Ekesote 9 - Tosi Tapu

Mamate o kau manu

¹ Na pati loa le Eteleno kia Moisese : Ano kia Falaone, ti ke pati loa kiate ia : Ko leinei le folafola a le Eteleno, le Atua o le kau Epeleo : tuku loku kakai ke ano, ke lotou tausi kiate au.

² Kapau e leaise ke tuku loa le kakai ke ano, ti kapau e ke toe taofi loa a ia,

³ e to loa le lima o le Eteleno ki au kau manu ala e nonofo i faisaga, ki osi, mo asino, mo kamelo, mo pipi, ti mo ovi ; e lasi loa le mamate.

⁴ E vaei kese loa e le Eteleno a kau manu a Iselaele mei kau manu a le kau Esipito, ti e leaise mate loa se manu fua e tasi i manu fuli a fanau a Iselaele.

⁵ Na fakatotonu loa e le Eteleno le aso, o pati : I apogipogi, e fakasoko loa e le Eteleno le nea lena i le fenua.

⁶ Ti na fai loa e le Eteleno le nea lena i leia ake a aso. Na mamate loa a kau manu fuli a le kau Esipito, kae na leaise mate fua se manu e tasi i kau manu a fanau a Iselaele.

⁷ Na afaafa loa e Falaone le nea leia na soko ; ti ko leinei na leaise mate fua se manu e tasi i kau manu a Iselaele. Kae na fakafefeka loa e Falaone lona loto, ti na leaise tuku loa e ia le kakai ke ano.

Papala i tagata mo manu

⁸ Na pati loa le Eteleno kia Moisese mo Alone : Kolua fakaapele okoulua lima ki le mugalafu o le gutuumu, ti ke laku loa e Moisese le mugalafu lena ki le lagi, i mua o Falaone.

⁹ E liliu loa le mugalafu lena ko se efu leia e kofu ia loa le fenua katoa o Esipito ; ti e fakatupu loa e le efu lena ni fakafufula mo ni papala i tagata mo manu o le fenua katoa o Esipito.

¹⁰ Na too loa e Moisese mo Alone se mugalafu o se gutuumu, ti na la ano loa ki mua o Falaone. Na laku loa e Moisese le mugalafu ki le lagi, ti na mafuta loa i tagata mo manu ni fakafufula mo ni papala.

¹¹ Na leaise feala loa ke sa a tagata fai nea fakatalatupua i mua o Moisese, o tupu ko papala, talie na kaku foki a papala ki tagata fai nea fakatalatupua ofaipe le kau Esipito katoa.

¹² Na fakafefeka loa e le Eteleno le loto o Falaone, ti na leaise fakalogo loa Falaone kia Moisese mo Alone, o mulimuli ki le nea leia na fakasa e le Eteleno kia Moisese.

Ua fatu mo le afi

¹³ Na pati loa le Eteleno kia Moisese : Tuu koi usu, ti ke ano ki mua o Falaone. E ke pati loa kiate ia : Ko leinei le folafola a le Eteleno, ko le Atua o le kau Epeleo : tuku loku kakai ke ano, o tupu ke tausi a ia kiate au.

¹⁴ Talie, i le faiaga loa leinei, e kau tuku fuli loa aku tautea ki lou loto, ki au tagata fakasausau, ti mo lou kakai, o tupu ke ke iloa e leaise tatau se tasi mo au i le malama nei katoa.

¹⁵ Kanapau na kau folasi loku lima, o kau tautea a koe ki le mate, a koe mo lou kakai, kua ke puli nei i aluga o le malama nei.

¹⁶ Kae na kau fakamauli a koe, o tupu ke fakasa iate koe loku makeke, ti ke fakamafola loku suafa i le malama nei katoa.

¹⁷ Kapau e ke toe fia malaga ki loku kakai, ti kapau e leaise ke tuku a ia ke ano,

¹⁸ e kau fakato loa apogipogi, i le ola leinei, se ua fatu leia e kese oki ake lona makeke, ti e leikiaise maua sona tatau i Esipito nei, talu mei le fakatuu o Esipito o kaku mai ki le aso nei.

¹⁹ Koia ke ke tanaki ai ki se ganea malumalu au kau manu mo au nea fuli ala e maua i faisaga. E to loa le ua fatu ki tagata fuli mo manu fuli ala e maua i faisaga ti na leaise fakaulu ki fale, ti e lotou mamate loa.

²⁰ Ko latou ala i tagata fakasausau a Falaone na i loa ki le folafola a le Eteleno, na fakaulu ia loa ki olatou fale alatou tagata fakasausau mo alatou kau manu.

²¹ Kae ko latou ala na leaise too fakamalotoloto ia le folafola a le Eteleno, na tuku ia loa alatou tagata fakasausau mo alatou kau manu i faisaga.

²² Na pati loa le Eteleno kia Moisese : Siki lou lima ki le lagi, ti ke to se ua fatu i le fenua katoa o Esipito ki tagata, mo manu, ti mo mutie fuli o faisaga, i le fenua o Esipito.

²³ Na siki loa e Moisese lona tokotoko ki le lagi, ti na tuku loa e le Eteleno ni mana mo se ua fatu ; ti na taka loa le afi i aluga o le fenua. Na fakato loa e le Eteleno se ua fatu ki le fenua o Esipito.

²⁴ Na to loa se ua fatu, ti na filo loa le afi mo le ua fatu ; na kese ai le makeke o le ua fatu lena, na leikiai sona fakatatau i le fenua katoa o Esipito, talu mei lona tuu ko se puleaga.

²⁵ Na to loa le ua fatu i le fenua katoa o Esipito, ki nea fuli ala na maua i faisaga, ki tagata o kaku ki manu. Na maumaui loa e le ua a mutie fuli o faisaga, ti na fatifatii loa e ia a laakau fuli o faisaga.

²⁶ Na gato fai ki le fenua o Koseni, leia na nofo ai fanau a Iselaele, na leaise to ai loa se ua fatu.

²⁷ Na kalagai loa e Falaone a Moisese mo Alone, o pati kia laua : I le faiaga loa leinei, kua kau agasala ; E maokioki le Eteleno, kae kua motou agasala, au mo loku kakai.

²⁸ Kolua kole ki le Eteleno ke taofi le mana mo le ua fatu ; ti e kau tuku loa koutou ke ano, talie e leaise kau toe taofi loa koutou.

²⁹ Na pati loa Moisese kiate ia : Ka kau mavae loa i le kolo, e kau siki loa oku lima ki le Eteleno, ti e tuku loa a mana, ti e leaise toe to loa se ua fatu, o tupu ke ke iloa e fakalogo le malama nei ki le Eteleno.

³⁰ Kae e kau iloa ko koe mo au tagata fakasausau, e leaise kotou i loa ki le Eteleno Atua.

³¹ Na maumau loa le lino mo le olese, talie kua kamata fua le olese, ti kua kamata se le lino.

³² Kae na leaise maumau loa le fulumeto mo le epote talie na leikiaise la sosomo ake.

³³ Na mavae loa Moisese mei le fale o Falaone, o ulu mei le kolo ; ti na siki loa e ia ona lima ki le Eteleno, ti na gato loa le mana mo le ua fatu ; ti na leaise toe to loa le ua ki le kele.

³⁴ I le tio a Falaone kua gato le ua, mo le ua fatu, ti mo le mana, na toe soko atu loa e ia lana agasala, o toe fakafefeka lona loto, o ona mo ana tagata fakasausau.

³⁵ Na fakafefeka loa le loto o Falaone, ti na leaise tuku loa e ia fanau a Iselaele ke ano, o mulimuli ki le nea leia na fakasa e le Eteleno kia Moisese.