Ekesote 33 - Tosi Tapu

Fakamolemole a le Atua

¹ Na pati loa le Eteleno kia Moisese : Ano, mavae i leinei, a koe mo le kakai leia na ke fakamavae mei le fenua o Esipito ; pale ki le fenua leia na kau fakapapau ke soli kia Apalaamo, mo Isaake, mo Sakopo, o pati : E kau soli loa le fenua ki lou sakoga.

² E kau kakau loa i ou mua se aselo, ti e kau kapu loa le kau Kanaane, mo le kau Amole, mo le kau Eti, mo le kau Felesi, mo le kau Evi, mo le kau Sepusi.

³ Pale ki le fenua lena leia e tafe ai le sua manu mo le meli. Kae e leaise kau pale loa i loto malie o ou, talie ke aua na kau fakapuli ia loa a koe i le ala, talie ko se kakai ua fefeka a koe.

⁴ I le logo loa a le kakai ki masau fakaii ana, na lotou fetagisi loa ; ti na leaise tui loa e se tasi ona nea fakateuteu.

⁵ Ti na pati loa le Eteleno kia Moisese : Pati ki fanau a Iselaele : Ko se kakai ua fefeka koutou ; kapau e kau ano i se ga temi ikiiki fua i loto malie o koutou, e kau fakapuli loa koutou. Koia ke kotou tatala ai okoutou nea fakateuteu, ti e kau tio loa pe kolea le nea leia e kau fai loa kia koutou.

⁶ Na tatala loa e fanau a Iselaele olatou nea fakateuteu, ti na lotou fakamamao loa mei le mauga o Olepe.

Le falela o le felavei i tua o le nofolaga

⁷ Na siki loa e Moisese le falela, o fakatuu a ia i le tua nofolaga, o mamao i le nofolaga. Na fakaigoa loa e ia a ia ko le falela o le felavei ; ti ko latou fuli ala na fia felavei mo le Eteleno na ano loa ki le falela o le felavei, i tua o le nofolaga.

⁸ Ka ano Moisese ki le falela, na tutuu loa le kakai katoa ki aluga ; na tasi tuu le tagata i mua o lona falela o tio kia Moisese, o kaku ki lana ulu ki le falela.

⁹ Ka ulu Moisese ki le falela, na ifo loa le pou ao, o tuu i le uluaga o le falela, ti na masau loa le Eteleno mo Moisese.

¹⁰ Na tio le kakai katoa ki le pou ao leia na tuu i le matapa o le falela, ti na tutuu le kakai katoa ki aluga, o su i mua o olatou falela.

¹¹ Na masau loa le Eteleno mo Moisese o feagaaki a mata ki mata, ofaipe se tagata leia na masau mo lona kaukau nea. Ti oki, na toe liliu loa Moisese ki le nofolaga ; kae ko lana tagata fakasausau tupulaga ko Sosue, vosa o Nune, na leaise mavae loa a ia mei loto o le falela.

Tio o Moisese ki le kololia o le Atua

¹² Na pati loa Moisese ki le Eteleno : Ko leinei, e ke pati mai kiate au : Taki le kakai leinei ! Ti e leaise ke fakasa mai kiate au pe ko ai leia e ke kakau loa mo au. Kae kua ke pati : E kau iloa a koe i lou igoa totonu, ti kua ke alofa kiate au.

¹³ I le temi nei, kapau kua kau maua lou alofa, fakasa mai kiate au ou ala ; ti e kau iloa maoki loa a koe, ti e kau toe maua loa lou alofa. Ke aua na galo kiate koe ko le kakai leinei ko lou kakai totonu.

¹⁴ Na tali loa le Eteleno : E kau ano loa mo koe, ti e kau soli loa kiate koe se maloloaga.

¹⁵ Na tali loa Moisese : Kapau e leaise ke saele a koe totonu mo matou, ti ke aua na ke fakamavae matou i leinei.

¹⁶ Kapau e leaise ke saele a koe totonu mo matou, pe motou iloa feaki loa kua ke alofa kiate au mo lou kakai ? Pe leaise ko le temi loa leia e ke saele ai loa a koe totonu mo matou, ti e ke fakakese ai loa au mo lou kakai i kakai fuli i aluga o le malama nei ?

¹⁷ Na pati loa le Eteleno kia Moisese : E kau fai loa le nea leia e ke kole mai ki ai, talie kua kau alofa kiate koe, ti e kau iloa a koe i lou igoa.

¹⁸ Na pati loa Moisese : Fakatio au ki lou kololia !

¹⁹ Na tali loa le Eteleno : E kau saele loa i ou mua ti e kau fakasa loa kiate koe loku agamalie katoa, ti e kau kalagai loa i ou mua le suafa o le Eteleno ; e kau soli loku alofa ki leia e kau alofa ki ai, ti e kau manava alofa ki leia e kau manava alofa ki ai.

²⁰ Na pati loa le Eteleno : E leaise feala ke ke tio ki oku mata, talie e leaise feala ke tio le tagata kiate au ti mauli.

²¹ Na pati loa le Eteleno : Ko leinei se ganea i oku tafa : e ke tuu loa i aluga o le utu.

²² Ka fakalaka loa loku kololia, e kau tuku loa a koe ki se mafaa o le utu, ti e kau uufi loa a koe ki loku lima o kaku ki laku fakalaka.

²³ Ti ka kau too loa loku lima, e ke tio mai loa kiate au mei muli ; kae e leaise feala loa ke ke tio ki oku mata.