Ekesote 40 - Tosi Tapu

Le fakatuu o le tapenakulo

¹ Na masau loa le Eteleno kia Moisese, o pati :

² I le uluaki aso o le uluaki masina, e ke fakatuu loa le tapenakulo, le falela tapu.

³ E ke tuku loa ki loto le aleka o le fakapapau, ti e ke tapono loa le aleka ki le lito.

⁴ E ke aumai loa le laupapa, ti e ke fakatuu loa a ia ki lona tuuaga, e ke fakatoka loa i ai a pane. E ke aumai loa le tuuaga malama ti e ke fakapikipiki loa ki ai a malama.

⁵ E ke fakatuu loa le aletale aulo o kaloni i mua o le aleka o le fakapapau, ti e ke fakapiki loa le lito ki le matapa o le tapenakulo.

⁶ E ke fakatuu loa le aletale o failaulau i mua o le uluaga o le tapenakulo mo le falela tapu.

⁷ E ke fakatuu loa le tanoa i le vasa o le falela mo le aletale, ti e ke tuku loa ki ai se vai.

⁸ E ke tau loa a kie puipui o le lotoa i lona takatakai katoa, ti e ke tau loa le lito o le matapa o le lotoa.

⁹ E ke too loa le lolo tapu, ti e ke takai loa ki ai le tapenakulo ti mo nea fuli i ai, ti e ke fakatapui loa le tapenakulo mo ona nea gaoi fuli, ti e liliu loa a ia o maokioki.

¹⁰ E ke takai loa le aletale o failaulau mo ona nea gaoi fuli, e ke fakatapui loa le aletale ; ti e maokioki loa le aletale.

¹¹ E ke takai loa le tanoa mo lona fakatafito, ti e ke fakatapui loa a ia.

¹² E ke fakasaele loa Alone mo ona vosa ki le matapa o le falela tapu, ti e ke fakamea loa latou ki se vai.

¹³ E ke fakatui loa kia Alone a kofu tapu, ti e ke pani loa a ia ki le lolo, ti e ke fakatapui loa a ia ke tausi kiate au i le gaoi fakapelepitelo.

¹⁴ E ke fakafeofi mai loa ona vosa, ti e ke fakatui loa kia latou a kofu loloa,

¹⁵ ti e ke pani loa latou ki le lolo ofaipe lau pani lolatou tamana, o tupu ke lotou gaoi kiate au i le gaoi fakapelepitelo. Ko lolatou pani lena ki le lolo e fakamaoki ai loa latou o tuumau ki le gaoi fakapelepitelo i olatou sakoga.

¹⁶ Na fai loa e Moisese a nea fuli ala na fakatotonu ake e le Eteleno kiate ia, ti na fai loa a ia ki ai.

¹⁷ I le uluaki aso o le uluaki masina o le lua o fetuu, na fakatuu ai loa le tapenakulo.

¹⁸ Na fakatuu loa e Moisese le tapenakulo ; na fakamau loa e ia ona tuuaga, ti na fakatuu loa e ia a papa mo olatou laakau fakalava, ti na fakatuu loa e ia ki aluga a pou.

¹⁹ Na folasi loa e ia le la ki le tapenakulo ; ti na folasi loa e ia le la ato i aluga, o mulimuli ki le nea leia na fakatotonu e le Eteleno kia Moisese.

²⁰ Na too loa e ia le fakamaoki, o tuku ki loto o le aleka ; na tui loa e ia a amo ki kavei o le aleka, ti na teki loa e ia le nofoaga o le manava alofa ki aluga o le aleka.

²¹ Na ave loa e ia le aleka ki loto o le tapenakulo ; na tau loa e ia le lito leia e vaelua ia le potu tapu mei le potu taputapu, ti na tapono loa e ia le aleka o le fakapapau, o mulimuli ki le nea leia na fakatotonu e le Eteleno kia Moisese.

²² Na fakatuu loa e ia le laupapa ki loto o le falela, i le fetuu noleto o le tapenakulo, i tua o le lito ;

²³ na fakatoka loa e ia i aluga a pane, i mua o le Eteleno, o mulimuli ki le nea leia na fakatotonu e le Eteleno kia Moisese.

²⁴ Na fakatuu loa e ia le tuuaga malama magamaga i loto o le falela tapu, i mua o le laupapa, i le fetuu saute o le tapenakulo ;

²⁵ ti na fakapikipiki loa e ia a malama, i mua o le Eteleno, o mulimuli ki le nea leia na fakatotonu e le Eteleno kia Moisese.

²⁶ Na fakatuu loa e ia le aletale aulo i loto o le falela, i mua o le lito ;

²⁷ Ti na tutu loa e ia i ai le kaloni fakamanogi, o mulimuli ki le nea leia na fakatotonu e le Eteleno kia Moisese.

²⁸ Na tau loa e ia le lito i le matapa o le tapenakulo.

²⁹ Ti na fakatuu loa e ia le aletale o failaulau i le uluaga o le tapenakulo, o le falela tapu ; ti na momoli loa e ia i ai le failaulau mo le moliga, o mulimuli ki le nea leia na fakatotonu e le Eteleno kia Moisese.

³⁰ Na fakatuu loa e ia le tanoa i le vasa o le falela mo le aletale o sakilifisio, ti na tuku loa e ia ki ai le vai ki le fakamea.

³¹ Na fufulu loa i ai e Moisese, mo Alone, mo ona vosa, olatou lima mo olatou vae :

³² Ka lotou ulu loa ki le falela tapu, peka lotou fakafeofi loa ki le aletale, na lotou fakamea loa, o mulimuli ki le nea leia na fakatotonu e le Eteleno kia Moisese.

³³ Na fakatuu loa e Moisese le a o le lotoa i tafatafa o le tapenakulo mo le aletale, ti na tau loa e ia le lito ki le matapa o le malae. Ti na fakaoki loa e Moisese lana gaoi.

Le kololia o le Eteleno i le tapenakulo

³⁴ Ti na uufi loa e le ao le falela tapu, ti na fakaapele loa e le kololia o le Eteleno le tapenakulo.

³⁵ Na leaise mafai ke ulu Moisese ki le falela, talie na tuu le ao i ona aluga, ti na fakaapele e le kololia o le Eteleno le tapenakulo.

³⁶ I le temi katoa leia na fanoga ai loa fanau a Iselaele, na lotou saele mo ka malaga le ao i le tapenakulo.

³⁷ Ti kapau na leaise malaga le ao, na leaise lotou ano, o kaku ki lana malaga.

³⁸ Na tuu le ao o le Eteleno i aluga o le tapenakulo i le ao ; ti na i ai se afi i le pouli, i mua o fanau fuli o Iselaele, i le temi katoa leia na lotou fanoga ai.