Epelo 4 - Tosi Tapu

Se malolo malie tukupau ki leia e tui

¹ Koia ke tou i, i le temi leinei koi tuu ai le fakapapau ke kotou ulu ki lona maloloaga, ke aua na ulu tausala se tasi o koutou ki ai.

² Talie kua fakasa le logo malie lena kia tatou ofaipe latou ; kae na leaise aoga kia latou le folafola leia na lotou logo ki ai, talie na leaise maua se tui ia latou ala na logo ki ai.

³ Kia tatou ala kua tui, e tou ulu ki le maloloaga, o mulimuli ki lana pati : Na kau fakapapau i loku ita : Eleaise lotou ulu loa ki loku maloloaga ! Na fakasa e ia le nea lena, kae kua oki ana gaoi talu mei le fakatupu o le malama nei.

⁴ Talie na pati a ia i le tasi ganea ki le fitu o aso : Ti na malolo loa le Atua i le aso fitu i ana gaoi fuli.

⁵ Ti i leinei foki : E leaise lotou ulu loa ki loku maloloaga !

⁶ Koia, talie koi taofi ai ki ni iki ke ulu ki ai, ti na leaise ulu ki ai latou ala na uluaki fakasa ki ia le logo malie lena, o tupu ko lolatou tui gataa,

⁷ e toe taofi foki e le Atua se tasi ake a aso - le aso nei - o pati ia Tavite i muli oki mai, pe lana pati i aluga : I le aso nei, kapau e kotou logo ki lona leo, Aua na kotou fakafefeka okoutou loto.

⁸ Talie, kapau na soli e Sosue le maloloaga lena kia latou, na leaise toe masau loa le Atua i muli mai ki se tasi ake a aso.

⁹ Koia e i ai se malolo o le Sapato leia kua taofi ki le kakai o le Atua.

¹⁰ Talie ko leia e ulu ki le maloloaga o le Atua e malolo a ia i ana gaoi, ofaipe le Atua na malolo a ia i ana gaoi.

¹¹ Koia tou faiga ke tou ulu vave ki le maloloaga lena, o tupu ke aua na siga se tasi o fakatautau ki le faifaitakiaga lena o le patigataa.

¹² Talie ko le folafola a le Atua e mauli, mo makeke, mo matakakai ake i se seleta mata lua, mo ulu loloto o kaku ki le vaei o le loto mo le laumalie, o sokoga mo gako o ivi ; e fakamaaui e ia a manatu o le laumalie ti mo manatu o le loto.

¹³ E leaise munia se nea fua e tasi i ona mua, talie e telefua mo fakatekateka a nea fuli ki mata o leia e tonu ke tou fakasa ki ai atatou gaoi fuli.

Sesu, lotatou pule faisakilifisio

¹⁴ Koia i le kua tou maua ai se pule fai sakilifisio leia kua ulu i le atu lagi, Sesu, le Alo o le Atua, ke tou tuu makeke i le tui leia e tou fakasa.

¹⁵ Talie e leaise tou maua ia se pule fai sakilifisio leia e leaise mafai ke manavaalofa ki otatou gaegaeia ; talie na fakasalai a ia ofaipe tatou i nea fuli, kae na leaise agasala fua a ia.

¹⁶ Koia ke tou fakafeofi ai i le tui makeke ki le agaiaga o le kalasia, o tupu ke tou maua ai le manavaalofa ti ke tou tali ai le kalasia, ke tokoi ai kia tatou i nea ala e aoga kia tatou.