Ekesote 7 - Tosi Tapu

¹ Na pati loa le Eteleno kia Moisese : Tio, e kau fakaliliu a koe ko le Atua kia Falaone ; ti ko Alone, lou taokete, e liliu loa ko lau polofeta.

² Ko koe, e ke fakasa loa a nea fuli ala e kau fakatotonu atu kiate koe, ti ko Alone lou taokete, e masau loa kia Falaone, ke tuku fanau a Iselaele ke mavae mei lona fenua.

³ Ti ko au, e kau fakafefeka loa le loto o Falaone, ti e kau liuliuga loa aku fakamailoga mo aku milakulo i le fenua o Esipito.

⁴ E leaise fakalogo loa Falaone kia koulua. E fafa loa loku lima ki Esipito, ti e kau fakamavae loa mei le fenua o Esipito aku kau tau, loku kakai, a fanau a Iselaele, ki ni tautea lalasi.

⁵ E iloa loa e le kau Esipito ko au ko le Eteleno, i le aso leia e kau folasi ai loa loku lima ki Esipito, ti e kau fakamavae loa mei loto malie o latou a fanau a Iselaele.

⁶ Na fai loa e Moisese mo Alone le nea leia na fakatotonu e le Eteleno kia laua : Na la fai loa ki ai.

⁷ Na fetuu kau valu Moisese, ti na fetuu kau valu tupu tolu Alone, i le aso leia na la masau ai kia Falaone.

Fetogi o le tokotoko o gata

⁸ Na pati loa le Eteleno kia Moisese mo Alone :

⁹ Kapau e pati atu loa Falaone kia koulua : Kolua fai se milakulo ! E ke pati loa kia Alone : Too lou tokotoko, o ti a ia ki mua o Falaone. E liliu loa a ia ko se gata.

¹⁰ Na ano loa Moisese mo Alone kia Falaone, ti na la fai loa le nea leia na fakatotonu ake e le Eteleno kia laua. Na ti loa e Alone lona tokotoko ki mua o Falaone mo ana tagata fakasausau ; ti na liliu loa le tokotoko ko se gata.

¹¹ Kae na kalagai loa e Falaone ni tagata poto mo ni tagata faikikite, ala ko tagata fai nea fakatalatupua o Esipito, ti na lotou toe fai loa le nea lena ki alatou nea fakatemonio.

¹² Na lotou ti loa ki le kele olatou tokotoko fuli, ti na lotou liliu loa ko ni gata. Kae na folo loa e le tokotoko o Alone alatou tokotoko.

¹³ Na fakafefeka loa e Falaone lona loto, ti na leaise fakalogo loa a ia kia Moisese mo Alone o mulimuli ki le nea leia na pati ki ai le Eteleno.

Tautea e kau agafulu : le vai na toto

¹⁴ Na pati loa le Eteleno kia Moisese : E fakafefeka loa e Falaone lona loto ; e leaise tali loa e ia ke tuku le kakai ke ano.

¹⁵ Ke ke ano loa kia Falaone koi usu ; e ulu mai loa a ia o ano ki le vaitafe ; ti e ke ano loa ki ona mua i le laugutu o le vaitafe. E ke too loa i lou lima le tokotoko leia na liliu o gata,

¹⁶ E ke pati loa kia Falaone : Ko le Eteleno, le Atua o le kau Epeleo, na kakau ia mai au kiate koe, ke pati atu kiate koe : tuku loku kakai ke ano, o tupu ke lotou tausi kiate au i le toafa. Ti ko leinei, o kaku mai ki le aso nei, na leaise ke fakalogo fua.

¹⁷ Ti ko leinei le folafola a le Eteleno : I le nea leinei e ke iloa ai loa ko au ko le Eteleno. E kau taai loa le vai o le vaitafe ki le tokotoko leia e too i loku lima ; ti e liliu loa le vai o toto.

¹⁸ E mamate loa a ika fuli ala e mauuli i le vaitafe, ti e pala loa le vaitafe, ti e leaise mafai loa e le kau Esipito ke lotou toe inu le vai o le vaitafe.

¹⁹ Na pati loa le Eteleno kia Moisese : Pati kia Alone : Too lou tokotoko, ti falo lou lima ki vai fuli o le kau Esipito, ki olatou vaitafe lalasi, mo olatou vaitafe liliki, mo olatou vai tanaki, mo olatou sosoni, mo olatou tanakiaga vai fuli. E liliu loa a vai fuli o toto ; ti e maua loa le toto i le fenua katoa o Esipito, o kaku ki loto o ipu laakau mo ipu fatu.

²⁰ Na fai loa e Moisese mo Alone le nea leia na fakatotonu e le Eteleno. Na siki loa e Alone lona tokotoko, ti na taai loa e ia le vai o le vaitafe i mua o Falaone mo ana tagata fakasausau ; ti na liliu loa o toto le vai katoa o le vaitafe.

²¹ Na mamate loa a ika ala na mauli i le vaitafe, ti na pala loa le vaitafe ; Na leaise toe mafai loa ke inu le kau Esipito ki le vai o le vaitafe, ti na mafola loa le toto i le fenua katoa o Esipito.

²² Kae na toe fai foki e le kau fai nea fakatalatupua o Esipito le nea lena ki alatou nea fakatemonio. Na fakafefeka loa e Falaone lona loto, ti na leaise fakalogo loa a ia kia Moisese mo Alone, o mulimuli ki le nea leia na pati ki ai le Eteleno.

²³ Na toe liliu loa Falaone ki lona fale ; ti na leaise tokaga loa a ia ki nea ana.

²⁴ Na kenu loa e le kau Esipito katoa ni popoko i tafatafa o le vaitafe, ke maua se vai ke inu ; talie na leaise mafai ke inu le vai o le vaitafe.

²⁵ Na sili loa aso e fitu ki le tautea e le Eteleno o vai o le vaitafe.

Kelenui i le fenua

²⁶ Ti na pati loa le Eteleno kia Moisese : Ano kia Falaone, ti ke pati loa kiate ia : Ko leinei le folafola a le Eteleno : Tuku loku kakai ke ano, o tupu ke lotou tausi kiate au.

²⁷ Kapau e ke fakafiti ke tuku a ia ke ano, ti e kau tautea loa lou fenua katoa ki ni kelenui.

²⁸ E apele loa le vaitafe i kelenui ; e lotou pale loa, ti e lotou ulu loa ki lou fale, ki lou kogafale moe mo lou palepale, ki loto o fale o au tagata fakasausau mo fale o lou kakai katoa, ki loto o au gutuumu pane mo ou ganea lusi falina.

²⁹ E kava loa kelenui iate koe, mo lou kakai, ti mo au tagata fakasausau.