Ekesote 37 - Tosi Tapu

Le aleka o le sai

¹ Na fai loa e Petesaleele le aleka ki le akasia ; ko lona loa ko le meta e tasi mo satimeta e kau lua tupu lima, ko lona laulasi ko satimeta e kau fitu tupu lima, ti na kau fitu tupu lima lona taualuga.

² Na aofi loa e ia le aleka ki le aulo mea i loto mo tafa, ti na fai loa e ia se tapatapa aulo i lona takatakai katoa.

³ Na fai loa e ia ona kavei e fa ki le aulo saka, o fakapipiki loa e ia ki ona tifi e fa, ko kavei e lua i le tasi fetuu, ti lua i le tasi fetuu.

⁴ Na fai loa e ia ona amo akasia e lua, ti na aofi loa e ia laua ki le aulo.

⁵ Na fakaulu loa e ia a amo ki kavei i fetuu e lua o le aleka, ke amo ai le aleka.

Le nofoaga o le manava alofa

⁶ Na fai loa e ia le nofoaga o le manava alofa ki le aulo mea ; ko lona loa ko le meta e tasi mo le kau lua tupu lima satimeta, ti kau fitu tupu lima lona laulasi.

⁷ Na fai loa e ia ni selupino aulo e lua ; ti na fai loa e ia laua ki le aulo leia na tuki i se potui aulo e tasi, o fakatuu i potupotu e lua o le nofoaga o le manava alofa.

⁸ Na tuu le tasi selupino i le tasi potupotu, ti na tuu le tasi selupino i le tasi potupotu ; na fai loa e ia a selupino ke la ulu ake mei le nofoaga o le manava alofa i ona potupotu e lua.

⁹ Na folasi loa e selupino ola kapakau i aluga, o malui ki ola kapakau le nofolaga o le manava alofa, ti na la feagaaki loa. Na tio a mata o selupino ki le nofolaga o le manava alofa.

Le laupapa o pane tapu

¹⁰ Na fai loa e ia le laupapa ki le akasia, na meta tasi lona loa, ti kau lima satimeta lona lona laulasi, ti kau agafulu tupu lima lona taualuga.

¹¹ Na aofi loa e ia a ia ki le aulo mea, ti na teuteui loa e ia le takatakai katoa.

¹² Na fai loa e ia i lona takatakai se tapatapa, ko lona laulasi ko le alofilima e tasi, ti na teuteui loa e ia a ia ki le aulo i le takatakai katoa.

¹³ Na fai loa e ia ki le laupapa ni fa kavei e fa ki le aulo saka, ti na fakapipiki loa e ia latou ki tifi e fa, i ona vae e fa.

¹⁴ Na feofi loa a kavei ki le tapatapa, ti na fakaulu loa ki ai a amo ke amo ai le laupapa.

¹⁵ Na fai loa e ia a amo ki le akasia, ke amo ai le laupapa, ti na aofi loa e ia laua ki le aulo.

¹⁶ Na fai loa e ia nea gaoi o le laupapa, mo ona pa, mo ona ipu, mo ona kalise, mo ona ipu liliki ki moliga vino ; na fai loa e ia nea ana ki le aulo mea.

Le tuuaga malama aulo

¹⁷ Na fai loa e ia le tuuaga malama ki le aulo mea ; na fai loa e ia le tuuaga malama ki le aulo tuki ; na tuki loa e ia lona fa tafito, mo lona kuaga, mo ona mulii se, mo ona pome, ti mo ona se, i le potu aulo e tasi.

¹⁸ Na mavae mei ona fetuu ni maga e ono, ko maga e tolu i le tasi fetuu, ti ko maga e tolu i leia fetuu.

¹⁹ I le maga e tasi na tuu ai ni mulii se e tolu ofaipe ni fuai amatie, mo ona pome mo ona se, ti na tuu i leia ake a maga a mulii se e tolu ofaipe ni fuai amatie, mo ona pome, ti mo ona se ; na fenaaki a maga e ono ala na mavae mei le tuuaga malama.

²⁰ I le kuaga o le tuuaga malama na tuu ai ni mulii se e fa ofaipe ni fa amatie, mo ona pome, ti mo ona se.

²¹ Na tuu i lalo o maga e lua ala na mavae mei le kuaga o le tuuaga malama se pome e tasi, mo se tasi pome i lalo o la ake a maga e lua, ti mo se tasi fa pome i lalo o la ake a maga e lua. Na fenaaki fuli ki maga e ono ala na mavae mei le kuaga o le tuuaga malama.

²² Na fai a pome mo maga o le tuuaga malama ki le potu aulo e tasi leia na tuki ; ko le potu aulo e tasi na tuki, ti ko se aulo mea a ia.

²³ Na fai loa e ia ona malama liliki e fitu, mo ona koti vavai, ti mo ona tanakiaga mugalafu ki le aulo mea.

²⁴ Na fakaaoga loa e ia ni kilo aulo mea e kau tolu, ki le fai o le tuuaga malama mo ona nea gaoi fuli.

Le aletale o kaloni

²⁵ Na fai loa e ia le aletale o kaloni ki le akasia ; ko lona loa ko satimeta e kau lima ti ko lona laulasi ko satimeta e kau lima ; na tatau fuli ona fetuu e fa, ti ko lona taualuga na meta tasi. Na tuu i ona tifi e fa ni tala e fa.

²⁶ Na aofi loa e ia le laupapa ki le aulo mea, i aluga mo ona fetuu, mo lona takatakai katoa, ti mo ona tala ; ti na fai loa e ia a tapatapa aulo i lona takatakai katoa.

²⁷ Na fai loa e ia i lalo o le tapatapa ni kavei aulo e lua i fetuu e lua ; ti na fai loa e ia ni kavei e lua ki fetuu e lua, ke fakaulu ai a amo ala ke amo ai.

²⁸ Na fai loa e ia ni amo ki le akasia, ti na aofi loa e ia ki le aulo.

Le lolo tapu

²⁹ Na fai loa e ia le lolo pani tapu, mo le kaloni fakamanogi, ki a nea fakamanogi, o mulimuli ki le poto o le tagata fai kaloni.