Ekesote 6 - Tosi Tapu

Fakamakeke o Moisese e le Atua

¹ Na pati loa le Eteleno kia Moisese : I le aso nei e ke tio loa ki le nea leia ka kau fai loa kia Falaone ; e fakamakeke loa a ia e se lima makeke ke tuku latou ke ano, ti e fakamakeke loa a ia e se lima makeke ke kapu latou mei lona fenua.

² Ti na toe masau loa le Atua kia Moisese : Ko au ko le Eteleno.

³ Na kau fakasa au kia Apalaamo, mo Isaake mo Sakopo, i loku igoa leia ko le Atua Mafimafi ; kae na leaise lotou iloa au i loku igoa leia ko le Eteleno.

⁴ Na kau fakatuu foki laku sai mo latou, ke soli kia latou le fenua o Kanaane, le fenua leia e lotou fanoga ai, leia na lotou nofo fakatemi ai.

⁵ Kua kau logo ki tagi a fanau a Iselaele, ala e taomi e le kau Esipito i le popula, ti kua kau manatui loa laku fakapapau.

⁶ Koia ke ke pati ki fanau a Iselaele : Ko au ko le Eteleno, e kau fakalauatea loa koutou mei gaoi ala e kotou taomia ai i le kau Esipito, ti e kau saofaki loa koutou mei lalatou popula, ti e kau saofaki loa koutou ki se lima makeke, mo ni tautea lalasi.

⁷ E kau too loa koutou ko loku kakai, ti e kau liliu loa ko lokoutou Atua, ti e kotou iloa loa ko au ko le Eteleno, ko lokoutou Atua, leia e fakalauatea ia koutou mei gaoi ala kua teki kia koutou e le kau Esipito.

⁸ E kau fakaulu loa koutou ki le fenua leia na kau fakapapau ke soli kia Apalaamo, mo Isaake, mo Sakopo ; ti e kau soli loa a ia kia koutou, ko lokoutou fenua, ko au ko le Eteleno.

⁹ Ti na masau fenaaki loa Moisese ki fanau a Iselaele. Kae o tupu ko le mamae mo le mamafa o le popula, na leaise mafai loa ke lotou fakalogo kia Moisese.

¹⁰ Ti na masau loa le Eteleno kia Moisese, o pati :

¹¹ Ano o masau kia Falaone, sau o Esipito, ke tuku e ia ke mavae fanau a Iselaele mei lona fenua.

¹² Na tali loa Moisese ki le Eteleno : Ko leinei foki, na leaise fakalogo fua fanau totonu o Iselaele kiate au : Pe feaki loa ke fakalogo Falaone kiate au, leia e leaise masau malie ?

¹³ Na folafola loa le Eteleno kia Moisese mo Alone, o tuku kia laua ni fakatotonu ki fanau a Iselaele mo Falaone sau o Esipito, ke fakamavae a fanau a Iselaele mei le fenua o Esipito.

Tupuaga o Moisese mo Alone

¹⁴ Ko nei a pule o famili fuli. Vosa o Lupeni, ko le uluaki o Iselaele : ko Enoke, mo Palu, mo Eselone, mo Kalami. Ko famili ana o Lupeni.

¹⁵ Vosa o Simeone : ko Semuele, mo Samine, mo Oate, mo Sakine, mo Tesokale ; mo Saulo, vosa o le fafine Kanaane. Ko famili ana o Simeone.

¹⁶ Ko nei a igoa o vosa o Levi, mo lolatou sakoga : ko Kelesoni, mo Keati, mo Melali. Ko fetuu o le mauli o Levi ko le kau lelau kau tolu tupu fitu.

¹⁷ Vosa o Kelesoni : ko Lipeni, mo Simei, mo ola famili.

¹⁸ Vosa o Keati : ko Amilame, mo Siteseale, mo Epelone, mo Usiele. Ko fetuu o le mauli o Keati ko le kau lelau kau tolu tupu tolu.

¹⁹ Vosa o Melali : ko Makeli mo Musi. Ko famili ana o Levi, mo olatou sakoga.

²⁰ Na avaga loa Amilame mo Sokepete, lona maasaki ; ti na fanaui loa e ia kia Amilame a Alone mo Moisese. Ko fetuu o le mauli o Amilame ko le kau lelau kau tolu tupu fitu.

²¹ Vosa o Siteseale : ko Kole, mo Nefeke, mo Sikili.

²² Vosa o Usiele : ko Misaele, mo Elesafani, mo Sitili.

²³ Na avaga loa Alone mo Elisepa, taine o Aminatape, tuagaane o Nakesone ; ti na fanaui loa e Elisepa kia Alone a Natape, mo Apiu, mo Eleasale, mo Itamale.

²⁴ Vosa o Kole : ko Asili, mo Elekana, mo Apiasafe. Ko famili ana o le kau Kolite.

²⁵ Na avaga loa Eleasale, vosa o Alone, mo se taine o Putiele, ti na fanaui loa e ia kia Eleasale a Finesi. Ko pule ana o famili o le kau Levi, mo olatou famili.

²⁶ Ko le Alone foki lena mo le Moisese lena, ala na pati ki ai le Eteleno : Kolua fakamavae mei Esipito a fanau a Iselaele, o mulimuli ki alatou kau tau.

²⁷ Ko laua ana ala na masau loa kia Falaone, ko le sau o Esipito, ke fakamavae a fanau a Iselaele mei Esipito. Ko le Moisese lena mo le Alone lena.

Fakamaoki o le vokasio o Moisese

²⁸ Ti na masau loa le Eteleno kia Moisese i le fenua o Esipito,

²⁹ Na pati loa le Eteleno kia Moisese : Ko au ko le Eteleno. Fakasa kia Falaone, ko le sau o Esipito, a nea fuli ala e kau pati atu ki ai.

³⁰ Ti na tali loa Moisese i mua o le Eteleno : Ko leinei, e leaise kau masau malie ; e feaki loa ke fakalogo mai Falaone kiate au ?