Ekesote 35 - Tosi Tapu

Fakamanatu o le sapato

¹ Na fakatasii loa e Moisese le kakai katoa o fanau a Iselaele, o pati kia latou : Ko nei a nea ala e fakatotonu e le Eteleno :

² E gaoi loa i aso e ono ; kae ko le fitu o aso ko se nea tapu loa a ia kia koutou ; ko le sapato a ia, ko le aso malolo, leia na fakatapu ki le Eteleno. Ko le tagata leia e fai ia loa se gaoi i le aso lena, e tautea loa a ia ki le mate.

³ E leaise kotou tafu ia loa se afi, i se nofoaga i okoutou nofoaga, i le aso o le sapato.

Moliga ki le fau o le tapenakulo

⁴ Na masau loa Moisese ki le kakai katoa o fanau a Iselaele, o pati : Ko leinei le nea leia na fakatotonu e le Eteleno.

⁵ Kotou too i okoutou koloa se moliga ki le Eteleno. Ko tagata fuli e loto malie, e lotou aumai loa se moliga ki le Eteleno : ko se aulo, mo se siliva, mo se sila ;

⁶ mo ni kie usi, mo ni kie kula fakapouli, mo ni kie kula malie, mo ni kie tea makeke, mo ni fului koti ;

⁷ mo ni kilii ovi tagata lanu kula, mo ni kilii kakaututuu, mo ni papa akasia ;

⁸ mo se lolo ki malama, mo ni nea fakamanogi ki le lolo tapu mo le kaloni fakamanogi ;

⁹ mo ni fatu ko le onise ti mo ni iki ake a fatu ki le teuteui o le efote mo le peketolale.

¹⁰ Ko latou fuli ala e poto tufuga ia koutou, ke lotou au o fai a nea fuli ala na fakatotonu e le Eteleno :

¹¹ le tapenakulo, mo ona puipui, mo lona ato, mo ona fakamau, mo ona papa, mo ona papa fakalava, mo ona pou mo ona tuuaga ;

¹² le aleka mo ona amo, mo lona tapono, ti mo le kie ke uufi ai le aleka ;

¹³ le laupapa mo ona amo, mo ona nea gaoi fuli, ti mo pane tapu ;

¹⁴ le tuuaga malama mo ona nea gaoi, mo ona malama, ti mo le lolo ki malama ;

¹⁵ le aletale o kaloni mo ona amo, mo le lolo tapu ti mo le kaloni fakamanogi, mo le lito o le matapa ulu ki le tapenakulo ;

¹⁶ le aletale o failaulau, mo lona ukamea pupu sila, mo ona amo, ti mo ona nea gaoi fuli ; le tanoa mo lona tafito ;

¹⁷ mo puipui tautau o le lotoa, mo ona pou mo ona tuuaga, ti mo le lito o le uluaga o le lotoa ;

¹⁸ mo pike o le tapenakulo, mo pike o le lotoa, ti mo olatou maea ; mo kofu gaoi ki le gaoi o le sagatualio,

¹⁹ mo kofu tapu ki le tagata faisakilifisio ko Alone, ti mo kofu o ona vosa ki le gaoi fakapelepitelo.

²⁰ Na mavae loa le kakai katoa o fanau a Iselaele i mua o Moisese.

²¹ Na ano loa latou fuli ala na loto alofa mo loto malie, o ave alatou moliga ki le Eteleno ki le gaoi o le falela tapu, mo lona tausi, ti mo kofu tapu.

²² Ko tagata mo fafine, latou ala na loto malie, na ano loa o ave alatou moliga ; ko sa sau, mo mama, mo matemate, mo nea fakateuteu aulo kesekese ; na lotou tasi momoli loa lana moliga aulo ala na fakatapui ki le Eteleno.

²³ Ko latou fuli ala na maua ia ni kie lanu usi, mo ni kie kula malie, mo ni kie kula fakapouli, mo ni kie tea makeke, mo se fului koti, mo ni kilii ovi tagata lanu kula, ti mo ni kilii kakaututuu, na latou ave loa latou.

²⁴ Ko latou fuli ala na fai ia loa ni moliga ki se siliva mo se sila, na ave ia loa latou ki le Eteleno. Ti ko latou fuli ala na maua ia loa ni papa akasia ki le gaoi, na ave ia loa a ia.

²⁵ Ko fafine fuli ala na poto tuitui ki olatou lima, na ave ia loa le fua o alatou gaoi, ko ni filo usi, mo kula malie, mo kula fakapouli, mo tea.

²⁶ Ko fafine fuli ala na loto malie mo poto i le fili na fili ia loa le fului koti.

²⁷ Ko pule o le kakai na ave ia loa ni fatu onise mo ni iki ake a fatu ki le teuteui o le efote mo le peketolale ;

²⁸ mo ni nea fakamanogi, mo le lolo ki le tuuaga malama, mo le lolo tapu, ti mo le kaloni fakamanogi.

²⁹ Ko fanau fuli a Iselaele, tagata mo fafine, ala na loto malie ke kau ki le gaoi leia na fakatotonu e le Eteleno kia Moisese, na ave ia loa ki le Eteleno ni moliga o fakalogo ki le loto.

Fai o le gaoi : Petesaleele mo Oliape

³⁰ Na pati loa Moisese ki fanau a Iselaele : Ke kotou iloa kua filifili e le Eteleno a Petesaleele, vosa o Uli, vosa o Ulu, mei le faasiga o Suta.

³¹ Ti kua fakaapele e ia Petesaleele ki le Laumalie o le Atua, mo le poto, mo le atamai, ti mo le poto i le fai o faasiga gaoi fuli.

³² Ti kua tuku e ia kiate ia le poto i le fai o ni nea foou, mo gaoi ki le aulo, mo le siliva, ti mo le sila,

³³ mo le togi o fatu ke fakapiki ki kofu, mo le gaoi o le papa, ti mo le fai o nea fakateuteu kesekese.

³⁴ Ti kua soli foki e ia kiate ia le poto i le fai ako, ti e toe tatau mo Ooliape, vosa o Aisamake, mei le faasiga o Tane.

³⁵ Kua fakaapele e ia laua ki le atamai, ke la fai gaoi tuki mo gaoi fakatufuga fuli, ti ke la tui a nea fakateuteu mo nea lalaga ki kie usi, mo kula malie, mo kula fakapouli, mo tea, ti ke la fai a gaoi fuli mo nea foou fuli.