Epelo 7 - Tosi Tapu

Melekiseteke, paaki o Kilisito

¹ Talie ko le Melekiseteke lena, ko le sau o Salemi, ti ko le tagata fai sakilifisio a le Atua taualuga ; na ano a ia ki mua o Apalaamo i lana toe liliu mei le lava o le kau sau, ti na tapuaki loa a ia kia Apalaamo ;

² ti na soli loa e Apalaamo kiate ia le vaega kau agafulu o nea fuli ; ko le uluaki uiga o lona igoa, ko le sau o le faitotonu, ti ko le lua ko le sau o Salemi, ko lona uiga ko le sau o le tokamalie.

³ E sala tamana a ia, mo sala tinana, ti mo sala sakoga, e leaise kamataaga o ona aso ti e leaise fakaokiaga o lona mauli, kae e fakatatau a ia ki le Alo o le Atua ; ti e nofo le Melekiseteke lena ko le tagata fai sakilifisio o lee gato.

E lasi ake Melekiseteke ia Alone : 1) talie na soli e Alone ia Apalaamo le vaega kau agafulu kia Melekiseteke

⁴ Kotou tokaga ki le lasi o leia na soli ki ai e le pateliaka ko Apalaamo le vaega kau agafulu o nea fuli.

⁵ Ko latou o vosa o Levi ala e gaoi fakapelepitelo e maua ia, o mulimuli ki le lao, le fakatotonu ke lotou tanaki le vaega kau agafulu mei le kakai, ko lona uiga mei olatou fetaina ala na au foki mei ifiifi o Apalaamo ;

⁶ kae ko ia leia na leaise au meia latou, na too loa e ia le vaega kau agafulu meia Apalaamo, ti na tapuaki loa a ia ki leia na maua ia a fakapapau.

⁷ Ti ko le maoki e leaise toe visi ki ai, e tapuakii leia e ikiiki e leia e lasi.

⁸ I leinei, ko latou ala e tanaki ia le vaega kau agafulu ko ni tagata e mamate ; kae i lena, ko leia e fakamaoki ki ai e mauli.

⁹ Ti tasi ko Levi, leia e tanaki ia le vaega kau agafulu, e feala ke pati, na totogi e ia le vaega kau agafulu ia Apalaamo ;

¹⁰ talie na nofo a ia i ifiifi o lona tamana i le temi leia na ano ai Melekiseteke ki mua o Apalaamo.

2) talie na leaise ave e Alone se nea o kaku ki le malie tukupau

¹¹ Koia kanapau na mafai ke maua le malie tukupau i le tulaga fakapelepitelo o le kau Levi - talie ko le tulaga fakapelepitelo lena e tuu ai le lao leia na soli ki le kakai - kolea na aoga ai loa ke toe sa se tasi ake tagata fai sakilifisio o mulimuli ki le faasiga o Melekiseteke kae leaise mulimuli ki le faasiga o Alone ?

¹² Talie, i le fetogi o le tulaga fakapelepitelo, e tonu ke toe fetogi foki le lao.

¹³ Talie ko leia e patii ki ai a nea ana, e kau a ia ki se tasi ake faasiga, leia na leaise se tasi mei ai na gaoi ki le aletale ;

¹⁴ talie kua sa maoki na tupu lotatou Aliki meia Suta, faasiga leia na leaise masau ki ai Moisese ki le tulaga fakapelepitelo.

¹⁵ E toe sa malie ake le nea lena, i le lakaga leia na sa ai se tasi ake tagata fai sakilifisio ofaipe Melekiseteke,

¹⁶ leia na leaise fakanofo o mulimuli ki ni lekula fakatagata, kae o mulimuli ki le makeke o se mauli leia e leaise toe mate ;

¹⁷ talie kua tuku kiate ia le fakamaoki leinei : Ko le tagata fai sakilifisio a koe o lee gato, Omulimuli ki le faasiga o Melekiseteke.

¹⁸ Koia i le nea lena e soloi ai loa le uluaki lekula, o tupu ko lona gaegae mo lona lee aoga.

¹⁹ Talie na leaise ave e le lao se nea e tasi ki le malie tukupau ; kae kua fakaulu loa se amanaki malie tukupau, leia e tou fakafeofi ai ki le Atua.

²⁰ Ti na leaise soko le nea lena kae leai se fakapapau ;

²¹ talie na soko le kau Levi ko tagata fai sakilifisio sala fakapapau, kae na soko Sesu ko le tagata fai sakilifisio i leia na pati kiate ia : Kua fakapapau le Aliki, ti e leaise toe fakasemala loa a ia : Eke tagata fai sakilifisio o lee gato, Omulimuli ki le faasiga o Melekiseteke ;

²² I le nea foki lena, na soko ai Sesu ko le fakamaoki o se sai malie tukupau.

3) na mamate a fai sakilifisio o le fasiga o Alone, kae e mauli Kilisito o lee gato

²³ Ko le tasi foki a nea, na toka lasi ai le kau tagata fai sakilifisio, talie na leaise fakataga e le mate ke lotou mauli fualoa.

²⁴ Kae ko ia, talie e mauli a ia o lee gato, e maua e ia se tulaga fakapelepitelo leia e leaise feala ke tuku ki se tasi.

²⁵ Koia foki leia e mafai ai ke fakamauli e ia o tukupau latou ala e fakafeofi ki le Atua iate ia, talie e mauli tuumau a ia o ulufaki latou.

²⁶ Koia na aoga ai kia tatou ke tou maua se pule fai sakilifisio o tatau mo ia, maokioki, mo mea, mo lee mele, mo mavae kese mei le kau agasala, ti mo taualuga ake i le atu lagi,

²⁷ leia e leaise aoga kiate ia, o tatau mo la ake kau pule fai sakilifisio, ke momoli e ia i aso taki tasi ni sakilifisio, o uluaki mua ki ana agasala totonu, ti oki ki agasala a le kakai. Talie na fai e ia le nea lena o tua tasi malie, i lana momoli a ia totonu.

²⁸ Talie e fakanofo e le lao ke pule fai sakilifisio ni tagata gaegaeia ; kae ko le folafola o le sai, leia na fai i muli o le lao, na fakanofo ia le Alo leia e malie tukupau o lee gato.