Ekesote 5 - Tosi Tapu

Fakafesagai a Falaone

¹ Na ano loa Moisese mo Alone kia Falaone, o pati kiate ia : Ko leinei le folafola a le Eteleno, ko le Atua o Iselaele : Tuku ke ano loku kakai, ke fai e ia se aso fakafiafia kiate au.

² Na tali loa Falaone : Ko ai le Eteleno ke kau fakalogo ki lona leo, ti ke kau tuku ke ano Iselaele ? E leaise kau iloa fua le Eteleno, ti e leaise kau tuku loa ke ano Iselaele.

³ Na la pati loa : Kua sa mai le Atua o le kau Epeleo kia maua. Fakataga mai ke motou fai ni aso saele e tolu i le toafa, ti ke motou momoli ni sakilifisio ki le Eteleno, o tupu ke aua na tautea e ia matou ki le taumasaki mo le seleta.

⁴ Ti na pati loa le sau o Esipito kia laua : Moisese mo Alone, kolea e kolua taofi ai le gaoi a le kakai leinei ? Kotou ano ki akoutou gaoi.

⁵ Na pati loa Falaone : Ko leinei, kua api ai le kakai leinei i le fenua, ti e kolua taofi loa lana gaoi !

⁶ I le aso fai lena, na tuku loa e Falaone le fakatotonu leinei ki le kau pule o le kakai mo le kau pule gaoi :

⁷ E leaise kotou toe soli loa se mutie malo ki le kakai ke fai ai a piliki ofaipe mua ; kae ke lotou ano totonu loa o tae mutie malo.

⁸ Ke kotou fakamaua loa kia latou le lasi o le piliki leia e lotou fai masani, e leaise kotou toe too loa se nea ; talie ko le kau gasueveli latou ; koia leia e lotou kalaga ai, o pati : Tou ano o momoli ni sakilifisio ki lotatou Atua !

⁹ Ke fakalasi ni gaoi ki le kakai lena, ke lotou visia ai, ti e leaise lotou toe tokaga loa ki ni masau noa.

¹⁰ Ti na ano loa le kau pule o le kakai mo le kau pule gaoi, o pati ki le kakai : Ko leinei le masau a Falaone : E leaise kau toe soli loa kia koutou se mutie malo ;

¹¹ Ke kotou ano, koutou totonu, o tae mai sakoutou mutie malo mei le ganea leia e kotou maua ai loa a ia, talie e leaise toe too loa se nea i lakoutou gaoi.

¹² Na mafolafola loa le kakai i le fenua katoa o Esipito, o tae kaui fulumeto malo o fetogi ai le mutie malo.

¹³ Na fakamakeke latou e le kau pule gaoi, o pati : Kotou fai ke oki malie le gaoi o le aso, ofaipe le temi leia na maua ai le mutie malo.

¹⁴ Na toe tamate foki le kau pule gaoi o fanau a Iselaele, ala na fakanofo e le kau pule a Falaone ; na lotou pati loa : kolea na leaise katoa ai nanafi mo le aso nei ofaipe le masani, a piliki ala na tonu ke kotou fau ?

¹⁵ Na ano loa a pule gaoi o fanau a Iselaele o tagi kia Falaone, o pati kiate ia : Kolea e ke fai felaaki ai ki au tagata fakasausau ?

¹⁶ E leaise koi soli se mutie malo ki au tagata fakasausau, ti kua pati mai kia matou : Kotou fai ni piliki ! Ti ko leinei, e toe tamate foki au tagata fakasausau, o sakinake kua fai e lou kakai se sala.

¹⁷ Na tali loa Falaone : Ko ni kau gasueveli koutou, ko ni kau gasueveli ! Koia leia e kotou pati ai : Tou ano o momoli ni sakilifisio ki le Eteleno !

¹⁸ Ke kotou ano nei o gaoi ; e leaise toe soli atu kia koutou se mutie malo, kae kotou fai loa ke katoa le piliki ofaipe le masani.

¹⁹ Na tio loa le kau pule gaoi o fanau a Iselaele kua fakavelivelii latou, i le pati : E leaise kotou too loa se nea fua e tasi i akoutou piliki ; e leaise fetogi loa le gaoi o le aso.

²⁰ Ti na lotou mavae loa mei le fale o Falaone, ti na lotou felavei loa mo Moisese mo Alone ala na talitali kia latou.

²¹ Na lotou pati loa kia laua : Ke tio mai le Eteleno kia koulua, ti ke fakamaaui e ia ! Kua kolua fakaliliu matou o fakalialia ki mata o Falaone mo ana tagata fakasausau, ti kua kolua teki se seleta ki olatou lima ke tamate ai matou.

²² Na toe liliu loa Moisese ki le Eteleno, o pati : Aliki, kolea kua ke fai ai le nea veli ki le kakai leinei ? Kolea na ke kakau mai ai au ?

²³ E talu laku ano kia Falaone o masau i lou suafa, mo lana fakavelivelii le kakai leinei, ti na leaise ke saofaki fua lou kakai.