Ekesote 8 - Tosi Tapu

¹ Na pati loa le Eteleno kia Moisese : Pati kia Alone : Siki lou lima mo lou tokotoko ki liua lalasi, mo liua liliki, mo vaivailiua, mo vai tanaki, ti ke fakapale mei ai a kelenui ki le fenua o Esipito.

² Na siki loa e Alone lona lima ki vai o Esipito ; ti na pale loa mei ai a kelenui, o mafolafola i le fenua katoa o Esipito.

³ Kae na toe fai foki e le kau fai nea fakatalatupua o Esipito le nea lena ki alatou nea fakatemonio. Na lotou fakapale foki a kelenui ki le fenua o Esipito.

⁴ Na kalagai loa e Falaone a Moisese mo Alone, o pati : Kolua kole ki le Eteleno ke fakamamao a kelenui meiate au mo loku kakai ; ti e kau tuku loa le kakai ke ano o momoli ni sakilifisio ki le Eteleno.

⁵ Na pati loa Moisese kia Falaone : Tuku mai kiate au au fakatotonu ! Ko le aso fea leia e kau faikole ai loa ki le Eteleno o uiga mo koe, mo au tagata fakasausau ti mo lou kakai, ke fakamamao ai a kelenui meiate koe mo ou fale ? E toe loa ki kelenui fai ala i le vaitafe.

⁶ Na tali loa Falaone : Ko apogipogi. Ti na pati loa Moisese : E fai ki ai, ke ke iloa e leaise tatau se tasi mo le Eteleno, lomatou Atua.

⁷ E fakamamao loa a kelenui meiate koe mo ou fale, mei au tagata fakasausau mo lou kakai ; e toe loa fua ki kelenui o le vaitafe.

⁸ Ti na mavae loa Moisese mo Alone mei le fale o Falaone. Ti na kalaga loa Moisese ki le Eteleno o uiga mo kelenui ala na tautea ki ai Falaone.

⁹ Ti na fai loa e le Eteleno le nea leia na kole e Moisese ; ti na mamate loa a kelenui i loto o fale, mo malae, ti mo faisaga.

¹⁰ Na tanaki loa latou o fakatuuga, ti na sauga veli loa le fenua katoa.

¹¹ I le tio a Falaone kua maua se fimalie, na toe fakafefeka loa e ia lona loto, ti na leaise fakalogo loa a ia kia Moisese mo Alone, o fai ki le nea leia na pati ki ai le Eteleno.

Kutu

¹² Na pati loa le Eteleno kia Moisese : Pati kia Alone : Siki lou tokotoko o taai le efu o le kele ; ti e liliu loa le efu ko ni kutu i le fenua katoa o Esipito.

¹³ Ti na la fai loa ki ai. Na falo loa e Alone lona lima mo le tokotoko o taai le efu o le kele ; ti na liliu loa le efu ko ni kutu i tagata fuli mo manu fuli. Na liliu loa le efu katoa o le kele ko ni kutu i le fenua katoa o Esipito.

¹⁴ Kae na fakaaoga foki e le kau fai nea fakatalatupua alatou nea fakatemonio ke tupu ai ni kutu ; kae na leaise lotou mafai loa a ia. Na mafola loa a kutu i tagata mo manu.

¹⁵ Na pati loa le kau fai nea fakatalatupua kia Falaone : Ko le maikao leinei o le Atua ! Kae na fakafefeka loa e Falaone lona loto, ti na leaise fakalogo loa a ia kia Moisese mo Alone, o mulimuli ki le nea leia na pati ki ai le Eteleno.

Lago uti kona

¹⁶ Na pati loa le Eteleno kia Moisese : Ano koi usu ki mua o Falaone ; e ulu loa a ia o ano ki le vai. E ke pati loa kiate ia : Ko leinei le folafola a le Eteleno : tuku ke ano loku kakai, ke lotou tausi kiate au.

¹⁷ Kapau e leaise ke tuku ke ano loku kakai, ti e kau kakau mai loa a lago utiuti kiate koe, mo au tagata fakasausau, mo lou kakai, ti mo ou fale ; e apele loa a fale o le kau Esipito i lago, ti e uli loa le kele i lago.

¹⁸ Kae, i le aso lena, e kau fakamailoga kese loa le fenua o Koseni leia e nofo ai loku kakai ; e leaise maua loa i ai se fa lago, o tupu ke ke iloa ko au ko le Eteleno, e kau nofo i loto o le fenua lena.

¹⁹ E kau fai loa se fakamailoga i loku kakai mo lou kakai. Ti e soko loa le fakamailoga lena i apogipogi.

²⁰ Na fai fenaaki loa e le Eteleno. Na ulu loa se kau lago utiuti ki le fale o Falaone mo ana tagata fakasausau, ti na maumaui loa e lago le fenua katoa o Esipito.

²¹ Na kalagai loa e Falaone a Moisese mo Alone, o pati kia laua : Kotou ano o momoli ni sakilifisio ki lokoutou Atua i le fenua.

²² Na tali loa Moisese : E leaise malie le nea lena ; talie e motou momoli loa ki le Eteleno, lomatou Atua, ni sakilifisio ala e fakalialia ki le kau Esipito. Ti kapau e motou momoli loa i olatou mua ni sakilifisio ala e fakalialia ki le kau Esipito, pe leaise lotou tuki fatui loa matou.

²³ Koia e motou fai ai loa ni aso saele e tolu i le toafa, ti e motou momoli loa ni sakilifisio ki le Eteleno ko lomatou Atua, o mulimuli ki le nea leia e pati loa a ia ki ai.

²⁴ Na pati loa Falaone : E kau tuku loa ke kotou ano, o momoli ki le Eteleno, lokoutou Atua, ni sakilifisio i le toafa ; kae e leaise kotou ano mamao loa mo ka kotou ano ; ti ke kotou ulufaki au.

²⁵ Na tali loa Moisese : E kau mavae loa i lou fale, ti e kau faikole loa ki le Eteleno. I le aso apogipogi, e fakamamao loa a lago meia Falaone, mo ana tagata fakasausau, ti mo lona kakai. Kae ke aua na toe kaka loa Falaone, o fakafiti ke tuku ke ano le kakai o momoli ni sakilifisio ki le Eteleno.

²⁶ Na ulu loa Moisese ki fafo mei le fale o Falaone, ti na faikole loa a ia ki le Eteleno.

²⁷ Na fai loa e le Eteleno le nea leia na kole e Moisese ; ti na fakamamao loa e ia a lago meia Falaone, mo ana tagata fakasausau, ti mo lona kakai. Na leaise toe maua loa se fa lago fua e tasi.

²⁸ Kae na toe fakafefeka loa e Falaone lona loto, i le faiaga foki lena, ti na leaise tuku loa e ia ke ano le kakai.