Epelo 13 - Tosi Tapu

Fakamakeke kesekese

¹ Ke kotou kataki fualoa i le alofa fakatautaina.

² Aua na kotou galoi le fakaafe o kaiga matapule ; talie i le fai o le nea lena, na fakaafe ai e ni iki ni aselo kae e leaise lotou iloa a ia.

³ Kotou manatui le kau pilisoni, o sakinake e kotou pilisoni foki ; kotou manatui latou ala e fakavelivelii o sakinake e kotou tino tasi mo latou.

⁴ Kotou fakaapaapa fuli ki le nofo avaga, ti ke agatonu le taumatua, talie e fakamaaui loa e le Atua latou ala e fai feauaki mo tono.

⁵ Ke aua na manumanu ki le paaga ; kae ke kotou fiafia i le nea leia e kotou maua, talie kua pati le Atua totonu : E leaise kau tuku loa a koe, ti e leaise kau tiaki loa a koe

⁶ Koia e mafai ai ke tou pati makeke ai : Ko le Aliki ko loku tokoi, e leaise kau i loa ki se nea ; Kolea e mafai e se tagata kiate au ?

⁷ Kotou manatui okoutou kau takitaki ala na fakasa ia atu kia koutou le folafola a le Atua ; kotou tio ki le fakaoki o lolatou mauli, ti kotou faifaitaki lalatou tui.

⁸ E tatau Sesu-Kilisito nanafi, mo ailanei, ti mo lee gato.

⁹ Aua na kotou muli i ni akonaki foou mo sala. Talie e malie ke fakafoou okoutou loto e le kalasia, kae e leai e ni lekula o uiga mo ni nea kai ; e leai sona ga aoga fua kia latou ala e muli i ai.

¹⁰ E tou maua se aletale leia e leaise taga kia latou ala e fai ia a gaoi i le tapenakulo ke lotou kai ona nea kai.

¹¹ Ko tino o manu, ala kua momoli olatou toto i le sagatualio e le pule fai sakilifisio ki le agasala, e tutu i fafo o le nofolaga.

¹² Koia na mate ai foki Sesu i le tua kolo, o tupu ke fakamea ai le kakai ki lona toto totonu.

¹³ Koia ke tou mavae o ano mo ia ki le tua kolo, o amo lona matagafua.

¹⁴ Talie e leaise tou maua i lalo nei se kolo leia e tuu mau, kae e tou afa le kolo leia ka au.

Le atolasio maoki mo lona sakilifisio

¹⁵ Koia ke tou momoli tuumau iate ia se sakilifisio o le fakavikiviki ki le Atua, ko lona uiga le fua o ni laugutu ala e fakafetai ki lona suafa.

¹⁶ Aua na kotou galoi le fai nea alofa ti mo le kai solisoli, talie ko sakilifisio ana e fiafia ai le Atua.

Ke fakalogo ki tagata fakasausau

¹⁷ Kotou fakalogo ki okoutou kau takitaki, ti kotou fakaapaapa kia latou, talie e lotou tokaga ki okoutou laumalie ala e fakamaaui ai loa latou i se aso ; kotou fai fenaaki o tupu ke lotou fai lalatou gaoi i le fiafia, kae leai i le lauga, talie e leai sona aoga loa kia koutou.

Fakaalofa

¹⁸ Kotou ulufaki matou ; talie e motou iloa e motou maua se atamai malie, o loto ke malie tuumau a nea fuli ala e motou fai.

¹⁹ E kau kole fakamakeke atu kia koutou ke kotou fai le nea lena, o tupu ke kau toe liliu vave atu kia koutou.

²⁰ Ko le Atua o le tokamalie, leia na toe aumai ia mei le kau mate le tagata tausi ovi lasi o ovi, ki le toto o se sai lee gato, lotatou Aliki ko Sesu,

²¹ ke fakaliliu e ia koutou ke kotou mafai ia a nea fuli ala e malilie, o tupu ke kotou fakasoko lona finegalo ; ti ke fai e ia kia koutou le nea leia e malie kiate ia ia Sesu-Kilisito, leia e tuku ki ai le kololia i sekulo mo sekulo ! Amene !

²² E kau kole atu kia koutou, fetaina, ke kotou tali a kupu fakamakeke anei, talie na kau fai tosi fakatoetoe atu kia koutou.

²³ Ke kotou iloa kua mavae mei le pilisoni lotatou taina ko Timoteo ; kapau e kaku vave mai a ia, ti e kau natu loa mo ia o fakatele atu kia koutou.

²⁴ Fakaalofa ake ki okoutou kau takitaki fuli ti mo le kau sagato fuli. E fakaalofa atu kia koutou latou i Italia.

²⁵ Ke nofo le kalasia mo koutou fuli ! Amene !