Epelo 5 - Tosi Tapu

Sesu e lasi ake i pule fai sakilifisio o le sau afea

¹ Talie, ko le pule fai sakilifisio fuli, kua filifili a ia i lotomalie o le kakai, ti kua fakanofo a ia ki le kakai ke tausi ki le Atua, o tupu ke momoli e ia ni moliga mo ni sakilifisio o tupu ko agasala.

² E feala ke maua e ia se alofa mamae ki le kau vale mo le kau sese, talie e kau foki a ia totonu ki le gaegaeia.

³ Ti e tupu e kau totonu a ia ki le gaegaeia, e tonu ke momoli e ia ni sakilifisio o tupu ko ana agasala totonu, ti mo ni iki ake o tupu ko agasala a le kakai.

⁴ E leaise mafai ke too e se tasi le tulaga mauiga lena kiate ia ; kae na leaise kalagai a ia e le Atua, ofaipe Alone.

⁵ Kae ko Kilisito, na leaise too e ia totonu kiate ia le kololia ke nofo ko le pule fai sakilifisio, kae na maua e ia mei leia na pati kiate ia : Ko loku Vosa a koe, Na kau fakatupu a koe i le aso nei !

⁶ E toe pati foki a ia i le tasi ake ganea : E ke pule fai sakilifisio o lee gato, Omulimuli ki le faasiga o Melekiseteke.

⁷ Ko ia leia, i aso o lona kanofi, na momoli ia ni su mo ni kole o fakatasi mo ni tagi makeke ti mo ni loimata ki leia na mafai ke fakamauli ia a ia mei le mate ; ti na tali a ia o tupu ko lona fakalogo ki le Atua.

⁸ Talie na logo ai ko le Alo a ia, kae na ako e ia le fakalogo i nea ala na mamae ai a ia ;

⁹ i le oki o lona siki ki le malie tukupau, na liliu a ia kia latou fuli ala e fakalogo kiate ia ko le pule o se saofaki lee gato,

¹⁰ talie kua fakasa e le Atua ko le pule fai sakilifisio a ia o mulimuli ki le faasiga o Melekiseteke.

Aoga o le matua i le mauli fakalaumalie

¹¹ E lasi ai a nea ala e motou fia masau ki ai i le potu lena, ti ko ni nea e faigataa ke fakamatala, talie kua kotou liliu o gasueveli i le fia matala.

¹² Talie ko koutou, ala kua tonu mei fualoa ke liliu ko ni pule fai sekola, kua aoga ke toe ako atu kia koutou a uluaki lekula o le folafola a le Atua ; kua kotou toe tatau mo latou ala e aoga ki ai le sua pipi kae leai le nea kai makeke.

¹³ Talie ko leia koi nofo i le sua pipi e leaise poto a ia i le folafola o le maokioki ; talie ko se toe ikiiki a ia.

¹⁴ Kae e tuku le magiti makeke ki tagata kua katoa, kia latou ala kua masani i le iloa kesekese o le malie mo le veli.