Ekesote 34 - Tosi Tapu

Fakafoou o le sai mo Iselaele

¹ Na pati loa le Eteleno kia Moisese : Ta ni fatu lalapa e lua ofaipe uluaki fatu, ti e kau tosi loa i ai a folafola ala na tuu i uluaki fatu ala na ke maumaui.

² Teuteu ki le usu apogipogi, ti ke pale loa i le usu ki le mauga o Sinai ; e ke tuu loa i oku mua, i le tumutumu o le mauga.

³ Ke aua na pale loa se tasi mo koe, ti ke aua na sa loa se tasi i le mauga katoa ; ti ke aua na kai loa ni kau ovi, mo ni kau pipi i le mauga lena.

⁴ Na ta loa e Moisese a fatu lalapa e lua ofaipe uluaki fatu ; ti na tuu ake loa a ia koi usu, o pale ki le mauga o Sinai, o mulimuli ki le fakatotonu leia na fai kiate ia e le Eteleno, ti na too loa e ia i lona lima a fatu lalapa e lua.

⁵ Na ifo ake loa le Eteleno i se ao, o tuu i ona tafa i le mauga, ti na fakasa loa e ia le suafa o le Eteleno.

⁶ Ti na ano loa le Eteleno i ona mua, o kalaga : Eteleno, Eteleno, Atua manava alofa mo loto alofa, mo kataki fualoa, mo mou koloa i le agamalie mo le agatonu,

⁷ leia e taupau ia lona alofa o kaku ki tautupu e afe, leia e fakamolemole ia le agaveli, mo le patigataa, ti mo le agasala, kae e leaise tuku noa e ia leia e agasala, ti e fakatuaa e ia le agaveli a tamana ki fanau mo makopuna o kaku ki le tolu mo le fa o tautupu.

Le vokasio foou

⁸ I le lakaga fai lena, na fakamapee loa Moisese ki le kele, o su.

⁹ Ti na pati loa a ia : Aliki, kapau kua kau maua se kalasia i ou mua, ti ke saele le Aliki i loto malie o matou, talie ko se kakai ua fefeka a ia ; fakamolemole ki amatou agasala mo amatou agaveli, ti ke too matou ko lou tofiga.

¹⁰ Na tali loa le Eteleno : Ko leinei, e kau fai loa se sai. E kau fai loa i mua o lou kakai katoa, ni nea fakamanamana ala na leikiaise soko fuai i se fenua pe ko se puleaga ; e tio loa le kakai katoa lena e takatakai ia a koe ki le gaoi a le Eteleno, ti e fakaii loa le nea leia e kau fakasoko ia loa kiate koe.

¹¹ Tokaga ki le nea leia e kau fakatotonu kiate koe i le aso nei. Ko leinei, e kau kapu loa i ou mua le kau Amole, mo le kau Kanaane, mo le kau Eti, mo le kau Felesi, mo le kau Evi, mo le kau Sepusi.

¹² Tokaga kiate koe, ke aua na ke fai ia se sai mo kakai o le fenua leia e tonu ke ke ulu ki ai, talie e lotou liliu loa ko se masele kiate koe.

¹³ Kae e kotou maumaui loa olatou aletale, e kotou momoi loa olatou fakatata, ti e kotou tekai loa olatou laakau tapu.

¹⁴ E leaise ke punou loa ki se atua kese ; talie e maua e le Eteleno le igoa ko finenonofo, ko se Atua finenonofo a ia.

¹⁵ Tokaga ai kiate koe, ke aua na ke fai ia se sai mo le kakai o le fenua, talie ke aua na ke tausi ki olatou atua ti mo ke momoli ni sakilifisio kia latou, ti ke lotou fakaafe loa a koe, o ke kai loa ki alatou vikitima ;

¹⁶ talie ke aua na ke too ia olatou taineliki ki ou vosa, ti ko olatou taineliki, ala e tausi ki olatou atua, ke aua na lotou toso ia ou vosa ke tausi ki olatou atua.

¹⁷ E leaise ke fai loa kiate koe se atua ki se ukamea kua saka.

¹⁸ E ke tausi loa le aso o pane sala fakatupu, i ni aso e fitu, i le temi leia kua fakatuutuu ki ai i le masina ko Apipi : e ke kai loa ni pane sala fakatupu, o fai ki le nea leia na kau fakatotonu atu kiate koe, talie na ke mavae i le masina lena mei Esipito.

¹⁹ Ko uluaki tupu fuli a aku, tatau mo uluaki manu tagata fuli i kau manu, pe ko pipi, mo ovi, mo koti.

²⁰ E ke totogi loa ki se akeno le uluaki o le asino ; ti kapau e leaise ke totogi a ia, e ke fatii loa lona ua. E ke totogi loa a uluaki fuli o ou vosa ; ti e leaise au loa ki oku mua mo lima ata.

²¹ E ke gaoi loa i aso e ono, ti e ke malolo loa i le fitu o aso ; e ke malolo loa, tatau fai pe ko le temi gaoi i faisaga pe ko le temi tanaki o fua.

²² E ke taupau loa le aso o le Penikosite, le aso o le temi tanaki o uluaki fua o le fulumeto, ti mo le aso o le tanaki o fua i le fakaoki o le fetuu.

²³ E tua tolu i le fetuu, e fakatasi loa a tagata fuli i mua o le Aliki, le Eteleno, ko le Atua o Iselaele.

²⁴ Talie e kau kapu loa a puleaga i ou mua, ti e kau fakalasi loa lou fenua ; ti e leaise manumanu loa se tasi ki lou fenua, i le temi leia e ke pale ai loa ki mua o le Eteleno, lou Atua, o tua tolu i le fetuu.

²⁵ Aua na ke momoli fakatasi loa mo se pane fakatupu le toto o le vikitima leia kua momoli mai kiate au ; ti aua na ke tuku loa le sakilifisio o le Pasikate mei le pouli ke kaku ki le usu.

²⁶ E ke aumai loa ki le fale o le Eteleno, lou Atua, a uluaki fua o le kele. Aua na ke saka loa se uviki koti i le sua u o lona tinana.

²⁷ Na pati loa le Eteleno kia Moisese : Tosi a folafola anei ; talie kua kau fai le sai mo koe mo Iselaele, o mulimuli ki folafola anei.

²⁸ Na nofo loa Moisese mo le Eteleno i le ganea lena i aso e kau fa mo po e kau fa. Na leaise kai loa e ia se pane, pe na inu loa e ia se vai. Ti na tosi loa e le Eteleno i fatu a folafola o le sai, a folafola e kau agafulu.

Fatu foou ; gigila o mata o Moisese

²⁹ Na ifo loa Moisese mei le mauga o Sinai, ti na too loa e ia i ona lima a fatu e lua o le sai ; na leaise iloa loa e ia kua gigila ona mata, talie na masau a ia mo le Eteleno.

³⁰ Na tio loa Alone mo fanau fuli o Iselaele kia Moisese, ti ko leinei, kua gigila le kili o ona mata ; ti na lotou i loa i le fakafeofi ake kiate ia.

³¹ Na kalagai loa latou e Moisese : ti na ano loa Alone mo le kau pule o le kakai kiate ia, ti na masau loa a ia kia latou.

³² I le oki o le nea lena, na fakafeofi ake loa fanau fuli o Iselaele, ti na tuku loa e ia kia latou a fakatotonu fuli ala na tali e ia mei le Eteleno, i le mauga o Sinai.

³³ I le oki o le masau a Moisese kia latou, na puloui loa e ia ona mata ki se kie.

³⁴ I temi fuli ala na ulu ai loa Moisese ki mua o le Eteleno o masau kiate ia, na too loa e ia le kie i ona mata, o kaku ki le temi leia na mavae ai loa a ia ; ti ka ulu loa a ia ki fafo, o fakasa loa ki fanau a Iselaele le nea leia na fakatotonu ake kiate ia e le Eteleno.

³⁵ Na tio loa fanau a Iselaele ki mata o Moisese, ti na lotou tio loa kua gigila a ia ; ti na toe puloui loa e Moisese ona mata o kaku ki lana toe ulu o masau mo le Eteleno.