fakavai.

³¹ E fai loa le tagata makeke pe le taenato, Ti ko lana gaoi pe se masikai afi ; E la ulaula loa, leia mo leia fakatasi, Ti e leai loa se tasi ke tamate ia.