Epelo 10 - Tosi Tapu

6) e lasi ake le sakilifisio o le sai foo i sakilifisio fuli o le sai afea

¹ Ko le lao, leia e maua ia se ata o nea malilie ka au, kae leai le maoki totonu o nea, e leaise mafai ia i se aso ke ave ia ki le malie tukupau latou ala e fakafeofi ki le Atua, talie e tonu ke fai tuumau a sakilifisio ana, i fetuu fuli.

² Talie ka na mafai ke fakamea tua tasi a agasala a latou ala e momoli ia a sakilifisio ana, kua fualoa ake le fakagato o le momoli o sakilifisio, talie kua puli loa i olatou loto le manatui o alatou agasala.

³ Kae e fakafoou e sakilifisio ana i fetuu fuli le fakamanatu o agasala.

⁴ Talie e leaise feala ai ke too ia a agasala e le toto o pipi tagata ti mo koti.

⁵ Koia na pati ai Kilisito, i lana au ki le malama nei : Na leaise ke loto ki se sakilifisio pe ko se moliga, Kae na ke fau se tino kiate au ;

⁶ Na leaise ke tali ni failaulau pe ko ni sakilifisio ki le agasala.

⁷ Koia na kau pati ai : Ko leinei, e kau au, (Talie na tosi i le takaiga tosi kiate au) Ofai, ei Atua, lou finegalo.

⁸ Na uluaki pati mua a ia : Na leaise ke loto ti na leaise ke tali ni sakilifisio pe ko ni moliga, Ni failaulau pe ko ni sakilifisio ki le agasala,

⁹ (nea na e momoli i le lao), na toe pati loa a ia : Ko leinei, e kau au Ofai lou finegalo. E soloi e ia i lena le uluaki nea ke fakatuu le lua.

¹⁰ Ti e tupu ko le finegalo lena kua tou soko ai o maokioki ki le momoli o le tino o Sesu-Kilisito, tua tasi fuai.

¹¹ Ti e tuu i aluga a tagata fai sakilifisio fuli i aso taki tasi o fai lana gaoi, ti e momoli tuumau e ia a sakilifisio tatau, ala e leaise mafai ke too ia i se aso a agasala.

¹² Kae ko Kilisito, i le oki o lana momoli se sakilifisio e tasi ki agasala, na nofo a ia o lee gato i le lima atamai o le Atua ;

¹³ ti e talitali a ia talu mei ai ke soko ona fili ko lona tekiaga vae.

¹⁴ Talie, i se failaulau e tasi, na ave e ia ki le malie tukupau o lee gato latou ala kua fakamaokioki.

¹⁵ Kua fakamaoki foki ki ai le Laumalie Maokioki ; talie i le oki o le pati :

¹⁶ Ko leinei le sai leia e kau fai loa mo latou, Ka sili aso ana, e pati le Aliki : Ekau tuku loa aku lao ki olatou loto, Ti e kau tosi loa latou i olatou laumalie, na toe soko atu a ia :

¹⁷ Ti e leaise kau toe manatui loa alatou agasala mo alatou agaveli.

¹⁸ Talie i le ganea leia e maua ai le fakamolemole o agasala, e leaise toe maua ai loa se sakilifisio ki le agasala.

Ke tuu makeke i le tui

¹⁹ Koia, fetaina, kua tou maua i le toto o Sesu-Kilisito le lauatea ke tou ulu ai ki le sagatualio,

²⁰ i le ala foou mo mauli leia kua fakamavaa e ia kia tatou i le kie puipui, leia ko lona tino,

²¹ ti kua tou maua se pule fai sakilifisio leia kua fakanofo i le fale o le Atua ;

²² Koia ke tou fakafeofi ai i se loto maoki, mo se amanaki makeke o le tui, ti mo ni loto kua fakamea mei se atamai veli, ti mo le tino kua fufulu ki se vai mea.

²³ Ke tou taofi makeke le fakasa o latatou amanaki malie, talie e agatonu leia na fai ia le fakapapau.

²⁴ Ke tou fetokagaaki ia tatou ke ekenaki tatou ki le alofa ti mo gaoi malilie.

²⁵ Ke aua na tou tiaki latatou fakatasi ofaipe le fai masani a ni iki, kae tou feakonakiaki ia tatou, ti e toe asilisili ake le nea lena kua kotou tio kua ofi mai le aso.

Ke fakatokaga ki le kau tui gataa : ka sala Kilisito ti ko le fakamaau

²⁶ Talie kapau e tou agasala i lotatou loto faifaitalisa kae kua tou maua le iloa o le maoki, e leaise koi toe loa se tasi ake failaulau ki le agasala,

²⁷ kae ko se talitali fakaii ki le fakamaau ti mo se afi kaka leia e tutu ia loa le kau fili o le Atua.

²⁸ Ko leia na maumaui ia le lao a Moisese, e tamate a ia i le fakamaoki a se toka lua pe ko se toka tolu.

²⁹ Ti e kotou manatu e feaki ake loa le tautea fakaveli o leia e takatakafi ia loa ki ona vae le Alo o le Atua, ti mo fakanoai ia loa le toto o le sai leia na fakamea ia a ia, ti mo lauveli loa ki le Laumalie o le kalasia ?

³⁰ Talie e tou iloa leia kua pati : A aku le lagavaka, a aku le totogi ! ti na toe pati : E fakamaaui loa e le Aliki lona kakai

³¹ Ko se nea fakaii ai le vilo ki lima o le Atua mauli.

³² Kotou manatui a uluaki aso i mua, i le oki o lokoutou fakamalamai, na kotou kataki se tau lasi i loto malie o mamae.

³³ I le tasi a potu, na fakamatagafua mo fakamamae ni iki i mua o le kakai, kae i le tasi a potu na tokoi ni iki kia latou ana na fakavelivelii.

³⁴ Io, na kotou maua le manavaalofa kia latou ala na pilisoni, ti na kotou tali i le loto fiafia ke too o okoutou koloa, talie e kotou iloa e kotou maua loa ni koloa malilie tukupau mo tologa tuumau.

³⁵ Koia ke aua na kotou tiaki lakoutou tui makeke, leia e pipiki ki ai se fakapale lasi.

³⁶ Talie e aoga kia koutou le kataki fualoa, o tupu, ka oki loa lakotou fai le finegalo o le Atua, ke kotou maua le nea leia kua fakapapau atu kia koutou.

³⁷ Talie koi toe fua se ga temi ikiiki, se ga temi noa ! Ti ko leia e tonu ke au, e au loa, ti e leaise tuvai loa a ia.

³⁸ Ti e mauli loa laku tagata agatonu i le tui. Kae kapau e solomuli a ia, e leaise fiafia loa loku laumalie iate ia.

³⁹ Ko tatou, e leaise tou kau kia latou ala e toe liliu ki muli ke pulinoa, kae e tou kau kia latou ala e maua ia le tui ke saofaki ai olatou laumalie.