Epelo 9 - Tosi Tapu

2) fakatotonu mo sagatualio ko paaki o le sakilifisio o Sesu-Kilisito

¹ Ko leinei, na maua maoki foki e le uluaki sai ni fakatotonu ki le atolasio, ti mo se sagatualio i le malama nei.

² Talie na fakatuu loa se tapenakulo. I le uluaki falela, leia na igoa ko le potu tapu, na tuu ai le tekiaga malama, mo le laupapa ti mo pane fakatapu.

³ I muli o le lua puipui na tuu ai le potu o le falela leia na igoa ko le potu taputapu.

⁴ Na tuu i ai le aletale aulo ki kaloni, ti mo le aleka o le sai leia na kofu katoa ki le aulo. Na tuku i loto o le aleka se ipu aulo leia na tuku ai le mane, mo le tokotoko o Alone, leia na se, ti mo laui fatu o le sai.

⁵ I aluga o le aleka na tuu ai a selupino o le kololia, ala na fakamalumalu ia ki ola kapakau le tapono o le aleka. E leaise ko le temi leinei ke masau ai ki ona anoaga fakalikiliki fuli.

⁶ I le oki o le fakatuutuu fenaaki o nea fuli ana, ko tagata fai sakilifisio ala e fai ia le gaoi tapu e ulu i temi fuli ki le uluaki potu o le tapenakulo.

⁷ Kae ki le lua potu o le tapenakulo, e ulu ki ai le pule fai sakilifisio toka tasi o tua tasi i le fetuu, kae tonu ke ave e ia ki ai se toto, kiate ia totonu ti mo agasala a le kakai.

⁸ E fakasa i ai e le Laumalie Maokioki e leikiaise fakamavaa le ala ki le potu taputapu, talie koi tuu le uluaki tapenakulo.

⁹ Ko se fakatata lena ki le temi nei ; ko lona uiga, ko nea alofa mo sakilifisio, ala na momoli ki le Atua, e leaise mafai ke fakasoko ia o malie tukupau le loto o leia e fai ia le atolasio lena ;

¹⁰ ti ko nea ana, mo nea kai, mo nea inu, ti mo fakamea kesekese, ko ni lekula fakatino latou, ala na fakatuu fua o kaku ki se temi leia e fakafoou ai latou.

3) ko le sagatualio mo le sakilifisio o le sai foou ko ni nea maoki

¹¹ Kae kua au Kilisito ko le pule fai sakilifisio o nea malilie ka au ; ti kua ulu a ia ki le tapenakulo lasi ake mo malie tukupau, leia na leaise fau e lima o le tagata, ko lona uiga e leaise tuu a ia i le malama nei ;

¹² ti kua ulu tua tasi a ia ki le potu taputapu, ti na leaise ulu a ia mo le toto o se koti pe ko se uviki pipi, kae na ulu a ia mo lona toto totonu, ti kua maua e ia se totogi lee gato kia tatou.

¹³ Talie kapau ko le toto o koti mo uviki pipi tagata, ti mo le mugalafu o se pipi fafine leia e liligi kia latou ala e kelekele, e fakamaokioki ia mo tuku ia le mea o le kanofi,

¹⁴ e feaki ake loa le lasi o le fakamea otatou loto mei gaoi mate e le toto o Kilisito, leia na momoli ia a ia totonu lee mele ki le Atua i le Laumalie lee gato, o tupu ke tou tausi ki le Atua mauli !

¹⁵ Ti koia leia kua liliu ai a ia ko le fakasokopati o se sai foou, o tupu ke tali e latou ala na kalagai a nea malilie lee gato ala na fakapapau kia latou. Kua lotou mafai a ia, talie kua soko se mate, ti kua aga le mate lena o fakamauli a tagata mei sala ala na lotou fai i lalatou koi fakalogo ki le uluaki sai.

4) e fakasa e le sai foou a anoaga o le fakapapau a Kilisito

¹⁶ Talie i le ganea leia e i ai se tosi tofiga, e aoga ke mate mua leia na tuku ia le tosi tofiga lena.

¹⁷ Talie koi saele le tosi tofiga mo ka kua mate leia na fai ia a ia, talie e leaise sona makeke i le mauli o leia na fai ia le tosi tofiga.

¹⁸ Koia na leaise fakamaoki ai le uluaki sai i mua o le liligi o le toto.

¹⁹ Ko Moisese, i le oki o lana fakasa i mua o le kakai katoa a fakatotonu fuli o le lao, na too ia loa le toto o uviki pipi mo koti, mo se vai, mo se kie kula, mo se taulu isopa, ti na fai loa e ia le afusi ki le tosi lao totonu ti mo le kakai katoa, o pati :

²⁰ Ko le toto leinei o le sai leia na fakatotonu e le Atua kia koutou.

²¹ Na toe fai foki e ia le afusi o le toto ki le tapenakulo ti mo nea fuli o le atolasio.

²² Ti na teitei a nea fuli ke fakamea ki le toto, o mulimuli ki le lao, talie kapau e leaise liligi se toto, ti e leaise maua se fakamolemole.

5) na fakamea le sagatualio o Selo e se sakilifisio malie tukupau

²³ Na aoga ke fakamea fenaaki a ata o nea maoki i le atu lagi. Kae na aoga ke fakamea a nea totonu o le atu lagi e ni sakilifisio ala e malilie tukupau oki.

²⁴ Talie na leaise ulu Kilisito ki se sagatualio leia na fau e lima o le tagata, leia ko le fakatata o le tapenakulo maoki, kae na ulu a ia ki le lagi totonu, o tupu ke fakafofoga e ia tatou i le temi nei i mua o le Atua.

²⁵ Ti na leaise ulu a ia ki ai ke momoli a ia totonu o tua mauke, ofaipe le ulu a le pule fai sakilifisio i fetuu fuli ki le sagatualio o momoli se toto kese ;

²⁶ talie kapau koia ti na tonu loa ke mamae tua mauke Kilisito talu mei le kamataaga o le malama nei. Kae i le temi nei, i le fakaoki o sekulo, na sa a ia o tua tasi ke maumaui ai le agasala ki lona sakilifisio.

²⁷ Kua fakatuutuu ke mate tua tasi a tagata fuli, ti o soko mai loa le fakamaau.

²⁸ E tatau foki mo Kilisito, kua momoli e ia a ia o tua tasi ke amo ai a agasala a se kakai toka api. Ti e toe sa loa a ia i se tua lua o leai ke fufulu ai a agasala, kae ke fakamauli ai latou ala e talitali kiate ia.