Epelo 1 - Tosi Tapu

Ko le Atua na masau i lona Alo

¹ I mua, na masau le Atua i ni temi kesekese ti mo ni fai kesekese ki otatou tamana i le kau polofeta,

² i temi fakamuli anei, kua masau le Atua kia tatou i le Alo ; ti kua fakanofo e ia a ia ke maua tofiga a nea fuli ; iate ia na fakatupu foki e ia le malama nei.

³ Ko le Alo ko le malama a ia o lona kololia ti ko le tatau a ia o lona agai, ti e taofi e ia a nea fuli ki lana folafola mafimafi. Kua fai e ia le fakamea o agasala, ti kua ekeeke a ia i le fetuu atamai o le lima atamai o le Atua i ganea taualuga.

E taualuga ake le Alo i le kau aselo

⁴ Kua taualuga lasi ake a ia i le kau aselo, talie kua maua e ia se igoa leia e taualuga lasi ake i olatou igoa.

⁵ Talie ko ai i le kau aselo kua pati ki ai le Atua : Ko loku Alo a koe, Kua kau fakatupu a koe i le aso nei Ti e toe pati foki : E kau liliu loa ko se tamana kiate ia, ti e liliu loa a ia ko se vosa kiate au.

⁶ Ti i lana fakaulu le uluaki tupu ki le malama nei, na toe pati a ia : Ke atolasio kiate ia a aselo fuli o le Atua

⁷ Ti na toe pati a ia ki le kau aselo : E fakagaoi e ia ana aselo ofaipe ni matagi ti mo ana kau fakasausau ofaipe se ulai afi

⁸ Kae na pati a ia ki le Alo : Ko lou ekeekeaga fakasau, ei Atua, e lee gato ; Ko le tokotoko o lou pule ko se tokotoko maokioki ;

⁹ Kua ke alofa ki le faitotonu, ti kua ke vesia ki le agasala ; Koia, ei Atua, ko lou Atua na pani ia a koe Ki se lolo o le fiafia o lasi ake i ou kaukaunea.

¹⁰ Ti e toe pati : Ko koe, ei Aliki, na ke teki i le kamataaga le fakatafito o le malama nei, Ti ko le atu lagi ko le gaoiaga o ou lima ;

¹¹ E lotou pupuli loa, kae e ke agai ai fuai ; Elotou popo fuli loa ofaipe se kofu,

¹² E ke takatakai loa latou ofaipe se taupulupulu, ti e lotou fetogi loa ; Kae ko koe, e ke tatau ai fuai, Ti e leaise toe gato loa ou fetuu.

¹³ Ti ko ai loa i le kau aselo kua pati ki ai le Atua : Ke ke ekeeke i loku fetuu atamai Okaku ke kau fakaliliu ou fili ko lou tekiaga vae ?

¹⁴ Pe leaise ko ni laumalie fuli latou, ala e tausi ki le Atua, ti kua kakau ke gaoi kia latou ala e tonu ke maua ia le mauli lee gato ?