Epelo 8 - Tosi Tapu

4) ko le atolasio a le faasiga o Alone ko se ata, kae ko le maoki e ia Kilisito

¹ Ko le puani tafito o le nea leia e tou masau ki ai : Kua tou maua se pule fai sakilifisio, leia kua eke i le fetuu atamai o le nofoaga sau o le agai o le Atua i le atu lagi,

² Ko le tagata tausi o le sagatualio ti mo le tapenakulo maoki, leia na fakatuu e le Aliki kae leai e se tagata.

³ Talie ko pule fai sakilifisio fuli, kua fakanofo latou ke lotou momoli ni moliga ti mo ni sakilifisio ; koia na aoga ai kiate ia ke i ai foki sana nea ke momoli.

⁴ Kanapau na nofo a ia i le malama nei, na leaise fai sakilifisio a ia, talie na nonofo i ai latou ala e momoli ia a moliga o mulimuli ki le lao :

⁵ E lotou fai se tausi o fakatatau ki le paaki ti mo le ata o nea i le lagi, ofaipe le fakasa fakatomua e le Atua kia Moisese i mua o le fakatuu o le tapenakulo, i lana pati kiate ia : Tokaga o fai a nea fuli, o fakatatau ki le paaki leia na fakasa kiate koe i le mauga.

5) ko Sesu-Kilisito ko le fakasoko pati o se sai leia e malie tukupau

⁶ Kae ko leinei, kua maua e ia se gaoi leia e malie lasi ake, talie kua liliu a ia ko le tagata fakasokopati o se sai leia e malie lasi ake ti kua fakatafito ki ni fakapapau ala e malilie lasi ake.

Ko le sai foou : 1) na fakasa e le kau polofeta

⁷ Talie kanapau na saosaoa le uluaki sai, na leaise aoga loa ke fetogi a ia e se lua.

⁸ Talie na valoki e le Atua ni sala ki Iselaele o pati : Ko leinei, e au a aso, e pati le Aliki, Ala e kau fai ai loa mo le fale o Iselaele ti mo le fale o Suta, Se sai foou,

⁹ O leaise faipe le sai leia na kau fai loa mo olatou tamana, Ile aso leia na kau too ai latou i le lima Ke fakamavae latou i le fenua o Esipito ; Talie na leaise lotou kataki fualoa i laku sai, Ti ko au foki na leaise kau tokaga kia latou, e pati le Aliki.

¹⁰ Kae ko leinei le sai leia e kau fai loa mo le fale o Iselaele. Ile oki o aso ana, e pati le Aliki : Ekau tuku loa aku lao ki olatou loto, Ti e kau tosi loa latou i olatou mafu, Ti e kau liliu loa ko lolatou Atua, Ti e lotou liliu loa ko loku kakai.

¹¹ E leaise toe ako loa e se tasi se tasi, Pe e se tasi lona taina, o pati : Ke ke iloa le Aliki ! Talie e iloa loa au e tagata fuli, Mei leia e ikiiki oki o kaku ki leia e lasi oki ia latou ;

¹² Talie e kau fakamolemole loa alatou agaveli, Ti e leaise kau toe manatui loa alatou agasala.

¹³ I le pati : sai foou, na fakasa e ia kua matua le uluaki sai ; Koia ko le nea leia kua matua, le nea leia kua gaegae, kua meimei ke puli.