Epelo 6 - Tosi Tapu

Makape ki le nea leia e malie tukupau

¹ Koia foki, ke tuku ki muli a uluaki folafola a Kilisito, tou fai atu ki le nea leia e malie tukupau ; kae aua na toe teki le fakatafito o le fakafiti ki gaoi mate,

² mo le tui ki le Atua, mo le akonaki o papitema, mo le teki o lima, mo le toe tuuake o le kau mate, ti mo le fakamaau lee gato.

³ E motou fai loa le nea lena, mo kapau e fakataga a ia e le Atua.

⁴ Talie e leaise mafai ai kia latou ala kua oki i le fakamalamai tua tasi, ala kua kai ki le nea alofa mei lagi, ti kua kau ki le Laumalie Maokioki,

⁵ ti kua kai ki le folafola malie a le Atua ti mo makeke o le malama ka au,

⁶ kae na vivilo, e leaise mafai ai ke toe fakafoou latou, ti ke toe aumai latou ki le fakasemala ; talie na lotou toe kulusifiko le Alo o le Atua ti mo toe tuku a ia ki lauveli.

⁷ Talie ko le kele leia e fakavai e le ua leia e to tuumau ki ai, e fakatupu ia se mutie aoga kia latou ala na gaoi ki ai, e kau a ia ki le tapuakina a le Atua ;

⁸ kae kapau e fakatupu e ia ni malualoi mo ni laakau talatala, e leaise aoga a ia, ti e leaise tuvai lona fakamalaia ; ti e fakaoki loa a ia o tutu i le afi.

Fakapapau mo le amanaki malie

⁹ Kae logo ai kua motou masau fenaaki, alofaaga, e motou talitali o uiga mo koutou ki ni nea malilie tukupau mo aoga ki le saofaki.

¹⁰ Talie e leaise lee agatonu le Atua ke galoi e ia lakoutou gaoi ti mo le alofa leia na kotou fakasa ki lona suafa, i tausi ala na kotou fai ti mo lolotoga fai nei ki le kau sagato.

¹¹ E motou loto ke kotou tasi fakasa le alofa lena o kaku ki le gatoaga, o tupu ke kotou maua katoa le nea leia e kotou amanaki malie ki ai :

¹² Ke aua na kotou fakagasueveli, kae ke kotou faifaitaki kia latou ala na tui mo kataki fualoa, ti kua maua ia a nea ala na fakapapau e le Atua.

¹³ Talie ko le Atua, i lana fai le fakapapau kia Apalaamo, na leaise mafai ke fakamaoki a ia i se tasi leia e lasi ake iate ia, koia na fakamaoki loa a ia iate ia totonu,

¹⁴ o pati : Ko le maoki e kau tapuaki loa kiate koe, ti e kau liuliuga loa lou sakoga.

¹⁵ Ti na maua loa e Apalaamo le nea leia na fakapapau kiate ia o tupu ko lana kataki fualoa.

¹⁶ Talie e maoki e fakapapau a tagata i se tasi leia e lasi ake ia latou ; ti ko le fakapapau ko se fakamaoki a ia, leia e fakagato ia a visi fuli.

¹⁷ Koia, i le loto o le Atua ke fakasa lasi kia latou ala e tonu ke maua ia le tofiga o le fakapapau, e leaise toe fetogi loa e ia lana fakapapau, ti na fakamaoki loa e ia a ia ki se sai,

¹⁸ o tupu, i nea ana e lua ala e leaise toe fetogi ti e leaise feala ke loi ai le Atua, ke tou maua se loto makeke lasi, e tatou ala ko lotatou mumuniaga e tasi ko le kukumi o le amanaki malie leia kua tuku mai kia tatou.

¹⁹ Ko le amanaki lena, kua tou maua a ia ofaipe se taula o le laumalie, leia e makeke mo pipiki mau ; ti e ulu a ia ki loto o le kie puipui,

²⁰ i le ganea leia kua ulu ki ai Sesu ofaipe se tagata kua muamua kia tatou, leia kua fakanofo ko le pule fai sakilifisio o lee gato, o mulimuli ki le faasiga o Melekiseteke.