Epelo 2 - Tosi Tapu

Se fakamauli lasi

¹ Koia e tonu ai ke tou asilisili pipiki ki nea ala kua tou logo ki ai, ke aua na tou tafea mamao meia latou i se aso.

² Talie, kapau na mauiga le folafola leia na fakasa e le kau aselo, ti kapau na tautea a maumau fuli mo patigataa fuli,

³ e tou sao feaki loa mo kapau e tou fakanoai le saofaki lasi lena ? Na uluaki fakasa e le Aliki le saofaki lena, ti na fakamaoki a ia kia tatou e latou ala na logo totonu kiate ia ;

⁴ ti na fakamaoki foki le Atua kia latou i ni fakamailoga, mo ni nea fakaofolele, mo ni milakulo kesekese, ti mo ni nea alofa o le Laumalie Maokioki ala na tufaki o mulimuli ki lona finegalo.

Fia fakataulalo o Kilisito

⁵ Talie na leaise tuku e le Atua ke fakalogo ki ni aselo le malama ka au, leia e motou masau ki ai.

⁶ Kae na fakasa e se tasi le fakamaoki leinei : Kolea le tagata, ke ke manatui a ia, Pe ko le vosa o le tagata, ke ke tokaga ai kiate ia ?

⁷ Na ke tuku a ia i se ga temi ikiiki ki lalo o le kau aselo, Na ke fakapala a ia ki le kololia mo le mauiga,

⁸ Na ke tuku nea fuli ki ona tagavae. Talie, i lana tuku ke fakalogo a nea fuli kiate ia, na leaise tuku e le Atua se nea e tasi ke aua na fakalogo kiate ia. Kae i le temi nei e leikiaise tou tio kua fakalogo nea fuli kiate ia.

⁹ Kae ko leia na tuku i se ga temi ikiiki ki lalo o le kau aselo, Sesu, e tou tio kua fakapala a ia ki le kololia mo le fakamauiga, o tupu ko le mate leia na mamae ai ; talie ko le kalasia lena o le Atua ke mamae a ia ki le mate o tupu ko tagata fuli.

¹⁰ Talie na gali mo ia, leia a ana nea fuli, leia e au mei ai a nea fuli, leia na loto ke taki ia ki le kololia ni vosa toka api, ke siki e ia ki le malie tukupau i mamae le Aliki o lotatou fakamauli.

¹¹ Talie ko leia e fakamea ia, ti mo latou ala kua fakamea, e lotou au fuli mei le toka tasi. Koia e leaise luma ai a ia i lolatou fakaigoa ko ona fetaina,

¹² i lana pati : E kau fakasa loa lou igoa ki oku fetaina. Ekau sua fakafetai loa kiate koe i le fakatasi.

¹³ Ti e toe pati a ia : E kau fanaki loa kiate koe. Ti e toe pati foki a ia : Ko leinei au, ko au mo fanau ala na soli mai e le Atua kiate au.

¹⁴ Koia i le kau o fanau ki le toto mo le kanofi, na toe kau foki a ia totonu ki ai, o tupu ke too ai e ia, i lona mate, le makeke o leia na maua ia le makeke o le mate, Satana ;

¹⁵ kae ke fakamauli e ia latou fuli ala na popula i le i ki le mate, i lolatou mauli katoa.

¹⁶ Talie e maoki e leaise au a ia o tokoi ki le kau aselo, kae ki le sakoga o Apalaamo.

¹⁷ Koia na tonu ai ke fakatatau a ia ki ona fetaina i nea fuli, talie ke liliu ai a ia ko se pule fai sakilifisio manavaalofa mo agatonu i lana gaoi i mua o le Atua, ti ke fai e ia le fakamolemole o agasala a le kakai.

¹⁸ Koia o tupu na asiasii a ia ti na fakasalai a ia, e feala ke tokoi ai a ia kia latou ala e asiasii.