Epelo 12 - Tosi Tapu

Sesu : faifaitakiaga malie tukupau

¹ Koia, ko tatou foki, o tupu kua takatakai tatou e se ao lasi o ni tagata fakamaoki, ke tou tiaki a kavega mamafa fuli, ti mo le agasala leia e pipiki gaofie kia tatou, ti ke tou makape i le kataki fualoa i le malae leia kua fakamavaa mai kia tatou,

² o tio fuai kia Sesu ko le kamataaga mo le gatoaga o le tui ; ko ia leia na tali ia a mamae o le koluse, ti na fakanoai ia le luma o le mate lena, talie na tio a ia ki le fiafia leia na tuu i ona mua, ti kua nofo i le lima atamai o le agaiaga o le Atua.

³ Koia, ke kotou tokaga mua ki leia na kataki ia le agatuu lasi lena mei le kau agasala, o tupu ke aua na kotou kaekae mo loto gaegae.

⁴ Talie na leikiaise kotou fakafesagai o kaku ki le mate, o tau ki le agasala.

⁵ Ti kua kotou galoi le akonaki leia kua fai atu kia koutou ofaipe ki ni vosa : Loku vosa, aua na ke fakanoai le akonaki mei le Aliki, Ti aua na ke loto gaegae mo ka valoki e ia a koe ;

⁶ Talie e akonakii e le Aliki leia e alofa a ia ki ai, Ti e taai e ia ki le laakau latou fuli ala e fakamaoki e ia ko ona vosa.

⁷ Kotou kataki le tautea : talie e fai e le Atua kia koutou ofaipe ni vosa ; talie ko le vosa fea leia e leaise tautea e lona tamana ?

⁸ Kae kapau e leaise kotou kau i le tautea leia e kau ki ai a vosa fuli, ti e ko ni toe vao koutou, kae e leaise ko ni vosa maoki koutou.

⁹ Tou manatui o tou tamana fakatino : na lotou tautea tatou, ti na tou fakaapaapa kia latou. Pe leaise tonu ke toe lasi ake latatou fakalogo ki le Tamana o laumalie, o tupu ke tou maua le mauli ?

¹⁰ Talie e maoki na tautea tatou e otatou tamana i ni ga aso teiki fua, ofai ki le nea leia e lotou malie ia ; kae e tautea tatou e le Atua i le nea leia e aoga kia tatou, o tupu ke tou kau ki lona maokioki.

¹¹ E maoki e leaise se fiafia i le tautea, kae ko le mamae ; kae ki muli ake e fakatupu loa e ia se fua malie o le tokamalie mo le maokioki kia latou ala kua akonakii fenaaki.

¹² Koia ke kotou fakamakeke okoutou lima kua tau, Ti mo okoutou tuli kua gagae ;

¹³ ti ke kotou muli ki okoutou vae i ni ala sasako, o tupu ke aua na sese le vae leia kua kito, kae ke toe fakamakeke a ia.

¹⁴ Ke kotou afa le tokamalie mo le kakai fuli, ti mo le maokioki, talie sala mo ia e leaise tio loa se tasi ki le Aliki.

¹⁵ Ke kotou tokaga na tausala se tasi i le kalasia o le Atua, ti ke aua na i ai fua se aka kona, leia e somo ai ni uli mo fakatupu ia se mamae, ti ke kelekele ai se toka api.

¹⁶ Ke kotou tokaga na i ai se tasi e fai feauaki, pe ko se tasi e lee fakaapaapa ki nea tapu ofaipe Esau, leia na fakatau ia lona tapuaki o le uluaki vosa ki se nea kai e tasi.

¹⁷ E kotou iloa, ki muli ake, na toe fia maua loa e ia le tapuaki, kae na tiaki loa a ia, logo ai lana afa a ia i ni tagi loimata ; talie na leaise mafai loa e ia ke toe fakaliliu a manatu loto o lona tamana.

E leaise fakafeofi le kilisiteano ki Sinai (lao), kae ki Sione (Evaselio)

¹⁸ Ko koutou, na leaise kotou fakafeofi ki se mauga leia na feala ke fafa ki ai ti na ulaula i le afi, pe ki le ao, pe ki le fakapouli, pe ki le afa,

¹⁹ pe ki le tagi o fakatagi pupusi, pe ki le logoa o masau, o tupu ai le kole e latou ala na logo ki nea ana ke aua na toe masau ake kia latou ;

²⁰ talie na leaise mafai ke lotou tali le fakatotonu leinei : Ke tuki loa ki fatu a manu fuli ala e lave loa ki le mauga.

²¹ I le fakaii ai o le nea lena na lotou tio ki ai, na pati loa Moisese : Kua kau matuaki i, mo lulu katoa !

²² Kae kua kotou fakafeofi ki le mauga o Sione, ki le kolo o le Atua mauli, ki le Selusalemi i Selo, ki miliate mo miliate o le kau aselo,

²³ ki le fakatasi o le kau uluaki tupu ala kua tosi i le atu lagi, ki le tui fakamaau leia ko le Atua o tagata fuli, ki laumalie o le kau agatonu ala kua kaku ki le malie tukupau,

²⁴ kia Sesu leia ko le tagata fakasoko pati o le sai foou, ki le toto o le afusi leia e masau malie ake i le toto o Apele.

²⁵ Kotou tokaga ke aua na kotou fakafiti ki leia e masau atu kia koutou ; talie kapau na leaise sao latou ala na fakafiti loa ke logo ki leia na fakasa ia ni folafola i le malama nei, e feaki ake loa ke tou sao mo kapau e tou titua ki leia e masau mei le lagi,

²⁶ a ia leia na lui ia loa le malama nei ki lona leo i mua, kae kua fai ia kia tatou i le temi nei le fakapapau leinei : i se tasi faiaga e kau lui ai loa o leaise gato fua i le malama nei, kae mo le lagi foki.

²⁷ Ko kupu anei : " i se tasi faiaga " e fakasa ia le fetogi o nea ala kua lui, o sakinake na fakatupu latou o fakatemi, kae ke tuu o talu oki a nea ala e leaise mafai ke lui.

²⁸ Koia o tupu kua tou maua se puleaga leia e leaise mafai ke lui, ke tou fakasa lotatou fakafetai o tuku ki le Atua se atolasio leia e malie kiate ia, i le alofa ti mo le i ;

²⁹ talie ko lotatou Atua ko se afi maumau foki a ia.