Ekesote 4 - Tosi Tapu

Ko i o Moisese

¹ Ti na tali loa Moisese : Ko leinei, e leaise lotou tui loa kiate au, ti e leaise lotou fakalogo loa ki loku leo. Kae e lotou pati loa : Na leaise sa le Eteleno kiate koe.

² Ti na pati loa le Eteleno kiate ia : Kolea i lou lima ? Ti na tali loa a ia : Ko se tokotoko.

³ Ti na pati loa le Eteleno : Ti le tokotoko ki le kele. Ti na ti loa a ia e Moisese ki le kele, ti na liliu loa le tokotoko ko se gata. Ti na sola loa Moisese i ona mua.

⁴ Ti na pati loa le Eteleno kia Moisese : Falo lou lima, o too a ia i lona siku. Ti na falo loa e ia lona lima o too a ia ; ti na toe liliu loa le gata ko se tokotoko i lona lima.

⁵ Na pati loa le Eteleno : Ko lena le nea leia e tonu ke ke fai, ke lotou tui loa na sa kiate koe le Eteleno, le Atua o olatou tamana, le Atua o Apalaamo, le Atua o Isaake, le Atua o Sakopo.

⁶ Na toe pati loa le Eteleno kiate ia : Teki lou lima ki lou fatafata. Ti na teki loa e ia lona lima ki lona fatafata ; ti na too ake loa e ia lona lima, ti ko leinei, kua kilia katoa lona lima, ti kua tea a ia ofaipe le nive.

⁷ Na pati loa le Eteleno : Toe teki lou lima ki lou fatafata. Ti na toe teki loa e ia lona lima ki lona fatafata ; ti na too ake loa e ia lona lima mei lona fatafata, ti ko leinei, kua toe liliu a ia o tatau mo lona kanofi.

⁸ Ti na pati loa le Eteleno : Kapau e leaise lotou tui loa kiate koe, ti kapau e leaise lotou fakalogo loa ki le leo o le uluaki fakamailoga, kae e lotou tui loa ki le leo o le fakamailoga fakamuli.

⁹ Ti kapau e leaise lotou tui loa ki fakamailoga ana e lua, ti kapau e leaise lotou fakalogo ki lou leo, e ke too loa se vai mei le vaitafe, ti ke liligi loa a ia ki le kele, ti e liliu loa le vai lena ko se toto i le kele.

¹⁰ Na pati loa Moisese ki le Eteleno : Ei loku Aliki, e leaise ko se tagata au leia e masau faigaofie, ti e leaise ko se nea fua mei nanafi, pe ko leia atu a aso, pe ko le aso leia na ke kamata masau ai ki lau tagata fakasausau ; talie e valea loku gutu mo loku alelo.

¹¹ Na pati loa le Eteleno kiate ia : Ko ai na fakatupu ia le gutu o le tagata ? Ti ko ai e fakaliliu ia le tagata o gutu mate, mo tulituli, mo tio pe kivi ? Pe leaise ko au leia ko le Eteleno ?

¹² Ke ke ano, e kau nofo loa mo lou gutu, ti e kau ako loa kiate koe le nea leia e tonu ke ke fakasa.

¹³ Na pati loa Moisese : Ei loku Aliki, e kau kole atu kiate koe ke ke kakau se tasi ake leia e ke loto loa ki ai.

¹⁴ Ti na ita loa le Eteleno kia Moisese, o pati : Pe leaise ko lou taina Alone, le tagata Levi ? E kau iloa e masau faigaofie a ia. Ti ko leinei a ia totonu e au kiate koe ; ti ka tio loa a ia kiate koe, e fiafia loa a ia i lona loto.

¹⁵ E ke masau loa kiate ia, ti e ke tuku loa au masau ki lona gutu, ti ko au e kau nofo loa mo lou gutu ti mo lona gutu, ti e kau ako loa kia koulua le nea leia e tonu ke kolua fai.

¹⁶ E fakasoko loa e ia au masau ki le kakai ; ti e liliu loa a ia kiate koe ko lou gutu, ti e ke liliu loa kiate ia ko le fakafofoga o le Atua.

¹⁷ Too i lou lima le tokotoko lena, leia e ke fai loa ki ai a fakamailoga.

Toe liliu o Moisese ki Esipito

¹⁸ Na ano loa Moisese ; ti na toe liliu loa a ia kia Setelo, lona tamana, ti na pati loa a ia kiate ia : E kau kole atu kiate koe, ke ke tuku mai au ke kau ano o fakafelavei ki oku fetaina ala e nonofo i Esipito, o tio pe koi lotou mauuli. Na pati loa Setelo kia Moisese : Ano i le tokamalie.

¹⁹ Na pati loa le Eteleno kia Moisese, i Matiane : Ano, o toe liliu ki Esipito, talie kua mate latou fuli ala na afa ki lou mauli.

²⁰ Na too loa e Moisese lona avaga mo ona vosa, o fakaeke latou ki ni asino, ti na toe liliu loa a ia ki le fenua o Esipito. Na too loa e ia i lona lima le tokotoko o le Atua.

²¹ Na pati loa le Eteleno kia Moisese : E ke toe liliu loa ki Esipito, tio, kua kau tuku a nea fakamanamana kesekese ki lou lima : e ke fai loa latou i mua o Falaone. Ti ko au, e kau fakafefeka ia loa lona loto, ti e leaise tuku loa e ia le kakai ke ano.

²² E ke pati loa kia Falaone : E masau le Eteleno, o pati : Ko loku vosa Iselaele, loku uluaki.

²³ E kau pati atu kiate koe : Tuku loku vosa ke ano, o tupu ke tausi a ia kiate au ; kapau e ke fakafiti ke tuku a ia ke ano, ti e kau tamate loa lou vosa uluaki.

²⁴ I le lolotoga o lana fanoga, i se ganea leia na moe ai loa Moisese i le pouli, na osoi loa a ia e le Eteleno, ti na loto loa a ia ke tamate Moisese.

²⁵ Kae na too loa e Sefola se fa fatu matakakai, o tuuti ai loa le mui kilikili o lona vosa, o ti a ia ki vae o Moisese, o pati : Ko se avaga a koe o le toto kiate au !

²⁶ Ti na tuku loa e le Eteleno a Moisese. Ti na pati loa le fafine : Avaga o le toto ! o tupu ko le silikosisio.

²⁷ Na pati loa le Eteleno kia Alone : Ano i le toafa ki mua o Moisese. Ti na ano loa Alone ; ti na felavei loa a ia mo Moisese i le mauga o le Atua ; na sogi loa a ia kia Moisese.

²⁸ Ti na fakasa loa e Moisese kia Alone a folafola fuli a le Eteleno, leia na kakau ia a ia, mo fakamailoga fuli ala na fakatotonu e ia ke fai.

²⁹ Na soko atu loa le fanoga o Moisese mo Alone, ti na la fakatasii loa le kau matua fuli o fanau a Iselaele.

³⁰ Ti na fakasa loa e Alone a folafola fuli ala na tuku e le Eteleno kia Moisese, ti na fakasoko loa e ia a fakamailoga fuli i mua o le kakai.

³¹ Ti na tui loa le kakai. Na lotou iloa loa kua asiasi le Eteleno ki fanau a Iselaele, ti kua tio a ia ki lolatou mamae ; ti na lotou tulolo loa ki le kele, o fakafetai.