Epelo 11 - Tosi Tapu

Ko le mauiga kese o le mauli i le tui : Le kau fakamaoki o le tui

¹ Io, ko le tui ko se iloa papau o nea ala e amanaki ki ai, ko se fakamaoki o nea ala e leaise tio ki ai.

² Talie na lotou maua a ia, na tuku e le Atua se fakamaoki malie ki le kau matua i le temi mua.

³ Ko le tui leia e tou iloa ai na fakatupu le malama nei e le folafola a le Atua, ti ko le nea leia e tio ki ai na leaise fakatupu a ia ki ni nea ala e tio ki ai.

Apele

⁴ Ko le tui leia na momoli ai e Apele ki le Atua se sakilifisio leia e malie tukupau ake i leia a Kaino ; ko le tui leia na fakasa ai a ia ko le agatonu, o tali e le Atua ana moliga ; ko le tui leia koi masau ai a ia, logo ai kua mate.

Enoke

⁵ Ko le tui leia na ave ai Enoke, ke aua na tio a ia ki le mate, ti na leaise toe sa loa a ia talie na ave a ia e le Atua ; kae i mua o lona ave, na maua e ia le fakamaoki na malie a ia ki le Atua.

⁶ Io, sala mo le tui, e leaise feala ke malie se tasi ki le Atua ; e tonu ko leia e fakafeofi ki le Atua ke tui a ia e i ai se Atua, ti ko ia leia e fakapale ia latou ala e afa ia a ia.

Noe

⁷ Ko le tui leia na fakalogo ai a Noe ki valoki a le Atua o uiga mo nea ala ka soko kae na leaise tio ki ai, ti na i loa a ia ki le Atua, o fau loa se aleka ke fakamauli ai lona famili ; ko le tui lena na fakasa ia loa e ia le veli o le malama nei, ti na liliu loa a ia ko le tagata maua tofiga o le faitotonu leia e maua i le tui.

Apalaamo mo Sala

⁸ Ko le tui leia na fakalogo ai loa Apalaamo ki le kalaga a le Atua, ti na ano ai loa a ia ki se fenua leia e tonu ke maua tofiga e ia, ti na ano loa a ia kae na leaise iloa e ia le ganea leia na ano a ia ki ai.

⁹ Ko le tui leia na ano ai loa a ia o nofo i le kele o le fakapapau ofaipe i se kele matapule, o nofo i ni falela mo Isaake, mo Sakopo, ala na maua tofiga mo ia le fakapapau e tasi ;

¹⁰ talie na talitali a ia ki le kolo leia e maua ia ni fakatafito makeke, le kolo leia na laga ti na gaoi e le Atua totonu.

¹¹ Ko le tui leia na mafai ai e Sala, logo ai kua finematua, ke fanaui se sakoga, talie na tui a ia ki le agatonu o leia na fai ia le fakapapau.

¹² Koia leia, mei se tagata e tasi, kua popo foki lona tino, na tupu loa se sakoga toka api ofaipe fetuu o le lagi, ti mo le one o le mata tai leia e leaise feala ke lau.

¹³ Ko le tui leia na lotou mamate fuli ai, kae na leaise lotou maua ia a nea ala na fakapapau ake kia latou ; kae na lotou tio mo taukalo mei mamao kia latou, ti na lotou fakasa e lotou matapule mo fanoga i le malama nei.

¹⁴ E fakasa e latou ala e masau fenaaki e lotou afa se fenua.

¹⁵ Kapau na lotou tio ki le fenua leia na lotou mavae mei ai, na faigaofie fai ke lotou toe liliu ki ai.

¹⁶ Kae ko leinei e lotou oli ki se fenua malie tukupau ake, leia i le lagi. Koia na leaise luma ai le Atua i lona fakaigoa a ia ko lolatou Atua, talie na teuteui e ia se kolo mo latou.

¹⁷ Ko le tui leia na momoli ai loa e Apalaamo a Isaake, i lona asiasii, ti na momoli loa e ia lona vosa fuatasi, leia na tuku ki ai a fakapapau,

¹⁸ ti na pati ki ai : Ia Isaake e ke maua loa se sakoga leia e fakaigoa loa ki lou igoa.

¹⁹ Na manatu a ia e mafimafi ai le Atua, o toe fakatuuake ia le kau mate ; koia i se fakatata na toe maua loa e ia lona vosa.

Isaake

²⁰ Ko le tui leia na tapuaki ai loa Isaake kia Sakopo mo Esau o uiga mo nea ka soko mai.

Sakopo

²¹ Ko le tui leia na tapuaki ai loa Sakopo, i lana teuteu ke mate, ki vosa taki tasi o Sosefo, ti mo atolasio, o fafanaki ki le potupotu o lona tokotoko.

Sosefo

²² Ko le tui leia na masau ai loa Sosefo, i lana teuteu ke mate, ki le mavae o vosa o Iselaele, ti na tuku ai loa e ia a fakatotonu o uiga mo ona ivi.

Matua o Moisese

²³ Ko le tui leia na fufu ai loa a Moisese, i lona tupu, e ona matua i masina e tolu, talie na la tio loa na fulumalie le toe, ti na leaise la i loa ki le fakatotonu a le sau.

Moisese

²⁴ Ko le tui leia na fakafiti ai loa Moisese, i lona lasi, ke fakaigoa a ia ko le vosa o le taine o Falaone ;

²⁵ Na filifili loa e ia lona fakavelivelii mo le kakai o le Atua i lana maua fakatemi le fiafia o le agasala ;

²⁶ Na tio loa a ia ki le matagafua o Kilisito ofaipe se koloa leia e lasi ake i koloa o Esipito, talie na pipiki ona mata ki le fakapale.

²⁷ Ko le tui leia na mavae ai loa a ia mei Esipito, o leaise i fua a ia ki le ita o le sau ; talie na tuu makeke loa a ia, o sakinake na tio a ia ki leia na leaise tio ki ai a mata.

²⁸ Ko le tui leia na momoli ai loa e ia le Pasikate, ti na afusi ai loa e ia le toto, o tupu ke aua na fafa le tagata tukipo ki fanau uluaki a le kau Iselaele.

²⁹ Ko le tui leia na lotou fakalaka ai loa i le tai Kula, ofaipe i se ganea malo, kae na folo loa e le tai le kau Esipito, leia na asiasi ke fakalaka i ai.

Sosue mo Seliko

³⁰ Ko le tui leia na solo ai loa a paa o Seliko i le oki o lona folii takai i aso e fitu.

Laape

³¹ Ko le tui leia na leaise mate ai loa Laape, le fafine faiaga, mo latou ala na leaise tui, talie na tali malie e ia le sa esipio Iselaele.

Mo ni iki kau toa toka api o le tui

³² Ti kolea se tasi ake a nea ke kau toe pati ki ai ? Talie leaise kau maua se temi ke masau ai kia Seteone, mo Palaki, mo Samisoni, mo Sefete, mo Tavite, mo Samuele, ti mo le kau polofeta :

³³ I le tui, na lotou malo loa i ni puleaga, mo fai loa ni fakamaau, mo maua loa ni fakapapau, mo tapono loa le gutu o laione,

³⁴ mo tamate loa le makeke o le afi, mo sao loa mei le mata o le seleta, mo mauli loa i ni masaki, mo toa loa i le tau, mo tuli loa ni kau tau matapule.

³⁵ Na toe maua loa e ni fafine olatou mate i le toe tuuake ; Ti na fakavelivelii loa ni iki, o leaise lotou tali loa se saofaki, o tupu ke maua se toe tuuake leia e malie tukupau ake ;

³⁶ Na tali loa e ni iki a nukinuki, mo le suipi, mo tini, ti mo le pilisoni ;

³⁷ Na tuki fatui loa latou, mo sele ki ni tutuu, mo fakavelivelii ; na tamate latou ki le seleta ; na lotou feanoaki o lava ki ni kilii ovi mo ni kilii koti, ti na lotou mativa i nea fuli, mo mamae, ti mo vesiainai.

³⁸ Latou ala na leaise gali le malama nei mo latou ! Na lotou sola saele loa i toafa ti mo mauga, i ana ti mo popoko o le kele.

³⁹ Ko latou fuli ana, ala na fakamaoki le Atua ki lalatou tui, na leaise lotou maua le nea leia na fakapapau kia latou.

⁴⁰ O tupu na teuteui e le Atua se nea leia e malie tukupau ake kia tatou, o tupu ke aua na lotou kaku ki le malie tukupau sala mo tatou.