Epelo 3 - Tosi Tapu

E lasi ake Kilisito ia Moisese

¹ Koia, fetaina maokioki, ala e kau ki le vokasio mei lagi, kotou tokaga lasi ki le apositolo, mo le pule fai sakilifisio o le tui leia e motou fakasa ia,

² Sesu, leia na agatonu ki leia na fakanofo ia a ia, ofaipe Moisese leia na agatonu i lona fale katoa.

³ Talie na totonu ke maua e ia se kololia leia e lasi ake i le kololia o Moisese, ofaipe le tagata fau fale leia e mauiga lasi ake i le fale totonu.

⁴ Talie kua fau a fale fuli e se tasi, kae ko leia na fau ia a nea fuli ko le Atua.

⁵ Kia Moisese, na agatonu a ia i le fale katoa o le Atua, ofaipe se tagata fakasausau, ke fakamaoki ki le nea leia e tonu ke fakasa ;

⁶ kae ko Kilisito, e agatonu a ia ofaipe le Vosa i lona fale totonu ; ti ko lona fale ko tatou, mo kapau e tou kukumi mau le tui makeke mo le amanaki malie o le kololia o kaku ki le fakaoki.

Le malolo o le Atua

⁷ Koia, o mulimuli ki le pati a le Laumalie Maokioki : I le aso nei, kapau e kotou logo ki lona leo,

⁸ Aua na kotou fakafefeka okoutou loto, Ofaipe le aso leia na kotou agatuu ai ki le Atua, Ofaipe le aso leia na kotou asiasii ai le Atua i le toafa,

⁹ Leia na fia ilo ai okoutou tamana kiate au, Olotou asiasii ai au, ti na lotou tio ai loa ki aku gaoi Ilolotoga o fetuu e kau fa.

¹⁰ Koia na kau vesia ai loa ki le tautupu lena, ti na kau pati ai loa : E sese tuumau olatou loto, Ti e leaise lotou iloa oku ala.

¹¹ Ti na kau fakapapau loa i loku ita : E leaise lotou ulu loa ki loku maloloaga !

¹² Kotou tokaga, fetaina, ke aua na maua e se tasi o koutou se loto veli mo tui gataa, o kaku o mavae mei le Atua mauli.

¹³ Kae kotou feakonakiaki ia koutou i aso taki tasi, i le temi katoa koi mafai ai ke pati : I le aso nei ! talie ke aua na fakafefeka se tasi o koutou e le kaka o le agasala.

¹⁴ Talie kua tou kau kia Kilisito, mo kapau e tou taofi makeke lotatou uluaki tui o kaku ki le fakaoki,

¹⁵ i le temi leia koi pati ai : I le aso nei, kapau e kotou logo ki lona leo, Aua na kotou fakafefeka okoutou loto, ofaipe le aso o le agatuu.

¹⁶ Talie, ko ai ma latou ala na agatuu i le sili o lalatou logo ki lona leo ? Pe leaise ko latou fuli ala na mavae mei Esipito i le taki a Moisese ?

¹⁷ Ti ko ai ma latou ala na ita loa ki ai le Atua i le lolotoga o fetuu e kau fa ? Pe leaise ko latou ala na agasala loa, ti na vivilo loa olatou tino o mamate i le toafa ?

¹⁸ Ti ko ai ma latou ala na fakapapau loa ki ai le Atua e leaise lotou ulu loa ki lona maloloaga ? Pe leaise ko latou ala na leaise fakalogo ?

¹⁹ Koia e tou tio ai, na leaise mafai loa ke lotou ulu ki lona maloloaga, o tupu ko lolatou tui gataa.